Read lunyore 2 SAMWELI 13 Bible Online

2 SAMWELI 13 - lunyore bible

2 SAMWELI 13

¹Abisalomu, omusiani wa Daudi yali nende mbotso nyene owelikondo lilahi olangwanga Tamari. Amunoni, omusiani wa Daudi undi yali niyayanza Tamari okhusila.

²Amunoni yali niyamuyanza okhusila kata nalwal'lakhwo sichila kalolekha nobutinyu okhumunyoola; singa omukhaana omuchima osili okhukonakhwo nomusaatsa yali niyekal'lwa okhubukana nabasaatsa.

³Nebutswa Amunoni yali nomulina uwe, omundu omuchesi oweliira lilie Yonadabu omusiani wa amwabo nyene Daudi.

⁴Kho Yonadabu yamala abool'le Amunoni mbu, “Ibe oli omusiani womuruchi, ne buli litukhu ndolanga noli omubelelu. Nimang'ana sina akakhunyasianga?” Amunoni namukalusia mbu, “Ise ndayanza Tamari, mbotso nyene Abisalomu omusiani wefwe undi.”

⁵Yonadabu namubool'la mbu, “Wekaatie mbu olwala ma weyalisie musitanda. Ne olwa papa uwo nayetse okhukhulola omubool'le mbu, ‘Noyanza bool'la mbotswa Tamari yetse okhundisia ebiokhulia. Nzenyanga alombele hano ebiakhulia hanyala okhumulola, ma yambelesie ebiokhulia tsana omwene.’ ”

⁶Kho Amunoni niyekaatia mbu nomulwaye ma natsia okhweyalisia khusitanda. Omuruchi Daudi yatsia okhumulola ne Amunoni namubool'la mbu, “Noyanza olekhe mbotswa Tamari yetse okhulombela hano etsikeki ndititi ahanyala okhumulola ma khandi omwene yambelesie.”

⁷Kho Daudi yarumania amang'ana munyumba yoburuchi khu Tamari namubool'la mbu, “Tsia munyumba ya Amunoni ma omulombele ebiokhulia.”

⁸Tamari yatsiayo ne nanyoola Amunoni niyeyalisisie khusitanda. Yabukula obusie natubul'la m'maatsi, ma nalomba etsikeki nali habundu ha Amunoni anyala okhumulola. Ma nalomba etsikeki

⁹ma nahinia khusifuria khulwa Amunoni okhulia, nebutswa Amunoni siyatsilia tawe. Amunoni namubool'la, “Bool'la buli mundu atsie esioba.” Ne bosi nibarula nibatsia.

¹⁰Ma nabool'la Tamari, “Leera etsikeki yitsio hano khusitanda sianje ma umbelesie omwene.” Nabukula etsikeki namuhil'la.

¹¹Ne olwa Tamari yali namuhelesianga etsikeki, Amunoni yamwetsumba naboola mbu, “Yitsa khube n'nawe!”

¹²Tamari naboola mbu, “Ndakhuula, orambachia okhukhola amang'ana kes'simba murwe yaka tawe! Yaka namabi okhusila!

¹³Ise ndakhachenda nimengele hena mubandu? Ne ibe wakhaba nes'simba murwe esikali mu Isiraeli. Yanza ol'lome khumuruchi ne ndi nobusubili mbu anyala okhumbaana ise khuibe.”

¹⁴Ne Amunoni siyali onyala okhuhuchil'la aka Tamari yaboolanga tawe; ne sichila Amunoni yali netsingufu okhuyomba Tamari, yamuyembel'la ma naba n'naye khulwe tsingufu.

¹⁵Ma Amunoni nahambila Tamari oburima obukali. Kho namubihil'lwa okhuyomba singa yali niyamuyanza. Yamala namubool'la mbu, “Rula munzu muno!”

¹⁶Tamari namukalusia mbu, “Sinyala okhutsia tawe. Okhukhunga rule hano munjila yiyi nobubi okhusila okhuyomba ake ibe okhol'le!” Nebutswa Amunoni siyahuhia khuka Tamari yaboolanga tawe;

¹⁷yamala nalanga omurumikhili uwe omukhol'langa emilimo ma namubool'la mbu, “Khunga omukhasi uyu arule mutsimoni tsianje! Musukume esioba ma ofunge omuliango!”

¹⁸Omurumikhili uyo yamusukuma esioba ma nafunga omuliango. Tamari yali niyebikhile ingubo yamakhono amarambi, eyebikhwanga nende omukhaana womuruchi omuchima osili okhuteesibwa.

¹⁹Tamari niyooha likokhe khumurwe kukwe, narandula ingubo yiye ma niyefuma amakhono m'moni ma narulaho natsia nalakayanga.

²⁰Olwa Abisalomu, mbotso nyene yamulola, yamureeba mbu, “Omusiani wenywe Amunoni yali okhuba n'nawe? Noyanza, mbotswa oralekha amang'ana yaka kakhunyasie tawe. Amunoni nomusiani wenywe undi kho orakhabool'lakhwo omundu wosi tawe.” Kho Tamari yamenya munyumba mwa Abisalomu nabeleeye khandi nali esisoma.

²¹Olwa Daudi yahul'la akali nikekholekhele, yali nelirima likali.

²²Ne Abisalomu yasinyikhila Amunoni okhusila khulwo okhuhachia mbotso nyene Tamari okhuba n'naye ma nikachila Abisalomu siyal'lomangakhwo nende Amunoni tawe.

²³Emihika chibili nichihweye, Abisalomu yali nomukho kwamakondi kaake okhukhalakwa obwoya habundu halangwa Baali Hasori, ahembi nelitaala lia Efuraimu. Yalanga abasiani bomuruchi bosi okhwitsa khumukho yikwo.

²⁴Yatsia khumuruchi Daudi ma naboola mbu, “Omwami, owoluyali, Ise ndi nomukho kwokhukhalaka obwoya khumakondi kanje. Noyanza ibe nende abemeli baabo mwitse mumasabo yaka?”

²⁵Omuruchi nakalusia naboola mbu, “Tawe omusiani wanje, nobe nomunyakhano omukali ifwe fwesi nikhwakhetsa.” Abisalomu natsilil'la okhumureeba, nebutswa omuruchi nasuula ma nabool'la Abisalomu arule imbeliwe atsie.

²⁶Nebutswa Abisalomu naboola mbu, “Kho nikali mbwo, wakhahuchil'la omusiani wefwe Amunoni yetse?” Omuruchi nareeba mbu, “Busina Amunoni yetse?”

²⁷Nebutswa Abisalomu yarelel'la okhureeba, ma mukhumal'likha Daudi yahuchil'la Amunoni halala nabasiani babwe bosi batsia nende Abisalomu. Abisalomu yalomba lisabo elihela singa eliomuruchi anyala okhulomba,

²⁸ne nalaka abarumikhili baabe mbu: “Muhenjelesie Amunoni olwa nabe nanyweye amalwa amenji ne olwa namulake ne mumwira. Murakharia tawe. Ise omwene nandeyame okhuba omwiri. Mwome ikholo ne muratekela tawe!”

²⁹Kho abarumikhili ba Abisalomu nibalonda amalakoke ma nibamwira Amunoni. Abasiani ba Daudi bandi bosi nibaniina khutsipunda tsiabwe ma nibelukha.

³⁰Olwabasiani yabo bali nibali khunjila okhutsia ingo, Daudi yabool'lwa mbu, “Abisalomu wir're abasiani baabo bosi; abulaho kata mulala osikaye tawe.”

³¹Omuruchi nasinjila, narundula tsingubo tsitsie khulwe esibeela ma nakona mulukuukhi. Abarumikhili baabe abali nibaliho nibarandula tsingubo tsiabwe nabo khandi.

³²Nebutswa Yonadabu omusiani wa Shama, amwabo Daudi, nabool'la Daudi mbu, “Omwami wanje, siber're abasiani baabo bosi tawe. Amunoni yenyene niye ofwiye. Ibe omwene wakhaluutsi mbu Abisalomu yali namal'le okhukhalaka okhukhola yaka okhurula olwa Amunoni yali okhutiila omukhaana wabwe Tamari netsingufu ma naba n'naye.

³³Kho orasubila amang'ana ketsele khuibe mbu abasiani baabo bosi bafwiye tawe; Amunoni yenyene niye owir'rwe.”

³⁴Abisalomu naye yali okhwilukha. Ne omusikari owali nali khumulimo kwobulindi yalola omukanda kwabandu omukali nikwanichilanga esikulu khunjila erulanga Horonaimu. Yatsia khumuruchi ma namubool'la akayali naluutsi.

³⁵Yonadabu nabool'la Daudi mbu, “Yabo nabasiani baabo abetsanga singa obwa ndali nikhubooleye balakalukha.”

³⁶Niyakhamala okhuboola yaka, abasiani ba Daudi, benjila munzu, ma nibachaaka okhulakaya, ma Daudi nende abemeli baabe nibalakaya obululu.

³⁷Abisalomu yelukha natsia khu Talimai omusiani wa Amihudi, omuruchi wa Keshuru. Nebutswa Omuruchi Daudi yekhuula omusiani uwe buli litukhu.

³⁸Abisalomu namal'le okhwilukhila Keshuru yamenyayo khulwemihika chitaru.

³⁹Olwomuruchi yali niyayibiliye akokhufwa khwa Amunoni, yekomba okhulola omusianiwe Abisalomu.