Read lunyore 2 SAMWELI 8 Bible Online

2 SAMWELI 8 - lunyore bible

2 SAMWELI 8

¹Olunyumakhwo omuruchi Daudi yaseera Abafilisiti khandi, nabaleka ma nahinia obunyali bwabwe khusibala.

²Khandi Daudi yaleka Abamoabu. Yakonia abasumba hasi mulukuukhi ma niyeera abandu babili khubuli abandu bataru. Kho Abamoabu bali hasi hoburuchibwe ma nibarunga obusuru khuye.

³Khandi Daudi yaleka Hadadesa omusiani wa Rehobu, owali omuruchi wa Soba olwa yali natsitsanga okhukalusia oburuchi bubwe khusibala esialinji hasi uwe esili hamuchela kwa Efurate.

⁴Daudi yafumila amakaari ka Hadadesa elefu ndala halala nabasikari bokhutsifarasi etsielefu tsine natsitaru nende abasikari bokhubilenje etsielefu amakhumi kabili. Yabiikha etsifarasi etsihela amakaari emia ndala, ne etsindi tsiosi naremaka ebilenje.

⁵Olwa Abasiria okhurula Damasiko baruma abasikari okhukhonya omuruchi Hadadesa, Daudi yabaseera ma niyeera abasikari etsielefu amakhumi kabili natsibili.

⁶Ma Daudi nahila emikanda chiabasikari okhukhupa etsikambi mu Aramu nende Damasiko; ma Abasiria nibaba hasi hoburuchibwe khandi nibarunga obusuru khuye. OMWAMI yahelesia Daudi obulechi habundu hosi.

⁷Daudi yabukula tsingabo tsietsahabu etsiachingwanga nende abemeli ba Hadadesa, ma nachileera Yerusalemu.

⁸Khandi yabukula omukasa omwinji okhurula Beta nende Berotsai, amatookho aka Hadadesa yamihanga.

⁹Toi, omuruchi wa Hamatsi yahulila obwa Daudi yali nalekele abasikari ba Hadadesa bosi.

¹⁰Kho yaruma omusianiwe Yoramu okhutsia okhuhaana emilembechie khu Daudi nende okhumukhupila embwo khulwo khuleka Hadadesa owa Toi yali niyalwana n'naye hali akhenji. Yoramu yahil'la Daudi ebihaanwa ebialombwa khutsahabu, khufetsa nende khumukasa.

¹¹Omuruchi Daudi yabihaana khu MWAMI, halala netsahabu nende efetsa eya yali nanuul'le amahanga aka yali nalekele.

¹²Amahanga tsana kali Edomu, Moabu, Amoni, Filisiti, nende Amaleki, halala nende ebia yali nayaakile okhurula khu Hadadesa.

¹³Daudi yanyoola oluyali olukali okhusila olwa yachelela narula okhwira Abaedomu etsielefu likhumi namunane aba yer'ra Mwibanda lie Chumbi.

¹⁴Yahila emikanda chiabasikari okhukhupa etsikambi mu Edomu mwosi, ma abandu baho bamala babe hasi hoburuchibwe. OMWAMI yahelesia Daudi obulechi hosi aha yatsitsanga.

¹⁵Daudi yamiha esibala sia Isiraeli siosi ma nateema akanyalikha okhulola mbu abandu baabe bakhol'lwanga obulahi munjila inunji.

¹⁶Yoabu, owa nyinawe yalangwa mbu Seruya; niye owali etswoni yabasikari ba Daudi; Yehoshafati omusiani wa Ahiludi niye owali omulindi wamahandiiko kosi;

¹⁷Sadoku omusiani wa Ahitubu nende Ahimeleki omusiani wa Abiatsari nibo abali abesaalisi; Seraya yali omuhandichi wemise.

¹⁸Benaya omusiani wa Yehoyada yali omusinjil'li wabasikari abalindanga Daudi ne abasiani ba Daudi nabo bali abachetsiyi bomuruchi.