Read lunyore 2 SAMWELI 23 Bible Online

2 SAMWELI 23 - lunyore bible

2 SAMWELI 23

¹Daudi omusiani wa Yese niye omundu owa Nyasaye yali okhukhola omukhongo, owa Nyasaye wa Yakobo yeela okhuba omuruchi, khandi niye owakulukunza tsinyembo tsindahi etsia Isiraeli. Kano niko amang'ana ka Daudi akokhumalikha:

²“Omwoyo wo MWAMI al'lomelanga mu ise; amang'ana kaake kali khul'limi lwanje.

³Nyasaye wa Isiraeli ul'lomele; omulindi wa Isiraeli umbooleye mbu: ‘Omuruchi owamihanga mubwatooto, arukanga nende okhuria Nyasaye,

⁴afwana singa eliuba eliakhanga khumukamba tsuli okuralikhwo namalumbesi, eliuba elichilanga obulimo nibunging'ina ifula niyakhakwa.’

⁵“Nimbwo Nyasaye yakhalaamile abolwibulo lwanje tsikhabi, sichila walomba indakano yeinziayo n'nase, indakano erakhafunakwe tawe, lisubisio eliranyala khukalukhanibwa. Yako niko akandekombanga; yibwo bwakhabe obulechi bwanje, ne Nyasaye niye olibuleera.

⁶Nebutswa abandu abarali ba Nyasaye bafwana amahwa akafubwanga esioba; abulaho onyala okhutilakhwo namakhono ameele.

⁷Nebutswa omundu ofwila khuko okhwola arumikhile esibia nohomba lifuma; kakhasambwe kosi pe.”

⁸Kano niko amera kabasikari ba Daudi abalulu. Owokhuranga yali Yoshebu Bashebetsi okhurula Takemoni owali omwemeli wabasikari abalulu bataru. Yarumikhila lifumo lilie okhulwana nabandu etsimia munane ma nabeera bosi halala.

⁹Owakhabili khubasikari bataru abalulu yabo yali Eliasa omusiani wa Dodo, owesilibwa sia Ahohi. Litukhu elala ye nende Daudi balwana Abafilisiti abali nibebunjikhile khulwo okhulwana lihe. Abaisiraeli belukha,

¹⁰nebutswa ye yasikala nalwana Abafilisiti okhwola olwomukhono kukwe kwachonya nebutswa sikwalakhuula olukanga tawe. OMWAMI yabahelesia obulechi obukali litukhu yilio. Olwobulwani bwali nibuhweye, Abaisiraeli nibakalukha aha Eliasa yali nali okhubunala abali nibafwiye ebilasan'nwe.

¹¹Owakhataru khubasikari bataru abalulu yabo yali Shama omusiani wa Akii okhurula Harari. Abafilisiti bali nibebunjikhile habundu halangwa Lehi ahomukunda kwetsimindi kwali nikuli. Abaisiraeli bali okhwilukha Abafilisiti,

¹²nebutswa Shama siyayilukha tawe. Yasinjila butswa mumukunda yikwo nakusoola. Ma niyeera Abafilisiti. OMWAMI yabahelesia obulechi obukali litukhu yilio.

¹³Amatukhu kelichesa nikali ahembi okhwola, bataru khubasikari amakhumi kataru abalulu batsia khuluhanga lwa Adulamu aha Daudi yali nali, ne abasikari ba Bafilisiti bali nipakhupile ekambi yabwe mwibanda lia Refaimu.

¹⁴Olwene yilwo Daudi yali nali khusikulu esiasirwa noluhinga ne omukanda kwabasikari ba Bafilisiti kwali nikufumiye litaala lia Betselehemu.

¹⁵Daudi yamala ahambwe namahofu ma naboola mbu, “Siakhuha omundu wander'rakhwo amaatsi kokhunywa okhurula musitaho esili musilibwa sia Betselehemu!”

¹⁶Abasikari abalulu bataru yabo barumikhila tsingufu okhubir'ra mukambi ya Bafilisiti, ma nibataha amaatsi okhurula musitaho yisio ma nibahil'la Daudi. Nebutswa Daudi siyakanywa tawe. Musilenje yisio yakasundula hasi singa omusango kwokhuhanwa khu MWAMI

¹⁷ma naboola mbu, “OMWAMI sindali onyala khunywa amaatsi yaka tawe! Kakhafwan'ne butswa singa onywetsanga amatsahi kabandu abali okhura obulamu bwabwe mubutinyu!” Kho yamala nasula okhukanywa. Yako niko amang'ana kolutswoni kabasikari bataru yabo bakhola.

¹⁸Omusiani wanga Yoabu olangwanga Abisai (Owa mama uwe yali Seluya) niye owali “Omwemeli wabasikari amakhumi kataru abalulu.” Yali okhulwana abandu etsimia tsitaru narumikhilanga lifumo lilie ma nabeera ma naba oweifuma ingali mubasikari “Amakhumi kataru.”

¹⁹Niye owali owoluyali okhusila khu “Basikari Amakhumi kataru” ma naba omwemeli wabwe, nebutswa siyali noluyali singa “Abasikari abalulu bataru” tawe.

²⁰Benaya omusiani wa Yehoyada okhurula kabuseli yali mulala khubasikari abalulu. Yakhola amang'ana kolutswoni amenji nikalimwo okhwira abasikari abalulu babili Abamoabu. Litukhu lindi yenjila mubuko inyinga yebarafu yali neliho ma niyeera esimba.

²¹Khandi yeera Omumisiri, okundu ok'kali kwene okwali nelifumo. Benaya yakuseera nesikulumesie ma nakunuula lifumo okhurula mukhono kwakwo, nakwira n'nalio.

²²Yako niko amang'ana kolutswoni aka Benaya yakhola, owali mulala khubasikari abalulu “Amakhumi kataru.”

²³Yali oweifuma ingali mubasikari amakhumi kataru, nebutswa oluyalilwe silwayomba olwa “Abasikari abalulu bataru” tawe. Daudi yamuhelesia omulimo kwokhusinjil'la abasikari baabe abamulindanga.

²⁴Khubasikari “Amakhumi kataru” bali: Asaheli, omusiani wanga Yoabu, Elihanani omusiani wa Dodo okhurula Betselehemu,

²⁵Shama nende Elika okhurula Harodi,

²⁶Helesi okhurula Peleti, Ira omusiani wa Ikeshi okhurula Tekoa,

²⁷Abieseri okhurula Anatsotsi, Mebunai okhurula Husha,

²⁸Salumoni okhurula Ahoni, Maharai okhurula Netofa,

²⁹Helebu omusiani wa Benaya okhurula Netofa, Itai omusiani wa Ribai okhurula Gibea musibala sia Benjameni,

³⁰Benaya okhurula Piratsoni, Hidai okhurula mwibanda elili ahembi Kaashi,

³¹Abialiboni okhurula Arabba, Asimawetsi okhurula Bahurimu,

³²Eliahiba okhurula Shaliboni, Abasiani ba Yasheni mbu Yonatsani,

³³omusiani wa Shama okhurula Harari, Ahiamu omusiani wa Sharari okhurula Harari,

³⁴Elifeleti omusiani wa Ahasibai okhurula Maaka, Eliamu omusiani Ahitsofeli okhurula Kilo,

³⁵Hesiro okhurula Karimeli, Parai okhurula Ebuharabu,

³⁶Ikali omusiani wa Natsani okhurula Soba, Bani okhurula Gadi,

³⁷Seleki okhurula Amoni, Naharai okhurula Birotsi, owachingilanga Yoabu ebilasan'nwe,

³⁸Ira nende Karebu okhurula Yatirie,

³⁹nende Uria omuhiti. Bosi halala bali abasikari amakhumi kataru nabane nabataru.