Read lunyore 1 ABARUCHI 13 Bible Online

1 ABARUCHI 13 - lunyore bible

1 ABARUCHI 13

¹Omuroobi okhurula Yuda yarumwa nende Nyasaye okhutsia Betseli, ne olwa yoolayo yanyoola Yeroboamu nasinjiye halusambwa khulwokhuhaana omusango.

²Singa OMWAMI yali namulakile, omuroobi uyo yasuula olusambwa yilwo khulwo khuboola mbu; “Ibe olusambwa, olusambwa kano niko ako MWAMI aboolanga: Omwana oweliira liakhabe Yosia yakhebulwe munyumba ya Daudi. Yakher're khu ibe abesaalisi abarumikhanga khutsisambwa tsiabanasibala, abahaananga emisango khuibe, ne yakhasambile ebikumba biabandu khuibe.”

³Ma omuroobi uyo natsilil'la okhuboola mbu: “Olusambwa yilu nalukwe hasi ma nalusalikhe ne likokhe elilikhwo nalisalanibwe. Nilwo olwa mwakhamanye mbu OMWAMI ul'lomeye muise.”

⁴Olwomuruchi Yeroboamu yahul'la yaka, yasonia omuroobi omukhono ma nalaka mbu, “Tiile omundu uyu!” Ne omukhonokwe okwa yasonia nikwoma, ma sikwaali okwanyala okhufumba tawe.

⁵Olusambwa lwamala nilukwa ma nilwatikha ma likokhe nilisasikha hasi singa obwomuroobi yali naroobele muliira lio MWAMI.

⁶Omuruchi Yeroboamu nabool'la omuroobi uyo mbu, “Yanza usaayile khu MWAMI Nyasayewo, omureebe ahonie omukhono kwanje.” Omuroobi nasaaya khu MWAMI ma omukhono kwomuruchi nikuhona.

⁷Ma omuruchi nabool'la omuroobi mbu, “Khutsie n'nawe ingo wanje onyoole esiokhulia. Nakhuhelesie omurungo khukosi akokhol'le.”

⁸Omuroobi nakalusia mbu, “Kata niwakhambelesia enusu yobuhindabwo, sindakhatsia n'nawe nohomba okhulia noho okhunywa esindu siosi n'nawe tawe.

⁹OMWAMI yaindachile mbule okhuliakhwo nohomba okhunywakhwo esindu siosi, nohomba kata okhukalukha ingo khunjila yanzitsiyekhwo.”

¹⁰Ma siyamala nakalukhila khunila yayetselakhwo tawe, nebutswa yakalukhila khunjila yindi.

¹¹Olwene yilwo yaliho omuroobi omukhulundu owamenyanga Betseli. Abaanabe beetsa nibamubool'la akomuroobi okhurula Yuda yali nakhol'le Betseli litukhu yilio ma nende akayali nabooleye omuruchi Yeroboamu.

¹²Omuroobi mukhulundu uyo nabareeba mbu, “Atsiliye khunjila sina olwarul'le?” Nibam'manyia injila tsana.

¹³Yabool'la abaanabe bamulombele epundaye, ma nibamulombela ne

¹⁴nalonda omuroobi wa Yuda uyo, namunyoola niyekhaye hasi womusaala kwomuruba. Namureeba mbu, “Ibe niwe omuroobi okhurula Yuda?” Naye nakalusia mbu, “Nise.”

¹⁵Namubool'la mbu, “Chenda khutsie owanje olieyo ebiakhulia.”

¹⁶Nebutswa omuroobi wa Yuda nakalusia mbu, “Sinyala okhukalukha n'nawe, kata okhwinjila owuwo tawe, kata sindakhaliakhwo nohomba okhunywakhwo esindu siosi yino tawe.

¹⁷Okhuba OMWAMI yaindachile mbu mbule okhuliakhwo nohomba okhunywakhwo esindu, khandi mbule okhukalukha ingo khunjila yanzitsiyekhwo.”

¹⁸Naye omuroobi omukhulundu wa Betseli namubool'la mbu, “Ise khandi ndi omuroobi singa ibe, ne khulwe lilako lio MWAMI om'malaika yamboleye khuyile ingo wanje ma khutende.” Nebutswa omuroobi mukhulundu uyo yomukaatanga butswa.

¹⁹Ma omuroobi wa Yuda nakalukha n'naye ma nalia ebiakhulia munyumbamwe, khandi nanywamwo amaatsi.

²⁰Olwa bali nibasikhaye khumesa, ling'ana lio MWAMI lietsa khumuroobi mukhulundu uyo,

²¹ma nalanjisia khumuroobi wa Yuda, naboola, “OMWAMI aboolanga mbu obul'le okhulonda amang'ana ke, khandi siokhol'le aka yali okhukhulaka tawe.

²²Musilenje isio okalukhile ma nolia ebiakhulia habundu hayakhulachile obule okhulia. Khulwe yako witsa okhwirwa, ne om'bilikwo sinakuyabilwe musilindwa siabandu beinyumbayo tawe.”

²³Olwa bamala okhulia, omuroobi mukhulundu yarechekhela omuroobi wa Yuda epunda khulwokhuninakhwo

²⁴owamala naninakhwo ma natsia. Olwa yali nali khunjila, yakaana nende esimba ma nemwira. Om'bilikwe kwakwa khunjila ma epundaye nende esimba nibisinjila ahembi n'nakwo.

²⁵Abandu nalebe babir'raho ne nibalola om'bili nikuli khunjila ne esimba nesinjiye ahembi n'nakwo. Batsia Betseli nibaboola akabali nibaluutsi.

²⁶Olwo muroobi omukhulundu, yakahul'la yaboola mbu, “Uyo nomuroobi owabula okhulonda amalako ko MWAMI! Khulwe yako OMWAMI arumile esimba okhumuseera ma nemwira, singa obwo MWAMI yabooye nakhole.”

²⁷Ma nabool'la abasianibe mbu, “Murechekhele epunda yanje.” Nabo nibakholambwo,

²⁸ma narula natsia nanyoola om'bili kwomuroobi uyo nikuli khunjila ne epundaye nende esimba nibisisinjiye ahembi n'nakwo. Esimba siyali neliye om'bili tsana kata okhuseera epunda tawe.

²⁹Omuroobi mukhulundu, uyo nabukula om'bili yikwo, nakura khupunda, ma nakukalusia Betseli khulwokhwekhuula nende okhukuyabila.

³⁰Yakuyabila mubilindwa biabeinyumbaye, ma ye nende abasianibe nibakwekhuula nibaboola mbu, “Woowe, omwana wefwe!”

³¹Inyuma wokhukuyabila, omuroobi nabool'la abasianibe mbu, “Olwa ndakhafwe mulanzabile musilindwa yisi ma mulare om'bili kwanje ahembi nokukwe.

³²Amang'ana akayal'loma ako OMWAMI yamulaka aboole khulwokhufukula olusambwa lwa Betseli khandi okhufukula habundu hokhwekayakayila mwitookho lia Samaria siahene kakhekhole.”

³³Omuruchi Yeroboamu wa Isiraeli siyalekha tsinjila tsie etsiobubi tawe, nebutswa yatsilil'la okhwela abesaalisi okhurula mutsinyumba etsirali tsiabesaalisi khulwokhurumikha khutsisambwa etsia yali niyombokha. Omundu wosi owenyanga okhuba omwesaalisi yamwahulanga namurakhwo omukhono.

³⁴Ling'ana yili liali tsimbi khubeinyumba ya Yeroboamu ma nikachila obwami bwabwe nibukwa khandi nibamumwa okhurula khusibala.