Read lunyore 1 ABARUCHI 1 Bible Online

1 ABARUCHI 1 - lunyore bible

1 ABARUCHI 1

¹Omuruchi Daudi yali niyakhunguhile okhusila, ne kata olwa abatiyibe bamufuunikhanga tsingubo, siyanyoolanga oluya tawe.

²Khulwe yako abemeli babe bamubool'la mbu, “Omwami, lekha khurune omukhaana amenye n'nawe, akhulindenge. Nakonenje ahembi n'nawe khe akhuhelesienjie oluya.”

³Kho nibakhaaba omukhaana owelikondo lilahi mumbeka tsiosi etsia Isiraeli, ne nibanyoola omukhaana Omushunemu owalangwa Abisaki, nibamuleer'ra omuruchi.

⁴Omukhaana uyo yali owelikondo lilahi okhusila, ma nalinda omuruchi bulahi, namurumikhila, nebutswa omuruchi siyabakhwo n'naye tawe.

⁵Ne Adoniya owanyina yalangwa Hagitsi yehila ikulu ma naboola mbu, “Ise nambe omuruchi.” Ma niyelombela amakaari nende etsisululi, nende abasikari amakhumi karaano bokhumulinda.

⁶Daudi samwana siyaali niyamusinyakhwo kata litukhu liosi khulwokhumureeba mbu “Busina okhol'le mbu” tawe? Yali omusaatsa owelikondo lilahi, ne niye owalonda Abisalomu mukhwibulwa.

⁷Yal'loma nende Yoabu owanyina yalangwanga Seruya ma nende Abiatsari owali omwesaalisi, ne nibahuchil'la okhumukhonya.

⁸Nebutswa Sadoku owali omwesaalisi, Benaya omwana wa Yehoyada, Natsani owali omuroobi, Shimei, Rei nende abasikari abalindanga Daudi sibahuchilisania nende Adoniya tawe.

⁹Litukhu elala Adoniya yalomba emisango chiamakondi, tsing'ombe, nende ebimoosi ebinolu khulwanda lweinzokha oluli ahembi nende es'sima siamaatsi sia Enirogeli. Yalanga abaana bomuruchi Daudi bandi ma nende abakholi bomuruchi abarula Yuda okhwitsa khwisabolie liomusango.

¹⁰Nebutswa siyalanga Natsani owali omuroobi, nende Benaya, nende Solomoni omwana wabwe ma nende abasikari abalindanga omuruchi tawe.

¹¹Natsani yatsia khu Batsisheba, nyina Solomoni, namureeba mbu, “Sohuliyekhwo mbu Adoniya owanyina alangwanga Hagitsi wekhol'le okhuba omuruchi tawe? Ne omuruchi Daudi samanyilekhwo tawe.

¹²Niwakhenya okhuhonia obulamubwo nende obwomwanawo Solomoni, ndakhakhwibaal'la mbu

¹³otsie bwangu khumuruchi Daudi ma omureebe mbu, ‘Omwami wanje, omuruchi, siwaisubisia mbu omwana wanje Solomoni yakhabe omuruchi musilenjesio? Kho busina Adoniya naba omuruchi?’ ”

¹⁴Ma Natsani nameeta okhuboola mbu, “Olwa nobe nosil'loma nende omuruchi Daudi, nase nanyinjile ma nandinyilisie amang'ana kaako.”

¹⁵Batsisheba yamala natsia okhulola omuruchi munyumba yokhukona. Omuruchi yali niyasaakhula okhusila ne Abisaki Omushunemu yali namutendanga.

¹⁶Batsisheba niyenamila omuruchi ma omuruchi namureeba mbu, “Wenyanga sina?”

¹⁷Naye nakalusia mbu, “Omwami wanje, wali okhuusubisia muliira lio MWAMI Nyasayewo mbu omwana wanje Solomoni yakhabe omuruchi musilenjesio.

¹⁸Ne luno Adoniya umal'le okhuba omuruchi, ne ibe siomanyilekhwo tawe.

¹⁹Umal'le okhuhaana emisango chietsing'ombe, amakondi nende ebimoosi ebinolu ebinji okhusila. Alanjile abaanabo, nende Abiatsari omuroobi, nende Yoabu omukhongo wabasikaribo khwisabo yilio, nebutswa salangilekhwo omusianiwo Solomoni tawe.

²⁰Omwami wanje, abandu ba Isiraeli bosi bahenganga khu ibe obabool'le niwina owanobe omuruchi musilenjesio.

²¹Nebutswa noraboola, ne olwa nobe nofwiye, ise nende omwana wanje Solomoni khwakhabalwe butswa singa abakholi bobubi.”

²²Ne olwa Berisheba yali nasil'loma nomuruchi, Natsani omuroobi niyenjila hango homuruchi.

²³Omuruchi yabool'lwa mbu Natsani omuroobi wool'le, ma Natsani natsia imbeli womuruchi niyenama.

²⁴Ma naboola mbu, “Omwami wanje, niwe obooye mbu Adoniya abe omuruchi musilenjesio?

²⁵Litukhu lino utsiye okhuhaana omusango kwetsing'ombe, namakondi nende ebimoosi ebinolu ebinji okhusila. Alangile abaanabo, nende Yoabu omukhongo wabasikaribo nende Abiatsari omwesaalisi, ne luno balitsanga nibanywa imbeliwe ne nibaboola, ‘Omuruchi Adoniya ahindile!’

²⁶Nebutswa siyanangilekhwo ise omurumikhiliwo, nende omwesaalisi Sadoku, nohomba Benaya nohomba omusianiwo Solomoni tawe.

²⁷Omwami wanje, okhol'le akene yaka ne sobool'lakhwo abemeli baabo niwina owanobe omuruchi musilenjesio tawe?”

²⁸Omuruchi Daudi naboola mbu, “Bool'le Batsisheba yetse.” Batsisheba niyetsa nasinjila imbeli womuruchi.

²⁹Ma omuruchi namubool'la mbu, “Khusubisinjia imbeli wa Nyasaye oli mwoyo, owambonia mumatinyu kosi,

³⁰mbu leelo ndahesia lisubisio liandakhusubisia muliira lio MWAMI Nyasaye wa Isiraeli, mbu omwanawo Solomoni alaba omuruchi musilenje sianje.”

³¹Batsisheba niyenama hasi ma naboola mbu, “Omwami wanje, omuruchi, ohindile inziayo.”

³²Omuruchi Daudi narumana alangilwe Sadoku, Natsani nende Benaya. Olwa beetsa,

³³yababool'la mbu, “Mutsie nende abakhulundu banje besiina, muniinie omusiani wanje Solomoni khunyumbu yanje, ma mumuhelekhe atsie khusitaho sia Gihoni:

³⁴Sadoku nende Natsani bamutsukhil'lekhwo amafura abe omuruchi wa Isiraeli ma mukhupe olwika nimulanjisia, nimuboola mbu, ‘Omuruchi Solomoni ahindile inziayo.’

³⁵Ma mumulonde inyuma olwa yeetsa okhwikhala khundebe yanje yoburuchi. Niye owanobukule oburuchi okhurula khu ise sichila niye owanzel'le okhuba omuruchi wa Isiraeli nende Yuda.”

³⁶Benaya nakalusia naboola mbu, “Kabe mbwo. OMWAMI Nyasayewo akaralisie.

³⁷Singa obwo MWAMI yabeyenge n'nawe, omuruchi abe nende Solomoni ma akhole obwamibwe bubemwo tsikhabi kata okhuyomba obubwo.”

³⁸Ma Sadoku, Natsani, Benaya ma nende omulindi womwami nibara Solomoni khunyumbu yomuruchi Daudi, nibamuhelekha okhutsia khusitaho sia Gihoni.

³⁹Sadoku nabukula olwika lwamafura olwali mwiheema lio MWAMI ma natsukhiil'la amafura khu Solomoni. Nibakhupa olwika ne abandu bosi nibahanzukha nibaboola mbu, “Omuruchi Solomoni ahindile inziayo.”

⁴⁰Bosi bamala nibamulonda olwayakalukha, nibakhupanga liyoka liobusangali, ne nibakhupa amalele, nibalomba liyoka likali okhwola esibala nisitechel'lakhwo.

⁴¹Ne olwa Adoniya nende abachenibe bali nibamalilanga okhulia, bahul'la liyoka yilio. Olwa Yoabu yahul'la olwika ne nareeba mbu, “Liyoka elirulanga mwitaala yilio neliasina?”

⁴²Nasili kata okhumala okhul'loma ne Yonatsani omwana womwesaalisi Abiatsari niyoolaho, ma Adoniya namubool'la mbu, “Yinjila, okhuba oli omundu omulahi, okhwola obe noleranga amang'ana amalahi.”

⁴³Yonatsani nakalusia nabool'la Adoniya mbu, “Tawe, okhuba omwami wefwe, omuruchi Daudi wemekhele Solomoni okhuba omuruchi;

⁴⁴ma khandi omuruchi arumile Sadoku, Natsani, Benaya ma nende omulindi womuruchi okhumuhelekha. Bamuninisie khunyumbu yomuruchi,

⁴⁵ma Sadoku nende Natsani nibamutsukhil'lakhwo amafura hasitaho sia Gihoni mbu abe omuruchi. Ma nibarulayo nibakalukha mwitookho nibakhupanga liyoka liobusangali, ma abandu bali mukhwekhoya okhukali. Nilio liyoka liamuhuliyenje.

⁴⁶Solomoni luno niye omuruchi.

⁴⁷Abemeli bomuruchi nabo betsele okhwitsoomia omwami wabwe omuruchi Daudi, nibaboola mbu ‘Nyasayewo akalihie eliira lia Solomoni okhuyomba elilio, nakaliyie indebeye okhuyomba eyiyo.’ Ma omuruchi Daudi niyenama khusitandasie,

⁴⁸nasaaya naboola mbu ‘Yetsomibwe OMWAMI, Nyasaye wa Isiraeli okhol'le mulala khubaana banje okhuba omuruchi musilenje sianje litukhu lino nisili omulamu okhukalola.’ ”

⁴⁹Abacheni ba Adoniya bamala nibaria okhusila, ma bosi nibarula nibatsia, buli mundu khunjilaye.

⁵⁰Ne Adoniya yaria Solomoni okhusila, ma narula natsia mwiheema liokhubaho khwo MWAMI natiila tsinzika tsiolusambwa[1].

⁵¹Ma Solomoni, nabool'lwa mbu Adoniya ukhuriiye ma util'le tsinzika tsiolusambwa ma aboolanga mbu, “Okhwola omuruchi Solomoni yandetsubile mbelio mbu sinayanzire tawe.”

⁵²Solomoni nakalusia mbu, “Naba nanyoolekha okhuba omusubilwa, kata liswi elala khumurwekwe sinalitiilwekhwo tawe. Ne nabula okhuba omusubilwa alafwa.”

⁵³Omuruchi Solomoni yamala narumana mbu Adoniya aleerwe okhurula halusambwa. Adoniya yeetsa imbeli womuruchi Solomoni ma niyemana imbeliwe, ma Solomoni namubool'la mbu, “Tsia ingo.”