Read lunyore 2 SAMWELI 4 Bible Online

2 SAMWELI 4 - lunyore bible

2 SAMWELI 4

¹Olwa Ishiboshetsi, omusiani wa Saulo yahulila mbu Abineri wiriywe Heburoni, ikholo yamurimukha, ne abandu ba Isiraeli bosi bali nesihenda mwoyo esikali.

²Ishiboshetsi tsana yali nali nabasikari abakhongo babili abali abemeli bemikanda chiobulwani chibili. Mulala khubo yalangwanga Baana, ne oundi mbu Rekabu ne bali abasiani ba Rimoni owolwibulo lwa Benjameni okhurula Berotsi. (Berotsi liabalwa singa elala khumataala ka Benjameni.

³Abandu ba Berotsi bali nibelukha okhutsia Kitaimu, aha bamenyele okhwola leelo.)

⁴Yonatsani, omusiani wa Saulo yali nomusiani olangwanga Mefiboshetsi yali owemihika chirano olwa Saulo nende Yonatsani berwa. Ne olwa amang'ana kokhufwa khwabwe ketsa okhurula Yesereli, omuleliwe yamwetsumba ma niyelukha n'naye; nebutswa yali mutsimbilo tsingali okhusila ma kata nakoka omwana uyo hasi ma Mefiboshetsi nakwa omulema.

⁵Rekabu nende Baana barula nibatsia munyumba ya Ishiboshetsi ma niboolayo m'mubasu hakari olwa yali nahulukhanga.

⁶Omukhasi owalindanga hamuliango yarengetsa olwa yali niyeluulanga ingano ma tsindoolo nitsimuhila, kho Rekabu nende Baana benyola ma nibenjila mukari[3].

⁷Olwa benjila munyumba banyoola Ishiboshetsi nali khusitandasie ebulili, kho bamurotsa ma nibamwira nolukanga; Khandi nibamukhalaka omurwe. Babukula omurwekwe ma nibachenda n'nakwo obutukhu bwosi okhubir'ra Mwibanda lia Yorodani.

⁸Bahaana omurwe yikwo khumuruchi Daudi nali Heburoni ma nibamuboola mbu, “Kuno nomurwe kwa Ishiboshetsi omusiani womusukuwo Saulo, owarunanga okhukhwiira. Olwaleelo, OMWAMI uhuchiliye mbu ibe omwami wefwe okhurunga es'sialia khu Saulo nende khubolwibulo lulwe.”

⁹Daudi yabakalusia naboola mbu, “Ndesuhanga khu Nyasaye mulala owali okhuusoola musibi siosi!

¹⁰Omundu owetsa khu ise nindi Sikilaki ma niyambool'la akokhufwa khwa Saulo yapaala mbu n'no yambool'langa amang'ana kokhunyanzisia. Ndamutiila ma nindaka mbu yeerwe. Yikwo nikwo omukabwa okwa ndamuha khulwamang'ana kaake akokhuyanzisia.

¹¹Kho sikakhabakhwo amabi okhuyombia olwa abandu babi baba nibeereye omundu obula esikha munyumbamwe mwene nakon'ne! Luno nzia okhumurunjia es'sialia khulwo okhwira Ishiboshetsi, ne nzia okhumumuma mwesi okhurula khusibala!”

¹²Kho Daudi yalaka abasikaribe okhubeera, nabo nibabeera, nibabakhalakakhwo emirwe nebilenje, ma nibabasunga khumisaala hetubango lia Heburoni. Nebutswa babukula omurwe kwa Ishiboshetsi, ma nibakuyabila musilindwa sia Abineri esili Heburoni.