Read lunyore 2 SAMWELI 7 Bible Online

2 SAMWELI 7 - lunyore bible

2 SAMWELI 7

¹Omuruchi Daudi yamenya munyumba yiye ne OMWAMI yamusoola okhurula khubasuku baabe bosi.

²Ma omuruchi nabool'la omuroobi Natsani mbu, “Hano ndamenya munyumba eyombokhwa netsimbao tsiemisiita, nebutswa Lisanduku lie Indakano ya Nyasaye liabiikhwa mwiheema!”

³Natsani nakalusia naboola mbu, “Khola kosi akali mumwoyo kukwo sichila OMWAMI ali halala n'nawe.”

⁴Nebutswa obutukhu yibwo, OMWAMI yabool'la Natsani mbu,

⁵“Tsia obool'le omurumikhili wanje Daudi mbu mubool'langa mbu, ‘Ibe sioli niwe owokhunyombokhela ehekalu yokhumenyamwo tawe.

⁶Okhurula olwa ndanunula abandu ba Isiraeli okhurula Emisiri okhwola luno sili okhumenyakhwo mu Hekalu tawe, nebutswa ndachendanga nimbotokhana nimenyele mumaheema.

⁷Mukhuchenda khwanje khwosi nabandu ba Isiraeli, sindareebakhwo omwemeli wosi owandeela esifune esiachila nibaranyombokhelakhwo ehekalu yemisiita tawe.’

⁸“Kho obool'le omurumikhili wanje Daudi mbu, ise OMWAMI Wokhunyala Biosi mubool'langa mbu, ‘Ndakhuhinia mukhwaya amakondi musiayo ma nikhwahula okhuba omuruchi wabandu banje Abaisiraeli.

⁹Ndabeyenje n'nawe habundu hosi ahawatsiyenje ma nindeka abasuku baabo bosi olwa wainond'enje inyuma. Nakhukhole okhuba noluyali singa abemeli bomusibala abali abakhongo okhusila.

¹⁰Khandi ndakhahelesie abandu banje ba Isiraeli habundu hokhumenya ma ndakhabasimikheho kho babe abanyala okhuba nende hango habwe abene ma sibakhanyakhane khandi tawe. Abandu ababi sibakhabakhupie esibi khandi singa babakhupianga esibi olwokhuranga tawe.

¹¹Okhurula olwa ndahul'la abandu banje Abaisiraeli abakhalachi okhuba abemeli babwe, musubisianga okhumulinda khurula khubasuku benywe bosi.

¹²Olwe ibe nofwe ma noyabilwe okhutsia ahabakuka baabo bali, ndakhahule mulala khubasiani bo okhuba omuruchi ma ndakhakhole obwami bubwe okhuba obwetsingufu.

¹³Ye niye owakhanyombokhele Ehekalu ma ndakhalole mbu abolwibulo lulwe bamihanga inziayo.

¹⁴Ise ndakhabe samwanawe, naye yakhabe omusiani wanje. Ne olwa yakhakhole amang'ana amabi, ndakhamuhelesie esinyasio singa obwa papa ahaananga esinyasio khumusiani uwe.

¹⁵Nebutswa sindakhalekhe okhumukhonya singa obwa ndalekha okhukhonya Saulo owa ndali okhuhiinia khubwami kho ibe obe omuruchi tawe.

¹⁶Nobetsenje nabetsukhulu khasotso ne nakhole lihanga lilio okhuralila khulwe inziayo. Oburuchi bweinzu yiyo sibwakhahwe tawe.’ ”

¹⁷Natsani yabool'la Daudi kosi aka Nyasaye yali namubisuliye.

¹⁸Ma omuruchi Daudi natsia Mwiheema liokhubaho khwo MWAMI, niyekhala ma nasaaya mbu, “Ise khali wina E OMWAMI Nyasaye, Kata abeinyumba yanje bakhola sina akachil'le niukhol'la yaka kosi?

¹⁹Ma khandi kata luno otsilil'langa okhuukhol'la amalahi okhusila; wamala okhuhaana amasubisio khu abolwibulo lwanje, khumihika etsitsanga. Ma olekhanga omundu okhulola akene yaka OMWAMI Nyasaye.

²⁰Nimang'ana sina kandi akanyala okhukhubool'la! Ibe waimanya ise omurumikhili uwo.

²¹Bwali obulalilo bubwo khandi obwenyi bubwo okhukakhola yaka; wakhola ebindu ebikali yibi khulwo okhunzechesia ise.

²²Ibe oli omukhongo okhusila, OMWAMI Nyasaye! Abulaho omundu undi ofwana ibe; ifwe khwamanya okhurula khale mbu ibe wenyene niwe Nyasaye.

²³Libulaho lihanga lindi liosi khusibala elifwana nende Isiraeli, elia wanunula okhurula mubusumba nende okhukhukhola abandu balio okhuba abandu baabo omwene. Ebindu ebikali nende ebiokhuchenya ebiawabakhol'la bialandia oluyali lulwo musibala siosi. Wali okhukhunga amahanga kandi halala nabanyasaye babwe olwabandu baabo bali nibenjilanga musibala, abandu abawali okhuhelesia obulakhuule okhurula Emisiri kho babe abandu baabo.

²⁴Wakhola Isiraeli okhuba abandu baabo khulwe inziayo, ne ibe, OMWAMI waba Nyasaye wabwe.

²⁵“Ne luno E, OMWAMI Nyasaye, ohesie lisubisio elia wandesuhila nende abolwibulo lwanje amatukhu kosi, ma okhole kosi akawaboola wakhakhole.

²⁶Ifuma yiyo yakhabe ingali ne abandu bakhaboole khulwe inziayo mbu, ‘OMWAMI Nyasaye Wokhunyala Biosi ni Nyasaye wa Isiraeli!’ Khandi wakhabiikhe obwami mubeinyumba yanje emihika chiosi.

²⁷OMWAMI Wokhunyala Biosi, Nyasaye wa Isiraeli! Ndi nolutswoni okhusaaya amasaayo kano khuibe, sichila ibe waimbisul'la yaka kosi, ise omurumikhili uwo, ma waimbool'la mbu nawele abolwibulo lwanje okhuba abaruchi.

²⁸“Ne luno OMWAMI Wokhunyala Biosi, ibe wenyene niwe Nyasaye, ibe ohesianga lisubisio lilio khasotso, ne waimbelesia lisubisio likali yili.

²⁹Khureebanga olaamile abolwibulo lwanje tsikhabi kho babe abanyala okhutsilil'la okhunyoola esirenda sisio. Ibe OMWAMI Nyasaye wamala okhuusubisia yaka, ne tsikhabi tsitsio tsilaba khubolwibulo lwanje inziayo.”