Read lunyore 2 SAMWELI 3 Bible Online

2 SAMWELI 3 - lunyore bible

2 SAMWELI 3

¹Lihe hakari wabasikari abakhonyanga abeinzu ya Saulo nende abasikari abakhonyanga abeinzu ya Daudi liatsilil'la khulwo luhono olurambi. Olwa Daudi yatsilil'la okhumeetekha netsingufu, abasuku baabe batsilil'la okhuba abatofu.

²Daudi yebula abasiani basasaba nali Heburoni. Obulondokhani bwokhwibulwa khwabwe okhurula khuwokhuranga okhwola khuwokhumalikha buli singa mbu: Aminoni owa mama uwe yali Ahinoamu okhurula Yesereli;

³Kileabu owa mama uwe yali Abigaeli, omukhasi sika Nabali okhurula Karimeli; Abisalomu owa mama uwe yali Maaka, omukhaana womuruchi Talimai wa Keshuru;

⁴Adoniya owa mama uwe yali Hakitsi; Shefatia owa mama uwe yali Abitali;

⁵Itsureamu owa mama uwe yali Ekila. Abasiani yaba bosi bebul'lwa Heburoni.

⁶Olwobulwani bwali nibutsilil'langa hakari wabasikari ba Daudi nende abasikari abakhonyanga abeinzu ya Saulo, Abineri yameetekha okhuba netsingufu okhuyomba abasikari bandi bosi abakhonyanga Saulo.

⁷Litukhu elala Ishiboshetsi omusiani wa Saulo yekaana Abineri mbu akonanga nende Risipa omukhaana wa Aya, omukhasi wa Saulo yali niyabiikha.

⁸Yaka kamukhola Abineri okhusinyikha okhusila ma nareeba mbu, “Ibe opaalanga ndi onyala okhukalukhana Saulo? Opaalanga ise khonyel'langa Yuda? Okhurula mukhuchaaka ise mbetsanga ninondanga amang'ana ka papa uwo Saulo, akabasiani babwe nende akabalina baabe, ma khandi ndakhusoola okhurula khukhulekwa nende Daudi; ne luno ibe onyoolanga amabi khu ise khulwo mukhasi uyu!

⁹Nyasaye yakhupake ise ifwe nimba nirakhol'la Daudi ako MWAMI yamwesuhila

¹⁰mbu yakhahinie oburuchi okhurula khu Saulo nende abolwibulo lulwe ma namukhole Daudi okhuba omuruchi wa Isiraeli nende Yuda, okhurula khundulo welubeka l'lala lwesibala okhwola elubeka lundi.”

¹¹Ishiboshetsi yali niyamuria Abineri, kho siali onyala okhukalusiakhwo ling'ana liosi tawe.

¹²Abineri yaruma abarumwa khu Daudi owali nali Heburoni okhumureeba mbu, “Niwina owanobe omuruchi wesibala sino? Lomba indakano n'nase, ne nzia okhukhukhonya okhuleera Isiraeli sibe khulubeka lulwo.”

¹³Daudi nakalusia mbu, “Nobulahi! Nzia okhulomba indakano ninawe nikali wakhander'ra Mikali omukhaana wa Saulo olwoba niwitsanga okhundola hano.”

¹⁴Khandi Daudi yaruma abarumwa khu Ishiboshetsi okhumubool'la mbu, “Yanza umbelesie omukhasi wanje Mikali, owandakhwa amakhoba keikulu emia ndala akasebwa khu Bafilisiti khulwo khumuteesia.”

¹⁵Kho Ishiboshetsi yahinia Mikali okhurula khumusaatsawe Palitieli omusiani wa Laishi.

¹⁶Palitieli yalonda omukhasiwe Mikali nalakayanga okhwola mwitaala lia Bahurimu. Nebutswa olwa Abineri yamubool'la mbu, “Kalukha ingo,” Palitieli yakalukha.

¹⁷Abineri yatsia khubemeli ba Isiraeli ma nababool'la mbu, “Khulwemihika eminji mwenyanga Daudi okhuba omuruchi wenywe.

¹⁸Luno nobweyangu bwenywe. Mwitsul'le obwo MWAMI yaboola khu Daudi mbu, ‘Ndakharumikhile omurumikhili wanje Daudi okhubasoola abandu ba Isiraeli okhurula mumakhono ka Bafilisiti halala nabasuku babwe bandi bosi.’ ”

¹⁹Abineri yabool'lakhwo khandi abolwibulo lwa Benjameni ma natsia Heburoni okhubool'la Daudi akabandu bolwibulo lwa Benjameni nende Isiraeli bali nibahuchiliye okhukhola.

²⁰Olwa Abineri yetsa khu Daudi nali Heburoni, yali nabandu amakhumi kabili ma Daudi nabalombela lisabo.

²¹Abineri yabool'la Daudi mbu, “Nzia okhutsia luno okhuleera Isiraeli hasi hoburuchi bubwo. Betsa okhukhuchil'la ibe singa omuruchi wabwe, ma witsa okhunyoola esiawenyanga ne nawamihe esibala siosi.” Kho Daudi yaseebula Abineri naye natsia nomulembe.

²²Olunyuma, Yoabu nende abemeli babasikari ba Daudi bakalukha okhurula mwihe nibaleeranga emiandu eminji echia bali nibayaakile. Abineri, siyaali nasili Heburoni nende Daudi tawe, sichila Daudi yali namusebuuye naye natsiye nomulembe.

²³Olwa Yoabu nende abandu baabe bakalukha, Yoabu yabool'lwa mbu Abineri yali okhwitsa khumuruchi Daudi ma yali okhusebulwa ma natsia nomulembe.

²⁴Kho Yoabu yatsia khumuruchi ma namubool'la mbu, “Nisina esiokhol'le? Abineri yetsele khuibe; esichil'le nomulekha natsia nomulembe nisina?

²⁵Yetsele hano okhukhukaata nende okhumanyilisia kosi akokholanga nende habundu hosi ahotsitsanga. Siahene ibe umanyile akene yaka!”

²⁶Yoabu niyakharula khu Daudi yaruma abarumwa okhuleera Abineri, ne bamuleera okhurula mwiyabo liamaatsi lia Sira; nebutswa Daudi siyamanyakhwo liosi khuko tawe.

²⁷Olwa Abineri yoola Heburoni, Yoabu yamuhila sibeka musilibwa singa owenyanga okhul'loma n'naye akamasilisi ne habwene yaho namufumira munda. Khulwe yako Abineri yeerwa sichila yali niyeera Asaheli amwabo Yoabu.

²⁸Olwa Daudi yahul'la amang'ana akali nikekholekhele, yaboola mbu, “OMWAMI umanyile mbu abandu banje nende ise sikhulikhwo nesikha siosi khulwo okhwirwa khwa Abineri tawe.

²⁹Esinyasio siokhufwa khwa Abineri sibe khu Yoabu nende beinyumba yiye! Mubuli lwibulo abetsenjemwo omusaatsa munyumba yiye oli nobulwaye bwesisununu nohomba obuchele nohomba owokhukhola emilimo chiomundu mukhasi nohomba owokhwirwa mwihe nohomba omutakha obula esiakhulia!”

³⁰Kho Yoabu halala nende Abisai amwabo nyene bali okhubanza es'sialia khu Abineri khulwo khwira omusiani wabwe Asaheli mubulwani obwali Gibeoni.

³¹Ma Daudi nalaka Yoabu nabandube okhurandula tsingubo tsiabwe, nokhwebikha tsingubo tsiamatasi okhumanyia esibeela, nende okhwekhuula Abineri. Ne khwitukhu liokhuyabilwa khukhwe, omuruchi Daudi yalondanga inyuma welisanduku eliali nilichinjile omufu mwene.

³²Abineri yayabilwa Heburoni ne omuruchi yalakaya butinyu hasilindwa, khandi abandu baabe bakhola mbwo.

³³Daudi yemba olwembo yilu khulwo khwekhuula Abineri: “Esiachila Abineri nafwa singa omuhingwa nisina?

³⁴Amakhono kaake sikaali nikabohelwe tawe, khandi ebilenje bibie sibiali nibibohelwe tawe. Yafwa singa omundu owerwa nabandu ababi!” Ma abandu nibamwekhula khandi.

³⁵Khulwe litukhu liosi abandu bateema okhulola mbu Daudi uliyekhwo esiakhulia, nebutswa yesuha naboola mbu, “Nyasaye yakhupake fwe nikali ndakhaliakhwo esindu siosi eliuba nilisili okhuyeela!”

³⁶Abandu balola amang'ana yako ma nibayanzisibwa. Buli siesindu siomuruchi yakholanga siayanzisia abandu.

³⁷Abandu ba Daudi bosi nende abandu ba Isiraeli bosi bali okhumanyilisia mbu omuruchi sialikhwo ahembi khukokhwirwa khwa Abineri tawe.

³⁸Omuruchi nabool'la abemeli baabe bosi mbu, “Inywe simumanyilisianga mbu litukhu lino omwemeli omukali yali okhufwa mu Isiraeli tawe?

³⁹Kata nikali mbu ndi omuruchi owelwa nende OMWAMI, ndolanga nirali netsingufu olwaleelo. Abasiani ba Seruya yaba banyombele noburima bwabwe. OMWAMI ahaane esinyasio khumukholi wobubi okhuhelana nobubi bubwe omwene!”