Read lunyore 2 SAMWELI 2 Bible Online

2 SAMWELI 2 - lunyore bible

2 SAMWELI 2

¹Inyuma weyaka Daudi yareeba OMWAMI mbu, “Mbula nzie okhwamiha elala khumataala ka Yuda noho?” OMWAMI namukalusia mbu, “Tsia.” Daudi naye namureeba mbu, “Nzie okhwamiha elili hena?” OMWAMI namukalusia mbu “Tsia Heburoni.”

²Kho Daudi yatsia Heburoni halala nabakhasibe babili mbu: Ahinoamu, okhurula Yesereli, nende Abigaeli, omukhasi sika Nabali, okhurula Karimeli.

³Khandi yatsia halala nabasikaribe nende abakhasi babwe nabaana babwe, ma nibamenya mumataala akali ahembi Heburoni.

⁴Ma abandu ba Yuda nibeetsa Heburoni okhubakha Daudi amafura kokhumwemekha okhuba omuruchi wa Yuda. Olwa Daudi yahulila mbu abandu ba Yabeshi elili mu Gileadi bali nibayabiye Saulo,

⁵yabarumila abarume naboola mbu: “OMWAMI amulaamile tsikhabi khulwo khumanyia oluyali lwenywe khumuruchi wenywe khulwo okhumuyabila.

⁶Ne luno OMWAMI amukhol'le obulahi ma abe omusubilwa khwinywe. Khandi nase namukhol'le obulahi khukamukhol'le.

⁷Mutinye khandi mwome ikholo! Omuruchi wenywe Saulo umal'le okhufwa, ne abandu ba Yuda bamal'le okhumbakha amafura mbu mbe omuruchi wabwe.”

⁸Etswoni yabasikari ba Saulo oweliira mbu Abineri omusiani wa Neri, yali niyelukhile nomusiani wa Saulo olangwanga Ishiboshetsi ma natsia n'naye Mahanaimu elili injelekha wa Yorodani.

⁹Ebwene y'yo Abineri yemekha Ishiboshetsi okhuba omuruchi wetsingongo tsia Gileadi, Asheri[2], Yesereli, Efuraimu, nende Benjameni, ma nende Isiraeli yosi.

¹⁰Yali nemihika amakhumi kane olwa yachaaka okhwamiha Isiraeli, ne yamiha emihika chibili. Nebutswa abolwibulo lwa Yuda bahelesia Daudi oluyali,

¹¹ma Daudi niyamiha Yuda namenyele Heburoni khulwemihika chine nachitaru nende enusu.

¹²Abineri nende abemeli ba Ishiboshetsi barula Mahanaimu nibatsia mwitookho lia Gibeoni.

¹³Yoabu, owa nyinawe yalangwa mbu Seruya, nende abemeli ba Daudi bandi bakaana n'nabo hetubango, aha bekhala hasi bosi, mbu omukanda mulala nikuba khulubeka l'lala ne okundi khulubeka lundi.

¹⁴Abineri nabool'la Yoabu mbu, “Chenda khwahule abalala khu babuukha okhurula khutsibeka tsiombi balwane imbeli wefwe.” Yoabu nakalusia mbu “Kali habwene.”

¹⁵Kho abasikari likhumi nababili abakobokhela Ishiboshetsi nende abolwibulo lwa Benjameni balwana nende abasikari ba Daudi likhumi nababili.

¹⁶Siamulala khubasikari yabo yatiila omurwe kwowasie ma nibafumirana tsinganga mutsimbafu; kho bosi bakwa hasi ma nibafwila khulala. Ma niko akachila habundu yaho mu Gibeoni nihalangwa mbu, “Esikuri sie Tsinganga.”

¹⁷Ma nilwo olwo obulwani obululu bwabuukha hakari wabwe, ne abandu ba Daudi baleka abandu ba Abineri nende Abaisiraeli.

¹⁸Abasiani ba Seruya bataru bano baliho, mbu: Yoabu, Abisai nende Asaheli. Asaheli, owelukhanga tsimbilo singa eswara

¹⁹yalondel'la Abineri ma namurakhwo yaha ne yaha sila okhwesebukha.

²⁰Abineri nahenga inyuma ma nareeba mbu, “Asaheli khane niwe ounondel'langa?” Asaheli nakalusia mbu, “Yee nise.”

²¹Abineri namubool'la mbu, “Lekha okhunondel'la. Olondel'le mulala khubasikari ma omunuule esiali n'nasio.” Nebutswa Asaheli yatsilil'la butswa okhumulondel'la.

²²Khandi Abineri nameeta okhumubool'la mbu, “Lekha okhunondel'la! Esiakhachila umbakie okhukhwiira nisina? Ndakhafwana mbwena imbeli womusiani wenywe Yoabu?”

²³Nebutswa Asaheli siyamulekha tawe; kho Abineri yamulasa inyuma nelifumolie ma nilifutula mundamwe nilirul'la emukongo. Asaheli yakwa hasi ma nafwa ne siamulala owetsa habundu yaho aha Saheli yali nakwiye yasinjilaho.

²⁴Nebutswa Yoabu nende Abisai nibachaaka okhulondel'la Abineri, ne khumukolooba kwelitukhu yilio boola khusikulu sia Ama, esili ebukwe wa Giya khumuhanda okuhengele musitsiimi sia Gibeoni.

²⁵Abasikari okhurula mulwibulo lwa Benjameni bebunjikha nibafumbila Abineri hakari khandi ma nibasinjila khubutenje bwesikulu sindi.

²⁶Abineri nalanga Yoabu naboola mbu, “Khulatsilil'la okhulwana lihe inziayo noho? Siwakhalolakhwo mbu mukhumalila nakhubeho butswa nobululu bwonyene tawe? Khuli abamwabo mwihanga elala. Nilina olwa nokaye abasikaribo okhukhulondel'la?”

²⁷Yoabu namukalusia naboola mbu, “Khu Nyasaye mulala, ndesuhanga mbu olaba noral'lomele, khane abasikari banje bakhatsililiye okhukhulondel'la okhwola olwa bwakhasieye mukamba.”

²⁸Nilwo olwa Yoabu yakhupa olwika okhukaya abandube mbu balekhe okhulondel'la Abaisiraeli; kho obulwani bwasinjila.

²⁹Abineri nabasikaribe babir'ra mwibanda lia Yorodani khubilenje obutukhu yibwo bwosi; bakhalania omuchela kwa Yorodani, ne inyuma wokhuchenda khubilenje omukamba kwalondakhwo, boola Mahanaimu khandi.

³⁰Olwa Yoabu yalekha okhubalondel'la yabunjikha abasikaribe halala ma nanyoola mbu abandu likhumi nabarano nabane khubo halala nende Asaheli sibaali mumukanda tawe.

³¹Abasikari ba Daudi bali nibeer'ra abasikari ba Abineri okhurula mulwibulo lwa Benjameni tsimia tsitaru namakhumi kasasaba.

³²Yoabu nende abasikaribe babukula omulambo kwa Asaheli ma nibakuyabila musilindwa sieinyumba yabwe mu Betselehemu. Ma nibachenda khubilenje obutukhu bwosi, ne mumabwebwe, bachelela Heburoni khandi.