Read lunyore 2 SAMWELI 19 Bible Online

2 SAMWELI 19 - lunyore bible

2 SAMWELI 19

¹Yoabu yabool'lwa mbu Omuruchi Daudi alakayanga niyekhuula Abisalomu.

²Kho obusangali bwobulechi bwakalukhanibwa okhuba esibeela khubasikari ba Daudi litukhu yilio sichila bahul'la mbu omuruchi yekhuulanga omusiani uwe.

³Bakalukha mwitookho kalaha nibabun'ne tsi singa abasikari abali nes'simba murwe olwa belukhanga okhurula mubulwani.

⁴Omuruchi yefuunikha m'moni ma nalakaya butinyu naboola mbu, “E, mwana wanje koo! Omusiani wanje Abisalomu! Abisalomu omusiani wanje! Abisalomu omusiani wanje!”

⁵Yoabu yenjila munyumba yomuruchi ma namubool'la mbu, “Olwaleelo usimbisie abasikari baabo omurwe, yabo baali okhuhonia obulamu bubwo halala nobulamu bwabasiani baabo nende abakhaana baabo nende abakhasi baabo halala nabakhasi baabo abawamenyia.

⁶Obafukulanga yabo abakhuyanza ne ohambananga nende abandu abakhusuula! Umal'le okhumanyia habulafu khubemeli baabo nende abasikari baabo mbu sibali esindu imbeli uwo tawe. Ndolanga mbu ibe wakhasangal'le nikakhabeye mbu Abisalomu yakhabeye mwoyo luno nefwe fwesi khulaba nikhufwiye.

⁷Tsia luno ma otinyilisie abasikari baabo. Ndesuhanga khu Nyasaye mulala mbu norakhatsia okhubalemia emioyo, sialikhwoho kata mulala khubo owa nobe khuibe mubulamu bubwo bwosi tawe.”

⁸Omuruchi nasinjila ma natsia okhwikhala ahembi nesilibwa sielitookho. Abasikari baabe olwa bahul'la mbu omuruchi ali ahembi khusilibwa sielitookho, bosi batsia akhwebunjikha aha yali. Abaisiraeli bosi bali nibelukhile buli mundu okhutsia ingo uwe.

⁹Habundu hosi musibala abandu bachiaka okhusolana abene khubene nibabool'lana mbu, “Omuruchi Daudi yali okhukhuhonokosia okhurula khubasuku. Yali okhukhusoola okhurula khu Bafilisiti ne luno wilukhile okhurula khu Abisalomu khandi wilukhile okhurula musibala.

¹⁰Khwali okhubakha Abisalomu amafura khulwo khuba omuruchi wefwe, nebutswa umal'le okhwir'rwa mwihe. Kho busina omundu wosi arateema okhukalusia omuruchi Daudi hano?”

¹¹Amang'ana ka Abaisiraeli bali nibaboolanga kamwol'la omuruchi Daudi. Kho Daudi naruma abesaalisi Sadoku nende Abiatsari okhureeba abemeli ba Yuda mbu, “Busina inywe mube abokhumalilikha okhukhonya omuruchi okhukalukha khundebe yoburuchi?

¹²Inywe muli abekho banje, abe likumba lianje khandi abamatsahi kanje; busina mube abokhumalilikha okhungalusia khundebe yoburuchi?”

¹³Khandi mubool'le Amasa mbu, “Ibe oli omwikho wanje. Okhurula luno khuretsanga okhuba omwemeli wabasikari mubukono bwa Yoabu. Nyasaye yanzire nikarakhaba mbwo!”

¹⁴Amang'ana ka Daudi yaboola kakhola abandu ba Yuda bosi okhumuhuchil'la ma nibaruma ling'ana khuye mbu akalukhe nende abakhulundu baabe bosi.

¹⁵Olwomuruchi yali nakalukhanga yabukan'nwa nende abasaatsa ba Yuda khumuchela kwa Yorodani abali nibetsele Kilikali khulwo okhumukooba okhwambukha omuchela.

¹⁶Ne Shimei omusiani wa Kera owomulwibulo lwa Benjameni okhurula Bahurimu yahuchila okhutsia khumuchela kwa Yorodani okhubukan'na omuruchi Daudi.

¹⁷Yali nabasikari elefu ndala okhurula mulwibulo lwa Benjameni. Khandi Siba, omurumikhili wabeinyumba ya Saulo, yetsa nabasiani baabe likhumi na barano nende abarumikhili amakhumi kabili ma niboola khumuchela kwa Yorodani omuruchi nasili okhwolayo.

¹⁸Bambukha omuchela khulwo okhukooba omukanda kwomuruchi nende khulwo okhukhola kosi akomuruchi aba niyenyele. Olwomuruchi yali niyerechekhelanga okhwambukha omuchela, Shimei yetsa nakhupa amasikamo imbeli uwe,

¹⁹ma naboola mbu, “Omwami wanje, noyanza wibil'le akobubi bwanje obwa ndakhola litukhu elia warul'la Yerusalemu. Orambikhila lileko tawe kata orapaala khulio khandi tawe.

²⁰Omwami, manyile mbu ndayona, ma niko akachil'le nimba omundu wokhuranga okhurula khutsinzibulo tsiesinyolu okhwitsa okhubukaana n'nawe olwaleelo, E Omwami.”

²¹Abisai omusiani wa Seluya naboola mbu: “Shimei akhoyele okhwirwa sichila yali okhunyeka uyo owo MWAMI yela okhuba omuruchi.”

²²Nebutswa Daudi nabool'la Abisai nende omusiani wabwe Yoabu mbu; “Niwina omurebeele okhul'loma khwing'ana yili? Inywe mwenyanga okhumbelesia amanyakhano? Ise nise omuruchi wa Isiraeli luno, ne abulaho Omuisiraeli wosi owitsa okhwirwa olwaleelo.”

²³Ne nabool'la Shimei mbu, “Khubool'langa mbu ibe siwitsa okhwirwa tawe.”

²⁴Ma Mefiboshetsi, omwitsukhulu wa Saulo, nakongoma okhutsia okhwakaana nomuruchi. Mefiboshetsi siyaali niyasaabakhwo ebilenje bibie tawe kata siyaali niyabekakhwo tsindefu tsitsie nohomba okhusaabakhwo tsingubo tsitsie okhurula olwomuruchi yarula Yerusalemu okhwola olwa yakalukha nobulechi tawe.

²⁵Olwa Mefiboshetsi yoola okhurula Yerusalemu khulwo khubukaana nomuruchi, omuruchi yamubool'la mbu, “Mefiboshetsi, ibe siwali khutsia n'nase tawe. Nisina esiachila?”

²⁶Mefiboshetsi nakalusia naboola mbu, “Singa ibe omanyile, Omwami, ise ndi omulema. Ndabool'la omurumikhili wanje yarechekhele epunda kho mbe onyala okhutsia halala n'nawe nebutswa yali okhungaata ma natsia.

²⁷Yali okhukhubool'la akobubehi khu ise, omwami, nebutswa ibe ofwana singa om'malaika wa Nyasaye, khe ibe okhole akololanga namalahi.

²⁸Ibe wali nokwan'ne okwira abeinyumba ya papa wanje bosi nebutswa ibe wambuchil'la okhulia ebiakhulia khumesa yiyo. Ise sindi kololi okhureebakhwo obukhonyi okhurula khu ibe omuruchi tawe.”

²⁹Omuruchi Daudi nakalusia mbu, “Ibe siotakha okhumeeta ohuboola akandi tawe. Mal'le okhukhalaka mbu ibe nende Siba namukabane emiandu chia Saulo.”

³⁰Mefiboshetsi nakalusia naboola mbu, “Lekha Siba abukule chiosi. Ise ndi bulahi sichila omuruchi ukalukhile hango nomulembe.”

³¹Barisilai okhurula Gileadi naye yali niyetsele okhurula Rogelimu khulwo ohukooa omuruchi okhwambukha Yorodani.

³²Barisilai yali omundu mukhulundu okhusila owe mihika amakhumi munane. Barisilai yali omundu omuhinda okhusila ma yali okhuhelesia omuruchi ebiokhulia olwa yali namenyanga Mahanaimu.

³³Ma omuruchi nabool'la Barisilai mbu, “Yitsa khutsie n'nawe Yerusalemu ne nakhulinde khulwo okhukhuhelesia ebiokhulia.”

³⁴Nebutswa Barisilai nakalusia omuruchi naboola mbu, “Ise sisili namatukhu amenji akokhumenya tawe omwami, busina nzie n'nawe Yerusalemu?

³⁵Ise luno ndi nemihika amakhumi munane ne sibulaho luno esisangasianga tawe. Sindi onyala okhumanyilisia esinosi siebindu ebianditsanga noho ebianywetsanga tawe. Kata sinyala okhwabukhania emioyo chiabembi tawe. Ise nzia okhukhusitohela butswa ibe omwami!

³⁶Sikhoyele okhunyoola esihanwa esikali yisi okhurula khu ibe tawe. Kho nzia okhukhukooba butswa hatu okhwambukha Yorodani.

³⁷Ma olekhe ngalukhe ingo okhufwila hasilindwa siabebuli banje. Omusiani wanje Kimuhamu, ngwoyu, owanokhurumikhilenje, tsia n'naye, omwami, ma omukhol'le kosi akopaalanga kakhaba amalahi.”

³⁸Omuruchi namukalusia naboola mbu, “Ise nzia okhutsia n'naye ma mukhol'le kosi akawakhenya. Ne nzia khumukhol'la esindu siosi esiawakhareeba akhol'lwe.”

³⁹Ma Daudi nabandu baabe bosi nibambukha Yorodani. Yamutsunzuuna Barisilai ma namulaamila tsikhabi, ma Barisilai nakalukha ingo uwe.

⁴⁰Olwomuruchi yambukha okhutsia Kilikali, yali nakoobelwe nende abasikari bosi aba Yuda nende enusu ya basikari ba Isiraeli, ne yali halala nende Kimuhamu.

⁴¹Ma Abaisiraeli bosi nibatsia khumuruchi nibamureeba mbu, “Omwami Esiachila abahefwe, abasikari ba Yuda nibapaala mbu nibo abakhoyele okhukhuhinia hano nende okhukhukooba ibe, nabeinzu yiyo nende abasikari baabo okhwambukha Yorodani nisina?”

⁴²Abandu ba Yuda nibakalusia nibaboola mbu, “Khwakhola mbwo sichila omuruchi nowolwibulo lwefwe. Kho busina yaka kamukhole okhuba nelirima? Siakhurungiye ebiakhulia biefwe nohomba kata siakhuhelesisie esindu siosi tawe.”

⁴³Abaisiraeli nibakalusia nibaboola mbu, “Khuli abanyala okhuboola ali likhumi mbu omuruchi Daudi nowefwe singa obwe inywe munyala okhuboola, kata nali owolwibulo lwenywe. Busina mukhuchayanga? Murebil'la mbu nifwe abali abokhuranga okhuboola mbu khwenyanga omuruchi akalukhe!” Nebutswa abandu ba Yuda bali nelirima likali mukhuboola khwabwe okhuyomba abandu ba Isiraeli.