Read lunyore 2 SAMWELI 14 Bible Online

2 SAMWELI 14 - lunyore bible

2 SAMWELI 14

¹Yoabu yamanya mbu omuruchi Daudi yali namahofu amenji okhulola Abisalomu.

²Kho Yoabu yarumania amang'ana mbu alanjilwe omukhasi omuchesi owamenyanga Tekoa. Olwomukhasi tsana yetsa, Yoabu yamubool'la mbu: “Wekaatie mbu oli muliekhuula ma webiikhe tsingubo tsiokhwekhuula ne orebakha amafura tawe. Wekhole singa omukhasi owabeye muliekhuula khulwo oluhono olurambi.

³Ma otsie khumuruchi omubool'le akanzia okhukhubool'la.” Ma Yoabu namubool'la akaakhoya okhuboola.

⁴Olwomukhasi okhurula Tekoa uyo yetsa khumuruchi, yenamia obwenibwe hasi ma nahaana oluyali naboola mbu, “Umbabine, Ibe omuruchi!”

⁵Omuruchi namureeba mbu, “Nisina esikhunyasianga?” Omukhasi namukalusia mbu, “Ise ndi omukhutsakhali; omusaatsa wanje wafwa.

⁶Ne ndali nabasiani babili. Litukhu elala basoolana nibali mumukunda, ne abulaho owakhababukhanisie. Kho mulala yarotsa oundi ma nafwa.

⁷Ne luno, omwami, abekho banje bosi bangalukhan'ne ne bambachianga okhubahelesia omusiani wanje awasikala mbu bamwire khulwokhwira amwabowe. Ne nibaba nibamwira, kho nasikale sila omusiani wosi. Betsa okhukosia obunaayi bwanje ma omusaatsa wanje abe sila omusiani owokhutsitsachisia olwibulo lulwe.”

⁸Ma omuruchi nabool'la omukhasi uyo mbu, “Kalukha munzu mwo, nase nzia okhulaka aketsa okhukholwa khulwe ibe.”

⁹Ne omukhasi wa Tekoa uyo nabool'la omuruchi mbu, “Omwami, liosi elia witsa okhukhola, esikha sibe khu ise nende khubeinyumba yanje; nebutswa ibe nende abeinyumba yoburuchi murabba nesikha tawe.”

¹⁰Omuruchi namubool'la mbu, “Omundu wosi naba nakhulaka ling'ana liokhuriisia, omuleere khu ise, ne salameeta okhukhunyasia khandi tawe.”

¹¹Omukhasi uyo naboola mbu, “Omwami, noyanza osaaye khu MWAMI Nyasayewo, mbu omwikho wanje oteemanga okhurunjia es'sialia khulwo okhufwa khwomusiani wanje, arakhola obubi obukali khulwo okhwira omusiani wanje osikaye tawe.”

¹²Khandi nameeta okhuboola mbu, “Omwami noyanza lekha mboola ling'ana elala lionyene.” Omuruchi namubool'la mbu, “Boola.”

¹³Ma omukhasi naboola mbu, “Nisina esichil'le nokhol'la abandu ba Nyasaye obubi singa yibu? Ibe sohuchiliye omusiani uwo mwene okhuchelela okhurula musibala esiayelukhilamwo tawe; ma khulwako welaamile omwene khulwe ling'ana eliomwene omal'le okhuboola.

¹⁴Ifwe fwesi nakhufwe; khufwana singa amaatsi akasundukhile hasi akaranyala okhuyoywa khandi tawe. Nebutswa Nyasaye siyeranga omundu tawe; musilenje yisio anyoolanga tsinjila etsianyala okhukalusisiamwo omundu owelukhila musibala sindi mbu aratsilil'la okhuba ehale okhurula khuye tawe.

¹⁵Kho luno, omwami esifune esichil'le ninzitsa okhul'loma n'nawe sili mbu abandu bali okhundaka amang'ana akokhuurisia, ma kho ndali okhuboola mumwoyo kwanje mbu nobulahi n'nome n'nawe nindi nobusubili mbu witsukhila nokhola akakhubool'la.

¹⁶Ndabeye okhuboola mumwoyo kwanje mbu ibe naumbulile, ma nausoole okhurula khumundu oteemanga okhunzira ise halala nomusiani wanje kho akhuhinie musibala esia Nyasaye yahelesia abandube.

¹⁷Omwami, ndabooye mumwoyo kwanje mbu, lisubisio lilio nalimbelesie omulembe sichila omuruchi afwanananga nende om'malaika wa Nyasaye, ne anyala okhwabukhania amang'ana amalahi nende amabi kosi. OMWAMI Nyasaye uwo abe halala n'nawe!”

¹⁸Omuruchi nakalusia omukhasi naboola mbu, “Orambisakhwo ling'ana liosi elia nzia okhukhureeba tawe.” Omukhasi naye naboola mbu, “Omwami reeba ling'ana liosi liosi.”

¹⁹Daudi namureeba, “Yoabu niye okhwinjisisie mwing'ana yili noho?” Omukhasi naye naboola, “Ndesuhanga khu Nyasaye khandi khuibe omwami mbu, obwatooto nimbwo buli. Mubwatooto, etswoni yiyo Yoabu niye owaimbooleye akokhukhola nende akaakhoya mboole.

²⁰Nebutswa yakhol'le mbwo khulwo khutinyilisia ling'ana yili. Omwami, ibe oli omuchesi singa om'malaika wa Nyasaye khandi ibe wamanya kosi akekholekhanga.”

²¹Olunyumakhwo omuruchi yabool'la Yoabu mbu, “Mbuchiliye okhukhola akawenyanga. Tsia wende omusiani wanje Abisalomu ma omuleera hano.”

²²Yoabu yakwa hasi imbeli womuruchi nahaana oluyali ma nasabila omuruchi ikhabi, naboola mbu, “Luno manyile mbu ibe oyanzisibwanga n'nase, sichila uhuchiliye okhukhola akobusabi bwanje.”

²³Kho Yoabu yasinjila natsia Keshuru, ma nakalusia Abisalomu Yerusalemu.

²⁴Kata mbwo, omuruchi yalaka mbu Abisalomu arakhamenyakhwo hango homuruchi tawe. Okhuba yaboola mbu, “Sinyenya okhumulolakhwo tawe.” Kho Abisalomu yamenya munzu yiye omwene ne siyalolekhakhwo imbeli womuruchi tawe.

²⁵Abulaho omundu wosi, mu Isiraeli owali niyamanyikha khulwe likondo lilahi singa Abisalomu tawe. Siyalikhwo nobulema bwosi okhurula khumurwe okhwola khubisisilo tawe.

²⁶Liswi lilie lialinji lirambi khandi elinji. Liswi tsana liali nobusiro obuyomba etsikilo tsibili okhuhelana nesichelo esiahuchil'lwa.

²⁷Abisalomu yali nabaana abasiani bataru nende omukhaana mulala owalangwa Tamari, owali owelikondo liokhuyanzisia okhusila.

²⁸Abisalomu yamenya Yerusalemu emihika chibili sila okhulolanakhwo nomuruchi.

²⁹Kho yarumania mbu, Yoabu alangwe mbu amurume khumuruchi; nebutswa Yoabu siyatsia tawe. Khandi narumania olwakhabili, ne Yoabu naye khandi nasuula okhutsia.

³⁰Kho Abisalomu nabool'la abarumikhilibe mbu, “Lole, omukunda kwa Yoabu kuli ahembi nende okwanje; ne kulimwo ingano esili okhucheswa. Mutsie okhuhambiamwo omul'lo.” Kho abarumikhili ba Abisalomu bahambia omul'lo muing'ano ya Yoabu.

³¹Ma Yoabu natsia munyumba ya Abisalomu namureeba mbu, “Nisina esichil'le abarumikhilibo nibahambia omul'lo muingano yanje?”

³²Abisalomu namukalusia mbu, “Sichila wasuuye okhwiitsa olwa ndakhulanjile. Ndayenyele unziile khumuruchi ma omureebe mbu, ‘Nisina esiachila nirula Keshuru okhwitsa hano? Bwakhabeye obulahi ndatsilil'la okhumenyayo.’ ” Ma Abisalomu nameeta okhuboola mbu, “Nyenyanga oloosie mbu ise nzie okhulolana nomuruchi ne nimba ninyoolekha nesikha, kho omuruchi yanzire.”

³³Kho Yoabu yatsia khumuruchi Daudi ma namubool'la aka Abisalomu yali nabooye. Omuruchi yalanga Abisalomu naye yatsia ahomuruchi yali nali ma niyenama imbeliwe. Omuruchi yamutsunzuuna ma namwinjisia.