Read lunyore 2 SAMWELI 9 Bible Online

2 SAMWELI 9 - lunyore bible

2 SAMWELI 9

¹Litukhu elala Daudi yareeba mbu, “Mbula yakhabakhwoho mulala khubeinzu ya Saulo oba nasili mwoyo? Naba naliho ndakhekomba okhumukhol'la aketsimbabasi khulwo oluyali lwa Yonatsani.”

²Yaliho omurumikhili undi owomunyumba ya Saulo olangwa Siba. Kho yabool'lwa atsie ha Daudi yali nali. Ma Daudi namureeba mbu, “Niwe Siba?” Naye nakalusia “Nise, omwami.”

³Omuruchi namureeba mbu, “Alikhwoho omundu wosi oba nasili mwoyo khubeinzu ya Saulo owa nyala okhukhol'la aketsimbabasi tsia Nyasaye?” Siba nakalusia naboola mbu, “Asilikhwoho mulala khubasiani ba Yonatsani ne owatsana nomulema.”

⁴Omuruchi nareeba mbu, “Ali hena?” Siba nakalusia mbu, “Ali Lodebari hango ha Makiri omusiani wa Amieli.”

⁵Kho Daudi narumania alangwe.

⁶Olwa Mefiboshetsi, omusiani wa Yonatsani, omwitsukhulu wa Saulo yetsa, yenama imbeli wa Daudi khulwo khumuhelesia oluyali. Daudi yamulanga mbu, “Mefiboshetsi!” Naye nakalusia mbu, “Ndi hano omwami.”

⁷Daudi namubool'la mbu, “Orabba noburi tawe. Nzia okhukhubeela tsimbabasi khulwo oluyali lwa papa uwo Yonatsani. Nzia okhukhukalusisia omukunda kwali kwa kuka uwo Saulo kwosi, ma khandi nohuchil'lwe okhulia khumesa yanje khasotso.”

⁸Mefiboshetsi yenama khandi khulwokhuhaana oluyali ma naboola mbu, “Ise ndi butswa singa imbwa eyafwa omwami! Busina ukhol'le amalahi okhusila?”

⁹Ma omuruchi nalanga Siba, omurumikhili wa Saulo namubool'la mbu, “Mbelesianga Mefiboshetsi, omwitsukhulu womwami uwo, emiandu chiosi echiali chia Saulo nende abeinyumba yiye.

¹⁰Ibe halala nabasiani baabo nende abarumikhili baabo namulimile abeinzu yomwami uwo Saulo omukunda ma namuleere amachese khulwo okhubahelesia ebiakhulia. Nebutswa Mefiboshetsi nalitsenje ebiokhulia khumesa yanje amatukhu kosi.” (Siba yali nabasiani likhumi nabarano nende abarumikhili amakhumi kabili.)

¹¹Siba nakalusia mbu, “Nakhole kosi aka undachile omwami!” Kho, Mefiboshetsi nalia khumesa yomuruchi singa mulala khubasiani bomuruchi.

¹²Mefiboshetsi yali nomusiani omutititi owalangwa Mika. Abeinyumba ya Siba bosi bamala nibaba abarumikhili ba Mefiboshetsi.

¹³Kho Mefiboshetsi, owali niyalema ebilenje bibie biosi, yamenya Yerusalemu nalitsanga ebiokhulia bibie biosi khumesa yomuruchi.