Read lunyore 2 SAMWELI 5 Bible Online

2 SAMWELI 5 - lunyore bible

2 SAMWELI 5

¹Ma tsinzibulo tsiosi etsia Isiraeli tsietsa khu Daudi nali Heburoni ma nitsimubool'la mbu, “Ifwe khuli abelikumba lilio khandi abamatsahi kaako.

²Mumatukhu akabira, kata olwa Saulo yali nasili omuruchi wefwe, ibe wemel'la abandu ba Isiraeli okhulwana lihe, ne OMWAMI yali okhukhusubisia mbu wakhemel'le abandu baabe ma obe omuruchi wabwe.”

³Kho abemeli ba Isiraeli bosi beetsa khumuruchi Daudi naali Heburoni. Daudi yalomba n'nabo indakano imbeli wo MWAMI nabo nibamutsukhul'lakhwo amafura okhuba omuruchi wa Isiraeli.

⁴Daudi yali nemihika amakhumi kataru olwa yemekhwa okhuba omuruchi ma niyamiha khulwemihika amakhumi kane.

⁵Yamiha Yuda khulwemihika tsine natsitaru nenusu naali Heburoni ne nali Yerusalemu yamiha Isiraeli yosi khulwemihika amakhumi kataru natsitaru.

⁶Inyinga yoola olwa Daudi nende abasikari baabe batsia okhuseera litookho lia Yerusalemu. Abayebusi abamenya Yerusalemu bapaala mbu Daudi siali onyala okhuleka Yerusalemu tawe, kho bamala nibamubool'la mbu, “Ibe siwakhanyala okhwinjila hano tawe; kata ababofu nende abalema banyala okhukhwikal'la esioba.”

⁷Nebutswa Daudi yafumila oluhinga lwabwe lwa Sayuni, ma litookho yilio ndilangwa mbu “Litookho lia Daudi.”

⁸Litukhu liene yilio Daudi yareeba abasikari baabe mbu “Alikhwoho omundu mulala khu inywe owasinyikhila Abayebusi singa obwe ise ndabasinyikhila? Okhusinyikha khwokhubeera? Kho ninile khumufurechi kwamaatsi ma museere abalema, ababofu nende abatakha yabo.” (Yako niko akachilanga nibaboola, “Ababofu nende abalema sibakhenjila munyumba yo MWAMI tawe.”)

⁹Inyuma wokhufumila oluhinga yilwo, Daudi yamenya muluhinga yilwo ma nalukulikha, “Litookho lia Daudi.” Yombokha litookho okhubotokhana oluhinga nachiachilanga ebukwe wesikulu ahamaloba kali nikatsukhwa okhuhelania esibala.

¹⁰Daudi yameetekha okhuba netsingufu amatukhu kosi sichila OMWAMI Nyasaye Wokhunyala Biosi yali n'naye.

¹¹Omuruchi Hiramu wa Tiro yaruma abarume khu Daudi. Khandi yamurumila emisaala chiemisiita, nende abafundi betsimbao, nende abombokhi bamachina khulwo khumwombokhela inyumba yoburuchi.

¹²Ma Daudi namanyilisia mbu OMWAMI yali namwemekhele okhuba omuruchi wa Isiraeli, khandi yali namuchinguuye muburuchibwe khulwa abandu baabe Abaisiraeli.

¹³Daudi namal'le okhurula Heburoni okhutsia Yerusalemu yateesia abakhasi bandi abenji khandi nabukula abakhasi ababiikha abenji ma niyebula abasiani nende abakhaana abenji.

¹⁴Abaana bamera kabwe kalondakhana kano, Daudi yabebula nali Yerusalemu: Shamua, Shobabu, Natsani, Solomoni,

¹⁵Ibihari, Elishua, Nefeki, Yafia,

¹⁶Elishama, Eliada nende Elifeleti.

¹⁷Olwa Abafilisiti bahul'la mbu Daudi wemekhelwe okhuba omuruchi wa Isiraeli, abasikari babwe barula okhutsia okhumutiila. Olwa Daudi yahul'la amang'ana yako, yatsia habundu ahasirwa noluhinga.

¹⁸Abafilisiti boola mwibanda lia Refaimu ma nibalifumila.

¹⁹Daudi nareeba OMWAMI mbu, “Nzie okhuseera Abafilisiti? Olambelesia tsingufu tsiokhubaleka?” OMWAMI nakalusia mbu, “Yee, baseere! Ise nzia okhukhuha tsingufu tsiokhubaleka.”

²⁰Ma Daudi natsia habundu halangwanga Baali Perasimu ma nabaleka Abafilisiti. Daudi naboola mbu, “OMWAMI yali okhukhulula abasuku banje singa omukhula kwamaatsi.” Khulwe yako habundu yaho halangwa Baali Perasimu[4].

²¹Olwa Abafilisiti belukha, balekha ebiniini biabanyasaye ababekayakayanga inyuma, ma Daudi halala nabasikari baabe nibabibukula.

²²Ma Abafilisiti nibakalukha mwibanda lia Refaimu nibalifumila khandi.

²³Daudi nareeba OMWAMI olwakhabili, naye namukalusia naboola mbu, “Orakhabaseera okhurula hano tawe, nebutswa obotokhane ma werechekhe okhuseera noli elubeka lundi, ahembi nemisaala chiebikhuuma.

²⁴Olwa nohul'le liyoka liokhuchenda mumisaala, ikulu, nobaseere sichila nambe ninjendanga imbeli wenywe okhuleka abasikari ba Bafilisiti.”

²⁵Daudi yakhola ako MWAMI yali namulachile ma nikachila nakhunga Abafilisiti okhurula Keba okhwola Keseri.