Read lunyore 2 SAMWELI 17 Bible Online

2 SAMWELI 17 - lunyore bible

2 SAMWELI 17

¹Khandi Ahitsofeli nabool'la Abisalomu mbu, “Lekha nzele abasaatsa etsielefu likhumi natsibili, ma butukhu bwolwaleelo, nzia okhuchiaka khulondel'la Daudi.

²Nzitsa okhumuseera nachonyele khandi amakani kaake nikesikokele. Namutechesie nebirisio ebikali ma abandu baabe bosi nabelukhe. Ise nanzire omuruchi yenyene

³ma nangalusie abandu baabe bosi khuibe singa omweha akalukhanga khumusaatsa uwe. Ibe wenyanga okhwirwa khwomundu mulala khulachila abandu bandi bosi bakalukhe. Abandi bosi sibalasalisibwa tawe.”

⁴Lino lialolekha singa lichetsiyio lilahi eliahanwa khu Abisalomu nende abemeli bosi ba Isiraeli.

⁵Abisalomu naboola mbu, “Luno langa Hushai ma khuhul'le akayetsa okhuboola.”

⁶Olwa Hushai yoola, Abisalomu yamubool'la mbu, “Lino nilio lichetsiyio lia Ahitsofeli yali okhukhuhelesia; mbu khulilonde noho? Nikarali mbwo khe ibe okhubool'le esiakhukhola.”

⁷Hushai nakalusia naboola mbu, “Lichetsiyio lia Ahitsofeli akhuheye yili sil'li lilahi tawe.

⁸Ibe wamanya mbu papa uwo Daudi halala nabandu baabe nabalwani abatinyu khandi nabalulu singa eliaka likhasi elinul'lwe abaana balio. Papa uwo nomusikari owamanya obulwani ne siyekhalanga nabandu baabe butukhu tawe.

⁹Haundi inyinga ino webisile mulwanga nohomba habundu handi hosi. Olwa Daudi yetsa okhuseera abandu baabo, uyo wosi owakhahul'lakhwo naboole mbu abandu baabo balekelwe.

¹⁰Ma abasikari baabo abalulu okhusila, abalula singa etsisimba, betsa okhuba abari sichila buli mundu wosi mu Isiraeli wamanya mbu papa uwo nomusikari wetsingufu ne abasikari baabe nabalwani abatinyu.

¹¹Lichetsiyio lianje lili mbu oleere Abaisiraeli bosi halala okhurula elubeka l'lala lwesibala okhwola elubeka undi, baabe abenji singa omuyekhe okuli khundulo weinyanza ma ibe omwene obemel'le okhulwana lihe.

¹²Nakhunyoole Daudi aha nabe nali ma khumuseere nasili okhumanyilisia esiekholekhanga. Ye omwene nohomba abandu baabe abulakhwoho owanohonokokhe kata mulala tawe.

¹³Niyakhelukhila mwitookho, abandu befwe nabaleere emikoye ma nabakhwese litookho okhukwa mwibanda elili isi walio. Lichina sinalisikalekhwo khubutenje bwokhusikulu kata elala tawe.”

¹⁴Abisalomu nende Abaisiraeli nibaboola mbu, “Lichetsiyio lia Hushai nelilahi okhuyomba elia Ahitsofeli.” OMWAMI yali okhukhalaka mbu lichetsiyio lia Ahitsofeli lilahi liralondwa tawe kho esibi sikwile Abisalomu.

¹⁵Ma Hushai nabool'la abesaalisi Sadoku nende Abiatsari obwa yali nabooleye Abisalomu halala nabemeli ba Isiraeli nende obwa Ahitsofeli yali namuchetsiyisie.

¹⁶Hushai nameeta okhuboola mbu, “Tsie bwangu luno! Rumanie amang'ana khu Daudi mbu arakona habwambukhilo bwomuchela okuli musitsiimi tawe, nebutswa bambukhe omuchela kwa Yorodani bwangu, kho ye nende abandu baabe babule okhufumilwa ma berwe.”

¹⁷Yonatsani, omusiani wa Abiatsari nende Ahimasi omusiani wa Sadoku bali nibalindil'langa hasitaho sia Enirogeli, esili khundulo khwa Yerusalemu sichila sibayenya balolekhe nibenjilanga mwitookho tawe. Omukhaana omurumikhili yatsitsangaho buli khase okhubabool'la akali nikekholekhanga ne nabo nibatsia okhubool'la Daudi.

¹⁸Nebutswa litukhu lindi omwana omusiani yabalola ne natsia okhubool'la Abisalomu; kho batsia bwangu Bahurimu okhwebisa munyumba yomundu nalebe. Yali nesitaho siamaatsi akayabwa ahembi neinyumba yiye omwa batahangamwo amaatsi.

¹⁹Omukhasi womusaatsa uyo nabukula esindu siokhufuunikha, nafuunikha ikulu wobuko bwamaatsi yibwo ma nasasiakhwo obuswache ikulu kho omundu alekhe okhulola esili mukari.

²⁰Abakhongo ba Abisalomu betsa khunyumba yomukhasi uyo; ma nibamureeba mbu, “Ahimasi nende Yonatsani bali hena?” Omukhasi uyo nakalusia, “Baali okhwambukha omuchela.” Abemeli ba Abisalomu bali okhubakhaba nebutswa sibabanyoola tawe ma nibakalukha Yerusalemu.

²¹Olwabandu yabo bali nibatsiye, Ahimasi nende Yonatsani barula mwiyabo yilio ma nibatsia okhumanyia Daudi akali nikekholekhele. Bamubool'la aka Ahitsofeli yali naloosisie kakholwe khu Daudi ma nibaboola mbu, “Khole bwangu mwambukhe omuchela.”

²²Kho Daudi nende abandu baabe nibachaaka okhwambukha Yorodani ma mumabwebwe bali nibakhambukha bosi.

²³Olwa Ahitsofeli yalola mbu lichetsiyio lilie sililondwe tawe, yaniina khupunda yiye ma nakalukha mwitookho elieingo wabwe. Niyakhamala okhuloosia amang'ana kaake kosi, yamala niyesunga. Yamala nayabilwa musilindwa siabandu beinzu yiye.

²⁴Daudi yali niyol'le mwitaala lia Mahanaimu olwa Abisalomu nende Abaisiraeli bali nibakhambukha Yorodani.

²⁵(Abisalomu yali niyel'le Amasa okhwemel'la abasikari baabe mubukono bwa Yoabu. Amasa yali omusiani wa Yetseri Omuishimaeli; mama uwe yali Abigaeli omukhaana wa Nahashi khandi omukhaana wanga nyina Yoabu olanga Seluya)

²⁶Abisalomu halala nabandu baabe bakhupa ekambi yabwe musibala sia Gileadi.

²⁷Olwa Daudi yoola Mahanaimu, yabukan'nwa nende Shopi omusiani wa Nahashi okhurula mwitookho lia Rabba mu Amoni, halala nende Makiri omusiani wa Amieli okhurula Lodebari halala nende Barisilai okhurula Rogelimu mu Gileadi.

²⁸Nabo baleera etsipakuuli, tsindabu, ebitanda nende ebiokhulia bino mbu: ingano, eshairi, obusie, obuswache obukhalange, amakanda, tsimindi,

²⁹obuukhi, amafura kesamuli, esiaki siokhumabeele nende Amakondi. Babihaana khu Daudi nabandube mbu balie sichila bali okhumanya mbu Daudi nabandu baabe betsa okhuba nibali neinzala, nobuluho, nende okhuchonya nibali musitsiimi.