Read lunyore 2 SAMWELI 16 Bible Online

2 SAMWELI 16 - lunyore bible

2 SAMWELI 16

¹Olwa Daudi yali natsiye hambelikhwo okhubira khubutenje bwesikulu, Siba omurumikhili wa Mefiboshetsi yabukaana n'naye. Siba tsana yali nali netsipunda tsibili etsiali nitsichinjile emihayila tsiemikaati tsimia tsibili nende ebisaka biemisabibu emiomu emia ndala nende amatunde amabisi emia ndala halala nesimuka nisitsuyemwo ewaini.

²Daudi yamala areebe Siba mbu, “Ebindu yibi biosi nobikhol'le sina?” Siba namukalusia mbu, “Etsipunda netsiabeinyumba yiyo omwami khulwo khwilukhilakhwo ne emikaati nende amatunde nakabandubo okhulia, ne ewaini nayo neyeyabo abachonyele musitsiimi.”

³Omuruchi Daudi namureeba mbu, “Mefiboshetsi omwitsukhulu wo Mwamiwo Saulo ali hena?” Siba namukalusia naboola mbu, “Amenyanga Yerusalemu; okhuba yaboola mbu, ‘Luno Abaisiraeli nabangalusisie obwami obwalinji obwakuka wanje Saulo.’ ”

⁴Omuruchi Daudi nabool'la Siba mbu, “Emianduchiosi echialinji echia Mefiboshetsi luno nechichio.” Siba naye naboola mbu, “Ise ndi omurumikhili uwo. Makano nyoolenje oluyali imbeliwo, omwami wanje.”

⁵Olwomuruchi Daudi yali niyol'le Bahurimu, mulala khubekho ba Saulo oweliira mbu Shimei omusiani wa Kera, yetsa okhumwakan'na. Ne olwa yali niyetsanga, yalaka Daudi esilaamo siobubi.

⁶Shimei yachaaka okhulasa Daudi nende abemelibe amachina, kata olwa Daudi yali nafumbiywe nabasikaribe nende abalindibe.

⁷Shimei yamulaka esilaamo siobubi namubool'la mbu, “Rula hano! Rula hano, ibe omwiri, ibe esihingwa!

⁸Wanuula Saulo obwami, ne luno OMWAMI akhuhelesianga esinyasio khulwokhwira abeinyumba ya Saulo abenji. OMWAMI uhan'ne obwami khumusianiwo Abisalomu, ne nawe oli musibi, omwiri ibe!”

⁹Abisai, owa nyinawe yalangwanga Seluya nabool'la Daudi mbu, “Omwami; nisina esichilanga nolekha imbwa y'yi okhukhulaka esilaamo siobubi? Umbuchil'le nzie ahali ma khalake omurwe kukwe!”

¹⁰Omuruchi Daudi nabool'la Abisai nende amwabowe Yoabu mbu, “Yaka sikali akenywe tawe. Naba niyandakanga esilaamo siobubi sichila OMWAMI umubooleye akhole mbwo, niwina oli nomunwa kwokhumureeba esichilanga nakhola mbwo?”

¹¹Ma Daudi nabool'la Abisai nende abemelibe mbu, “Omusiani wanje mwene yenyanga okhunzira; esiakhachila muchenye khuko Mubenjameni uyu nisina? OMWAMI amubooleye yandake esilaamo siobubi, kho mulekhele obweyangu akhole mbwo.

¹²Haundi OMWAMI alahenga khukhusalila khwanje ma yanaamile tsikhabi khulwesilaamo esiandachilwe olwaleelo yisi.”

¹³Kho Daudi halala nabasikaribe batsilil'la noluchendo lwabwe olwa Shimei naye yabalonda nachendelanga khundulo khwesikulu ne nabalaka esilaamo siobubi khandi nabalasa amachina ne naboohela olukuukhi olwa yali natsitsanga.

¹⁴Omuruchi halala nabasikaribe bosi bali nibachonyele olwa boola Yorodani, ne habwene yaho bahuluukha.

¹⁵Abisalomu halala na Baisiraeli bosi benjila Yerusalemu, ne Ahitsofeli yali n'nabo.

¹⁶Olwa Hushai, omulina wa Daudi omusubilwa yabukaana nende Abisalomu, yahanzuukha naboola mbu, “Ohindile oluhono ibe omuruchi! Ohindile oluhono ibe omuruchi!”

¹⁷Abisalomu namureeba mbu, “Nisina esiekholekhele khubusubilwabwo khumulinawo Daudi? Nisina esichil'le noratsia n'naye?”

¹⁸Hushai namukalusia naboola mbu, “Kakhanyalikha mbwena ise mbe owa Daudi? Ise ndi khulubeka olwe uyo omal'le okhwahulwa na Nyasaye, khandi nabandu yaba, halala na Baisiraeli bosi. Nambe n'nawe.

¹⁹Kata mbwo niwina owaakhoya okhurumikhila narali omwana womwami wanje? Singa obwa ndarumikhila papawo nimbwo nakhurumikhile ibe.”

²⁰Ma Abisalomu nasukhana aha Ahitsofeli yali ma namubool'la, “Kho olwa khuli hano, wakhakhuchetsiyia nang'ana sina?”

²¹Ahitsofeli nabool'la Abisalomu mbu, “Otsie okhuheya nabakhasi abamenyibwa ba papawo, aba yalekhele okhulinda hango hoburuchi. Ma nilwo olwabandu bosi mu Isiraeli balamanya mbu papawo akhulolanga ibe singa omusukuwe, ne abalondi baabo balakufuhala okhusila.”

²²Kho balombela Abisalomu liheema khus'suli sieinyumba yomuruchi, ma Abisalomu natsia okhuheya nabakhasi basamwana olwabandu bosi bali nibareyekhwo imoni.

²³Lichetsiyio liosi elia Ahitsofeli yahaananga mumatukhu yako liahuchil'lwanga ol'la singa liakhabeye ling'ana lia Nyasaye; Daudi nende Abisalomu bombi balilondanga.