Read lunyore 2 SAMWELI 6 Bible Online

2 SAMWELI 6 - lunyore bible

2 SAMWELI 6

¹Daudi khandi yabunjelesia halala abasikari abalulu mu Isiraeli abahela abandu etsielefu amakhumi kataru.

²Ma Daudi narula natsia khwitookho lia Baala halala n'nabo bosi, okhutsia okhwenda Lisanduku lie Indakano ya Nyasaye eliahandikwakhwo eliira lio MWAMI Wokhunyala Biosi, owolurubalwe luli ikulu webilonje bietsimbaha.

³Babukula Lisanduku lie Indakano okhurula munyumba ya Abinadabu eli khusikulu ma nibalichinjila khwikaari liyia. Usa nende Ahio abasiani ba Abinadabu bemel'la likaari

⁴ne Ahio yali imbeli walio.

⁵Daudi naye halala na Baisiraeli bosi bali nibasalamanga nibembanga nobunyali bwosi khulwo khuhaana oluyali khu MWAMI. Bali nibakhupanga amatungu, amalele, ebikuti, amanyanga nende ebisilili.

⁶Ne olwa boola halutse lwa Nakoni, Usa yahila omukhono khwisanduku lie Indakano okhuliletel'la, okhuba tsing'ombe etsiali nitsilichinjile tsiesikar'ra.

⁷Nonoho OMWAMI yatiil'la Usa lirima ma namwira sichila yatiila khwisanduku lie Indakano akarenyekhanga tawe. Usa yafwila habwene yaho ahe Lisanduku lie Indakano liali nilili,

⁸ma nikachila habundu yaho nihalangwa mbu Peresi Usa[5] okhurula olwene yilwo.

⁹Daudi yali noburi khu MWAMI litukhu yilio ma nareeba mbu, “Ndakhachelesia mbwena Lisanduku lie Indakano?”

¹⁰Ma kho Daudi siyahuchil'la okhutsia ne Lisanduku lie Indakano Yerusalemu tawe; musilenje yisio yebera okhurula khumuhanda ma natsia okhulibiikha munyumba mwa Obedi Edomu, omwibule wa Katsi.

¹¹Liamenyamwo emiesi tsitaru, ma OMWAMI yalaama tsikhabi khu Obedi Edomu halala nabeinyumbaye.

¹²Ma Daudi nahulila mbu, OMWAMI yali nalaamiye abeinyumba ya Obedi Edomu tsikhabi halala nende ebia yali n'nabio biosi khulwe Lisanduku lie Indakano. Kho yamala atsie okhwenda Lisanduku lie Indakano okhurula munyumba mwa Obedi Edomu nalihila Yerusalemu nende omwekhoyo omukali.

¹³Ne olwabandu abali nibachinjile Lisanduku lie Indakano bali nibakhachenda singa ebilenje bisasaba, Daudi yabasinjisia ma nahaana omusango khu OMWAMI okwechulukhi nende okwesimoosi esianera.

¹⁴Daudi yasalama imbeli wo MWAMI; ne yali niyebohele ingubo elangwanga efoti mus'sienje sisie.

¹⁵Kho Daudi nende Abaisiraeli bosi baleera Lisanduku lie Indakano nibaliosia Yerusalemu nibakhupanga eliyoka liobusangali nende okhukhupa khwetsinzika.

¹⁶Olwe Lisanduku lie Indakano liali nilileerwanga mwitookho, Mikali, omukhaana wa Saulo, yahenjel'la Mwitilisa ma nalola omuruchi Daudi nasalamanga ne naruuma ikulu imbeli wo MWAMI, ma Mikali namuchiaya mumwoyo kukwe.

¹⁷Nabo baleera Lisanduku lie Indakano ma nibalira Mwiheema mubukono bwalio obwa Daudi yalilombela. Ma nahaana emisango chiobuhambani nende emisango chindi khu MWAMI.

¹⁸Olwa yali namal'le okhuhaana emisango, yalaamila abandu tsikhabi muliira lio MWAMI Wokhunyala Biosi

¹⁹ma nabakabul'la ebiokhulia bosi. Yahelesia siomusaatsa nende siomukhasi mu Isiraeli omuhayila mulala okwomukaati, esipande sieinyama isambe, nende ekeki elimwo amatunde. Ma abandu bosi nibatsia mutsingo tsiabwe.

²⁰Ma olunyuma Daudi natsia ingowe okhusesia abeinyumbaye. Nebutswa Mikali, omukhaana wa Saulo yarula esioba okhumwakan'na ma naboola mbu, “Tooto mwene omuruchi wa Isiraeli yali okhwehelesia oluyali olwaleelo. Yali okhwenabula tsingubo singa omuhingwa imbeli wabakhaana abarumikhilanga abemelibe.”

²¹Daudi yakalusia naboola mbu, “Ndali okhusalama nimbana oluyali khu OMWAMI, owali okhunzahula musilenje sia papawo nende abeinyumbaye ma niyakhola omwemeli wabandube, Abaisiraeli. Ne nanzilil'le okhusalama nimbana oluyali khu MWAMI,

²²Khandi nanzilil'le okhwesimbia omurwe okhusila. Ibe onyala okhupaala mbu ise sindi esindu tawe, nebutswa abakhaana yabo balambelesia oluyali olweikulu!”

²³Ne Mikali omukhaana wa Saulo siyalikhwo no mwana tawe okhwola olwa yafwa.