Read lunyore 2 SAMWELI 20 Bible Online

2 SAMWELI 20 - lunyore bible

2 SAMWELI 20

¹Yaliho omundu mu Kilikali owe ifwo imbi owalangwa Sheba omusiani wa Bikiri mulwibulo lwa Benjameni. Yakhupa olwika ma nalanjisia naboola mbu, “Khusuuye Daudi! Sikhulalonda omusiani wa Yese tawe! Abandu ba Isiraeli bosi batsie ingo!”

²Kho Abaisiraeli bamwilukha Daudi nibalonda Sheba, nebutswa abasaatsa ba Yuda bahuchil'la Daudi ma nibamulonda okhurula Yorodani okhwola Yerusalemu.

³Olwa Daudi yoola Yerusalemu, yabukula abakhasi baabe ababiikha likhumi abayali okhulekha bamulind'e inyumba yiye, ma nabara hasi homulindi. Yali okhubahelesia ebiabatakhanga nebutswa siyabakhwo n'nabo tawe. Bali okhubiikhwa habundu ahabaranyala okhuchendakhwo mubulamu bwabwe bwosi tawe, khandi bamenyanga singa abakhasi balekhwa.

⁴Omuruchi nabool'la Amaasa mbu, “Tsia olange abasaatsa bosi ba Yuda betse halala ma witse n'nabo hano litukhu lilonda mukamba.”

⁵Amasa yatsia okhulanga abasaatsa yabo ne siyali onyala okhukalukha litukhu liomuruchi yali namubooleye tawe.

⁶Kho omuruchi nabool'la Abisai mbu, “Sheba nakhuhelesie omunyakhano omukali okhuyomba Abisalomu. Bukula abasikari banje yaba ma omulondel'le ne norakhola mbwo, yetsa okhwebisa mwitaala eliasirwa ma ahonokokhe okhurula khu ifwe.”

⁷Kho abasikari ba Yoabu, abalindanga omuruchi halala nabasikari bandi barula Yerusalemu nibemeleywe nende Abisai khulwo okhulondel'la Sheba.

⁸Olwa boola khulwanda olukali oluli Gibeoni, Amasa yabukana n'nabo. Yoabu yali niyebohele ebilasan'nwe, nali nolukanga muluhola ndubohelwe khulukhoba lulwe. Olwa yesunda hambeli olukanga lwakwa hasi.

⁹Yoabu nabool'la Amasa mbu, “Oli mbwena omulina wanje?” Ma natila khutsindefu tsitsie nomukhono musaatsa khulwo khumutsunzuna.

¹⁰Amasa siali nahenjelesianga olukanga lwa Yoabu yali natil'le m'mukhono kundi tawe ma Yoabu namufumira munda mumwe ma ebiomunda biosi nibirula nibikwa hasi. Yafwa butswa bwangu, kho Yoabu siyali onyala okhumufumira khandi tawe. Ma Yoabu nende Abisai omusiani wabwe nibatsilil'la okhulondel'la Sheba.

¹¹Mulala khubasikari ba Yoabu yasinjila hamubili kwa Amasa ma nalanjisia naboola mbu, “Omundu wosi oli khulubeka lwa Yoabu nende Daudi alonde Yoabu.”

¹²Omubili kwa Amasa kwali nikwitsuyekhwo amatsahi nikuli mumuhanda hakari. Omusikari wa Yoabu yalola mbu buli mundu yali nasinjilanga homubili kwali, kho yakhwesa omubili tsana okhurula khumuhanda okhukura mumukunda ma nakufunikhakhwo lipalangeti.

¹³Omubili nikumal'le okhuhiinibwa khumuhanda, buli mundu yalonda Yoabu khulwo khulondel'la Sheba.

¹⁴Sheba yabir'ra musibala siabandu betsinzibulo tsia Isiraeli tsiosi ma niyoola khwitookho lia Abeli Betsi Maaka. Abandu bosi be inzu ya Bikiri bebunjikha ma nibamulonda okhwola mwitookho yimwo.

¹⁵Abasikari ba Yoabu bahul'la mbu Sheba ali mwitookho yilio, kho batsia nibafumbila litookho yilio. Bombokha ebifuumi biamatohi esioba welisisi ma nibachaaka okhuyaba isi walio okhulikoka hasi.

¹⁶Yaliho omukhasi omuchesi mwitookho yilio owahanzukha okhurula mukari naboola mbu, “Hulile! Hulile! Bool'le Yoabu yetse hano; nyenyanga n'nome n'naye.”

¹⁷Yoabu yamala natsia, ne omukhasi uyo namureeba mbu, “Niwe Yoabu?” Yoabu namukalusia mbu, “Nise.” Omukhasi uyo namubool'la mbu, “Hul'la akamboolanga omwami.” Naye nakalusia mbu, “Mbulilanga.”

¹⁸Omukhasi uyo naboola mbu, “Amatukhu kakhale abandu baboolanga mbu, ‘Tsia onyoole likalusio mwitookho lia Abeli’; ne nimbwo bakholanga.

¹⁹Litookho liefwe lino nelikhongo, khandi nelala khumatookho kali nomulembe okhusila khandi akahuchil'la okhuba hasi wobulindi bwa Isiraeli. Busina ibe wenyanga okhulisasia? Ibe wenyanga okhwononia esili esio MWAMI?”

²⁰Yoabu nakalusia naboola mbu, “Tawe! Ise sindakhononia nohomba okhusasia litookho lienywe tawe!

²¹Yako sikali mubuloosie bwefwe tawe. Omusaatsa olangwa Sheba omusiani wa Bikiri, orulanga musibala siemubikulu sia Efuraimu, yali khuchiaka indiri khumuruchi Daudi. Haana omundu mulala uyu khu ise ne nzia okhurula mwitookho yimu.” Omukhasi uyo naboola mbu,

²²“Khwitsa okhufuuba omurwe kwomundu uyo esioba welisisi.” Kho omukhasi uyo natsia khubandu bomwitookho nende obuloosie bubwe, ma nibakhalaka omurwe kwa Sheba ma nibakufuuba esioba welisisi khu Yoabu. Yoabu yakhupa olwika singa esimanyilo mbu abandu baabe barule mwitookho yimwo, ma nibakalukha ingo. Yoabu yakalukha Yerusalemu khumuruchi.

²³Yoabu niye owali etswoni ya basikari ba Isiraeli; Benaya omusiani wa Yehoyada yali omwemeli wabasikari balindanga Daudi;

²⁴Adoniramu yasinjil'la emilimo echiatiywanga khulwo okhuhachibwa; Yehoshafati omusiani wa Ahiludi niye owalindanga amang'ana akahandikwa.

²⁵Shewa yali omuhandichi wemise; Sadoku nende Abiatsari bali abesaalisi,

²⁶ne Ira okhurula mwitaala lia Yairi yali mulala khubesaalisi ba Daudi.