Read lunyore 1 ABARUCHI 12 Bible Online

1 ABARUCHI 12 - lunyore bible

1 ABARUCHI 12

¹Rehoboamu yatsia Shekemu, ahabandu bosi ba Isiraeli abesinyolu bali nibebunjikhile khulwa okhumukhola omuruchi.

²Olwa Yeroboamu omwana wa Nebati, owali niyatsia Emisiri khulwokhwilukha omuruchi Solomoni yahul'la akene yaka, yakalukha okhurula Emisiri.

³Abandu betsinzibulo tsia Isiraeli yesinyolu barumana mbu alangwe ma nibatsia halala khu Rehoboamu nibamboo'la mbu,

⁴“Papawo Solomoni yakhukhol'la obubi ma nakhurakhwo emisiko emisiro okhukinga. Niwakhanguyia emisiko yitsi ma okhole obulamu bwefwe okhuba obulahi, nakhube abandubo abahulili.”

⁵Rehoboamu nabakalusia mbu, “Namukalukhe inyuma wamatukhu kataru ne namuhelesie likalusio.” Abandu yabo bamala nibarula nibatsia.

⁶Omuruchi Rehoboamu yareeba abasakhulu abalinji abakhongo nende abachetsiyi basamwanawe Solomoni. Nabareeba mbu, “Nelikalusio sina eliamwakhanzechiyia okhuhelesia abandu yaba?”

⁷Nabo nibakalusia mbu, “Niwakhenya okhurumikhila abandu yaba obulahi, ahaane likalusio lilahi khubureebi bwabwe, ne nabakhurumikhilenje mubahulili khasotso.”

⁸Nebutswa yachiayilisia obuchetsiyi bwabakhulundu ne natsia khubabuukha abelikhulalie abali abachetsiyi baabe.

⁹Nabareeba mbu, “Mwakhanzechiyia khole sina? Mwakhenya mbol'le sina abandu abareebanga mbu mbanguyichis'sie emisiro chiabwe?”

¹⁰Ababuukha yabo nibakalusia mbu, “Kano niko akokwana obabool'le, ‘Esitere sianje esitititi nes'siro okhuyomba es'sienje siapapa wanje.

¹¹Papa yara emisiko emisiro khuinywe, nase nandikhole okhuba lisiro okhuyombakhwo habwene yaho. Papa yamukhupilanga olusaala, nase namukhupile esiboko sieingubu.’ ”

¹²Inyuma wamatukhu kataru Yeroboamu nende abandube bosi bakalukha khumuruchi Rehoboamu singa obwa yali nabalachile.

¹³Omuruchi yachaayia obuchetsiyi bwabakhulundu ma nal'lomela abandu yabo obululu,

¹⁴singa obwa yali nachetsiyibwe nende ababuukha. Yababool'la, “Papa wanje yamurakhwo likokolo lisiro, nase nandisitoyie okhuyombakhwo. Yamukhupakanga nolusaala, nase namukhupe nesiboko sieingubu.”

¹⁵Bwali obulalilo bwa Nyasaye okhuhesia akayabool'la Yeroboamu omwana wa Nebati okhubir'ra mumuroobi Ahija okhurula Shilo. Niko akachila omuruchi narahul'la akabandu yabo.

¹⁶Olwabandu balola mbu omuruchi sabahul'langa tawe, bamala nibahanzukha nibaboola, “Nimukabwa sina okwa khuli n'nakwo na Daudi nende abeinzuye? Bakhukhol'lakhwo sina? Abandu ba Isiraeli, chende khutsie ingo; lekha omusiani wa Daudi aruke abeinyumbaye omwene.” Kho abandu ba Isiraeli nibarula nibatsia owabwe.

¹⁷Balekha Rehoboamu nali omuruchi wabandu bamenyanga musibala sia Yuda bonyene.

¹⁸Ma omuruchi Rehoboamu naruma Adoniramu, owali omusinjil'li wabatiyi bokhuhachibwa mbu atsie khu Baisiraeli nebutswa bamulasa namachina ma nibamwira. Omuruchi Rehoboamu yamala naniina mwikarilie niyelukha okhutsia Yerusalemu.

¹⁹Okhurula olwene yilwo abandu belihanga liesinyolu wa Isiraeli baba abeinduli khubeinyumba ya Daudi okhwola leelo.

²⁰Olwabandu ba Isiraeli bahul'la mbu Yeroboamu ukalukhile okhurula Emisiri, bamulanga okhutsia mumukhung'ano kwabandu ma nibamukhola omuruchi wa Isiraeli. Abolwibulo lwa Yuda bonyene nibo abali abasubilwa khubeinyumba ya Daudi.

²¹Olwa Rehoboamu yoola Yerusalemu, yalanga halala abasikari abalulu etsielefu emia ndala nende amakhumi munane okhurula mubetsinzibulo tsia Yuda nende Benjameni. Yenyanga atsie mwihe khulwokhuchelesia oburuchibwe khubandu betsinzibulo tsiesinyolu wa Isiraeli.

²²Nebutswa Nyasaye yabool'la omuroobi Shemaya

²³atsie okhubool'la Rehoboamu nende abandu bosi bolwibulo lwa Yuda nende olwa Benjameni mbu,

²⁴“Muraseera abandu ba Isiraeli abali abaana benywe tawe. Mwesi mukalukhe ingo. Akayekhol'le yako kosi nakobulalilo bwanje.” Bosi bahulila lilako lio MWAMI ma nibakalukha ingo.

²⁵Omuruchi Yeroboamu yombokha oluhinga olutinyu okhusira litaala lia Shekemu mubikulu bia Efuraimu ma namenyayo khulwamatukhu akahel'le. Yarulayo ma niyombokha oluhinga okhusira litaala lia Penueli.

²⁶Ma omuruchi Yeroboamu napaara mumwoyokwe lmbu, “Luno oburuchi nabukalukhile abeinyumba ya Daudi

²⁷nikakhaba abandu yaba bakhatsia Yerusalemu okhuhaana emisango muhekaluyo MWAMI. Bakhahaana oluyali khumuruchi Rehoboamu wa Yuda ma nabanzire.”

²⁸Namal'le okhukapaarakhwo, yalomba ebimoosi ebichulukhi b'bili ebietsahabu ma nabool'la abandube mbu, “Mwayesombele oluhono Yerusalemu okhwekayakaya. Lole yaba nibo abanyasaye benywe inywe Abaisiraeli, nibo abamuhinia Emisiri.”

²⁹Yara sil'la khubimoosi yibio mu Betseli ne esindi mu Dani.

³⁰Ma abandu nibakhola tsimbi khulwokhutsia okhwekayakaya Betseli nende Dani.

³¹Yeroboamu khandi yombokha habundu hokhwekayakaya khubikulu, ma niyeela abesaalisi okhurula mutsinyumba etsiraali etsiolwibulo lwa Lawi.

³²Khandi Yeroboamu yachaakia lisabo khwitukhu lielikhumi nakharano mumwesi kwamunane, singa lisabo elibetsanga mu Yuda. Yakhol'la emisango khulusambwa olubetsanga Betseli ma natsihaana khubimosi bietsahabu ebiayali niyalomba. Khandi yara abesaalisi mu Betseli abakhurumikha buli habundu hokhwekayakaya hayli niyombokhele.

³³Ne khwitukhu lielikhumi nakharano mumwesi kwamunane, litukhu liomwene yali niyachoomia, yatsia Betseli ma nahaana omusango khulusambwa khulwokhuhesia lisabo eliayachiachila abandu ba Isiraeli.