Read lunyore 2 SAMWELI 21 Bible Online

2 SAMWELI 21 - lunyore bible

2 SAMWELI 21

¹Mumatukhu koburuchi bwa Daudi khwali neinzala indulu khulwemihika chitaru. Kho Daudi yamala nareeba OMWAMI esichilanga inzala neliho, ne OMWAMI namubool'la mbu, “Saulo nende abeinzu yiye bali nesikha siobwiri; yali okhwira abandu ba Kibeoni.”

²Abandu ba Kibeoni sibaali Abaisiraeli tawe; bali omukanda omutututu okwa Baamori, aba Baisiraeli bali okhusubisia mbu balaba nomulembe, nebutswa Saulo yateema okhubamuma khulwo okhuyanzisia abandu ba Isiraeli nende Yuda.

³Kho Daudi yalanga abandu ba Kibeoni ma nababool'la mbu, “Nisina esianyala okhumukhol'la? Nyenya okhurunga es'sialia khububi bwa mwali okhukhol'lwa kho mube abanyala okhulaamila abandu bo MWAMI tsikhabi.”

⁴Nabo nibakabusia mbu, “Obusoolo bwefwe nende Saulo sibunyala okhukol'losibwa khulwo khurungwa etsahabu nohomba efetsa tawe. Kata nefwe sikhurunanga okhwira Omuisiraeli wosi tawe.” Daudi nabareeba mbu, “Kho siakhaba sina esia ndakhamukhol'la?”

⁵Nabo nibamukalusia mbu, “Saulo yenya okhukhumuma ifwe ma abule okhulekhakhwo mulala khu ifwe okhuba mwoyo habundu hosi mu Isiraeli.

⁶Kho ibe okhuhelesie abetsukhulu baabe abasiani bane nabataru, ma khwitsa okhubasunga khumukoye imbeli wo MWAMI ha Kibeoni, litaala lia Saulo, owali omuruchi omwelwa wo MWAMI.”

⁷Nebutswa khulwe indakano inzienukhu eya Daudi yali niyalomba hakari uwe nende Yonatsani, Daudi yahonokosia Mefiboshetsi, omusiani wa Yonatsani owali omwitsukhulu wa Saulo.

⁸Khulwe yako yabukula Arinoni nende Mefiboshetsi, abasiani ba Risipa omukhaana wa Aya yali niyebula nende Saulo; khandi nabukula abasiani barano ba Merabu, omukhaana wa Saulo, abayebula nende Adirieli omusiani wa Barisilai, owarulanga Mehola.

⁹Daudi yabahaana khubandu ba Gibeoni ababasunga khumukoye khusikulu imbeli wo MWAMI — ma bosi bane nabataru nibafwa halala. Berwa mumatukhu kokhuranga kelichesa olwa bali nibachaakanga okhuchesa eshayiri.

¹⁰Ma Risipa omukhaana wa Aya owali omukhasi wa Saulo narumikhila ingubo yelikunia okhwelombela esitsu khulwanda ahemilambo chiali nichili ma namenyaho okhurula mukhuchaaka khwokhuchesa okhwola olwe ifula yesubwe yetsa. M'basu yakhunganga amanyonyi okhurula khumilambo, ne butukhu yachisoolanga okhurula khutsisolo tsiomubulimo.

¹¹Olwa Daudi yahul'la aka Risipa yali nakhol'le,

¹²yatsia nabukula amakumba ka Saulo nende aka Yonatsani omusiani wa Saulo okhurula khubandu ba Yabeshi mu Gileadi. Bali nibeeba emilambo yichio okhurula habundu habandu babukan'nanga mu Betsi Shani, aha Bafilisiti bali okhusunga emibili yichio litukhu elia bali okhwir'ra Saulo khusikulu sia Kiliboa.

¹³Daudi yabukula amakumba ka Saulo nende Yonatsani halala namakumba kabandu bane nabataru abali okhusungwa.

¹⁴Ma nibayabila amakumba ka Saulo halala nende aka Yonatsani musilindwa sia Kishi, samwana Saulo, habundu halangwa Sela musibala sia Benjameni, nibakholanga kosi akomuruchi yali nalachile kakholwe. Olunyuma we yako Nyasaye yakalusia amasaayo kabwe akabarebelanga esibala.

¹⁵Lihe lialiho khandi hakari wa Bafilisiti nende Abaisiraeli ma Daudi nabasikaribe natsia okhulwana Abafilisiti. Litukhu lindi olwa bali nibalwananga, Daudi yali okhuchonya.

¹⁶Okundu ok'kufu okwalangwa mbu Ishibibenobu, okwali nikuchingile lifumo liomukasa eliali nobusiro buhela etsikilo tsitaru nenusu, khandi kwali nikwebohele olukanga olwibulo, kwapaala mbu n'no kwakheera Daudi.

¹⁷Nebutswa Abisai omusiani wa Seluya yetsa okhukhonyel'la Daudi. Yasera okundu yikwo ma nakwira. Ma abasikari ba Daudi nibabool'la Daudi yesuhe mbu siyakhatsiekhwo n'nabo mwihe khandi tawe. Bamubool'la mbu, “Niwe owabandu ba Isiraeli basubila ne sikhwekombanga okhukhukosia tawe.”

¹⁸Olunyumakhwo, lihe liachiaka nende Abafilisiti habundu halangwanga Kobi, aha Sibekai okhurula Husha yeera okundu ok'kufu okulangwanga Safi.

¹⁹Khandi obulwani bundi bwaliho nende Abafilisiti ha Kobi ma Elihanani omusiani wa Yairo okhurula Betselehemu niyeera Goliati okhurula Gatsi owelifumo lilie liali nolubanga[7] olusiro singa omuhini kwelichembe.

²⁰Khandi obulwani bundi bwali Gatsi aha khwali nokundu ok'kufu okwali nikwayanza okhulwana. Kwali nebitere bisasaba khubuli mukhono khandi nebino bisasaba khu buli silenje.

²¹Kwali okhuchaaya Abaisiraeli bosi ma Yonatsani omusiani wa Shama amwabo Daudi yali okhukwira.

²²Bane yaba bosi bali abolwibulo lwemindu emikufu okhurula Gatsi, nebutswa tsierwa na Daudi halala nabasikari baabe.