Read lunyore 2 SAMWELI 24 Bible Online

2 SAMWELI 24 - lunyore bible

2 SAMWELI 24

¹Khandi OMWAMI yahambila Abaisiraeli lirima ma natsuuba Daudi okhubaleer'ra amanyakhano naboola mbu, “Tsia obasie abandu ba Isiraeli nende Yuda.”

²Ma Daudi nalaka Yoabu halala nabemeli bandi babasikari mbu, “Tsie mutsinzibulo tsiosi etsia Isiraeli okhurula khundulo khwelubeka l'lala lwesibala okhwola khundulo lwe lubeka lundi, ma mubale abandu. Nyenyanga manye nabandu banga abalimwo.”

³Nebutswa Yoabu yakalusia omuruchi naboola mbu, “OMWAMI Nyasaye uwo nayanza yenjiyie abandu ba Isiraeli hali emia ndala okhuyomba obwa bali luno. Ne ndakhekomba ibe omuruchi obe mwoyo okhulola OMWAMI nakhola mbwo. Nebutswa omwami esichilanga niwenya yaka kekhole nisina?”

⁴Nebutswa omuruchi yahachia Yoabu nende etsisawoni tsiabasikari baabe okhukhola akalachile. Barula imbeli uwe ma nibatsia okhubasia abandu ba Isiraeli.

⁵Bambukha omuchela kwa Yorodani ma nibakhupa ekambi yabwe enandete wa Aroeri, litookho eliali musibala sia Gadi hakari welibanda. Okhurula habwene yaho batsia elubeka lwesinyolu habundu halangwa Yaseri,

⁶ma nibatsia okhwola Gileadi nende Kadeshi musibala sia Bahiti. Ma nibatsia okhwola Dani ne okhurula Dani batsia elubeka wemasaba okhwola Sidoni.

⁷Ma nibatsia elubeka lwenandete okhwola khwitookho lia Tiro, eliasira noluhinga. Khandi batsia mumatookho kosi ka Bahiwi nende Abakanaani ne olwokhumalilikha boola Beerisheba eli enandete wa Yuda.

⁸Kho Inyuma wemiesi chirano nachine namatukhu amakhumi kabili bakalukha Yerusalemu nibamal'le okhuchenda musibala siosi.

⁹Bahaana amabalo khumuruchi akabasaatsa abanyala okhulwana liihe. Bosi halala bali etsielefu tsimia munane okhurula mu Isiraeli ne mu Yuda bali etielefu tsimia tsirano.

¹⁰Nebutswa Daudi namal'le okhubala abandu, yachaaka okhunyakhana mumakani kaake ma nabool'la OMWAMI mbu, “Ise mal'le okhukhola tsimbi tsingali khulwo okhubala abandu! Yanza umbeele. Ise khol'le amang'ana koluhingwa.”

¹¹Olwa Daudi yabuukha mukamba tsuli, OMWAMI yabool'la Gadi, omuroobi wa Daudi mbu,

¹²“Tsia obool'le Daudi mbu muhetsanga ebindu bitaru yeelekhwo silala. Namukhol'le esianabe niyel'le.”

¹³Kho Gadi yatsia khuye, ma namubool'la ako MWAMI yali nabooye ma namureeba mbu “Wakhenya esili hena? Emihika chitaru etsie inzala musibala sisio? Nohomba emiesi chitaru echiokhwilukha abasuku baabo nohomba amatukhu kataru kolumbe musibala sisio? Luno kanakania khumang'ana yaka ma umbe likalusio liambil'la OMWAMI.”

¹⁴Daudi namukalusia naboola mbu, “Ndi musibi esikali! Nebutswa sinyenya okhuhebwa esinyasio nabandu tawe. Lekha OMWAMI mwene abe niye okhuha ifwe esinyasio, sichila OMWAMI ali netsimbabasi.”

¹⁵Kho OMWAMI yaruma olumbe khubandu ba Isiraeli, olwali okhuchiaka mutsuli kwelitukhu yilwo okhwola khunyinga eyomwene yali niyel'le. Okhurula khundulo wesibala yisio okhwola khundulo welubeka lundi, Abaisiraeli etsielefu amakhumi kane nakataru bali okhufwa.

¹⁶Olwom'malaika wo MWAMI yali nali ahembi okhumuma Yerusalemu, OMWAMI yakalukhania inganakani yiye eyokhuhaana esinyasio khubandu ma nabool'la om'malaika owali niyeeranga abandu mbu, “Lekha! Yako kahel'le!” Om'malaika yali nasinjiye halutse lwa Arauna Omuyebusi.

¹⁷Daudi yalola Om'malaika owali niyeeranga abandu ma nabool'la OMWAMI mbu, “Ise nise oli nesikha. Ise nise owali okhukhola obubi. Abandu abatakha yaba bakhol'le sina? Ibe ohaane esinyasio khu ise nende abeinzu yanje.”

¹⁸Litukhu liene yilio Gadi yatsia khu Daudi ma namubool'la mbu, “Tsia wombokhele OMWAMI olusambwa halutse lwa Arauna.”

¹⁹Daudi yahuchil'la ako MWAMI yaboola ma natsia singa obwa Gadi yali namubooleye.

²⁰Arauna yahenga emwalo ma nalola omuruchi nabakhulundu baabe nibetsanga ahali. Arauna yasikama imbeli wa Daudi

²¹ma nareeba mbu, “Omwami, nisina esichil'le niwitsa hano?” Daudi namukalusia naboola mbu, “Nzitsile okhukula olutselwo ma nyombokheleho OMWAMI olusambwa okhwikal'la olumbe.”

²²Arauna naboola mbu, “Bukula omwami, ma ohaane omusango kwosi okwa wenyele khu MWAMI. Etsihili nzietsi khulwo okhusambwa singa omusango khulusambwa; amachoki katsio ngaka nende tsimbao tsiokhulutse tsirumikhilwe singa tsikhwi tsiokhusamba.”

²³Arauna yabihaana biosi khumuruchi ma namubool'la mbu, “OMWAMI Nyasaye uwo nayanza ahuchil'le omusangokwo yiku.”

²⁴Nebutswa omuruchi nakalusia mbu, “Tawe, nzia okhukhurunga obukusi bwabio bwosi. Sindakhahaanakhwo khu MWAMI Nyasaye emisango echiararungilekhwo esindu tawe.” Ma nakula olutse nende etsihili khulwe ebitonye amakhumi karano biefetsa.

²⁵Yombokhelaho OMWAMI olusambwa ma nahaana emisango chiokhusambwa nende emisango chiobuhambani. OMWAMI yakalusia amasaayo kaake, ma olumbe mu Isiraeli ndulekha.