Read lunyore 1 ABARUCHI 14 Bible Online

1 ABARUCHI 14 - lunyore bible

1 ABARUCHI 14

¹Mumatukhu kene yako omwana wa Yeroboamu owalangwa Abiya yalwala.

²Yeroboamu nabool'la omukhasiwe mbu, “Ekalukhanie wabiikhe lukano, omundu wosi abule okhukhumanya ma otsie Shilo ahomuroobi Ahija owaboola mbu ndakhabe omuruchi wa Isiraeli amenyele.

³Omuhil'le emikaati likhumi, etsikeki ma nende esimuka siobukhi. Omureebe esianasiekhole khumwana wefwe, ne naye nakhubool'le.”

⁴Kho mukha Yeroboamu natsia hango ha Ahija mu Shilo. Ne Ahija yali niyabofula khulwobukhungu.

⁵OMWAMI yali nambooleye mbu mukha Yeroboamu yeetsanga okhumureeba akomwanawe owali omulwaye. Ma OMWAMI yali nabooleye Ahija akanyala okhukalusia. Olwa mukha Yeroboamu yoolayo yefwanania okhuba omundu undi.

⁶Nebutswa olwa Ahija yahul'la niyenjilanga m'muliango, yaboola mbu, “Injila, manyile oli mukha Yeroboamu. Busina wefwananinjia okhuba omundu undi? Ndi namang'ana amabi khuibe.

⁷Tsia obool'le Yeroboamu mbu kano niko ako MWAMI Nyasaye wa Isiraeli aboolanga khuye: ‘Ndakhweela okhurula mubandu ma nikhukhola omuruchi wabandu banje ba Isiraeli.

⁸Ndahinia oburuchi khubolwibulo lwa Daudi ma nikhuhelesia. Nebutswa sioli singa omurumikhili wanje Daudi owali omuhulili khuise tawe. Ye yalonda amalako kanje nende okhukhola yako akandali nimbuchiliye.

⁹Ibe wakhola tsimbi tsingali okhuyomba bosi abaruka imbeliwo. Waisuula ma wainder'ra lileko khulwokhulomba abanyasaye bebibia abawinamilanga.

¹⁰Khulweyako nandeere likhupako khubeinyumbayo ma nanzire abes'saatsa bosi abolwibulolwo, mbu ababuukha nende abakhulundu. Ndakhamulule abeinyumbayo bosi, bakheywe bosi singa obusingo.

¹¹Omundu wosi khubeinyumbayo owakhafwile mwitookho yakhalibwe nende tsimbwa, ne wosi owakhafwile esioba welitookho yakhalibwe netsisori. Ise OMWAMI mal'le okhuboola!’ ”

¹²Ahija yatsilil'la okhubool'la okhubool'la mukha Yeroboamu mbu “Luno rula otsie ingo. Olwa witsa okhuba niwakhenjila butswa mwitaala ne omwanawo alafwa.

¹³Abandu bosi ba Isiraeli nabamwekhuule ma nabamuyabile. Niye owomunyumba ya Yeroboamu owanoyabilwe bulahi yenyene, sichila niye yenyene owo MWAMI Nyasaye wa Isiraeli asangasibwe n'naye.

¹⁴OMWAMI nahelesie Isiraeli omuruchi owanohinieho oburuchi bwa Yeroboamu.

¹⁵OMWAMI yakhahelesie Isiraeli esinyasio, ne liakhabe butswa singa litundu elitechel'langa mumuchela. Yakhahinie abandu ba Isiraeli okhurula mwiloba lilahi yili eliayahelesia abakuka babwe, ma alabasalaanie imbeli womuchela kwa Efurate, sichila basenuye lileko lilie khulwikhulomba ebiniini ebiokhwekayakaya biomunyasaye omukhasi olangwanga Ashera.

¹⁶OMWAMI yakhakhupe Isiraeli omukongo sichila Yeroboamu wayona khandi wainjisia abandu ba Isiraeli mutsimbi.”

¹⁷Mukha Yeroboamu yakalukha Tirisa. Olwa yenjila butswa munyumbamwe ne omwanawe nafwa.

¹⁸Abandu ba Isiraeli bamwekhuula ma nibamuyabila singa obwo MWAMI yali nabooye okhubir'ra mumurumwawe, omuroobi Ahija.

¹⁹Amang'ana kandi kosi aka Yeroboamu yakhola, amahe kayalwana nende singa obwayaruka, kahandiikwa musitapu siamang'ana ketsinyinga tsiabaruchi ba Isiraeli.

²⁰Yeroboamu yaruka emihika amakhumi kabili nende chibili. Yafwa ma nayabilwa ne omwanawe Nadabu yaruka musilenje sisie.

²¹Omwana wa Solomoni owalangwa Rehoboamu yali nemiyika amakhumi kane olwa yakholwa omuruchi wa Yuda. Yaruka khulwemihika likhumi nachine nachitaru mu Yerusalemu, litookho elio MWAMI yali niyeela okhurula mutsisoma tsiosi etsia Isiraeli singa habundu hahe hokhwekayakayilwa. Nyina Rehoboamu Nama okhurula Amoni.

²²Abandu ba Yuda bakhol'la OMWAMI tsimbi ma nibakhola amenji okhuchema lilekolie khubo okhunyomba singa abakuka babwe bosi bali nibakhola.

²³Bombokha habundu hokhwekayakayila abanyasaye barali abatooto, ne nibombokha etsisiilo tsiamachina nende ebifwanani bia Ashera ebiokhwekayakayila khubikulu nende isi wemisaala chiesinikha.

²⁴Ne akali amabi okhuyomba akandi kosi, baliho abasaatsa abarumikhanga singa abatamba habundu hokhwekayakayila nabanasibala. Abandu ba Yuda bakhola amang'ana kes'simba murwe akakholungwa nende abandu abo MWAMI yali niyahinia musibala olwa Abaisiraeli benjila musibala yisio.

²⁵Mumuhika kwakharano okwoburuchi bwa Rehoboamu, omuruchi Shishaki we Misiri yaseera Yerusalemu.

²⁶Yabukula ebindu biosi ebiobukusi ebiali mu Hekalu nende munyumba, yoburuchi nibilimwo ebikhumba ebia Solomoni yalomba.

²⁷Khulwo khukalusiaho ebindu bindi omuruchi Rehoboamu yalomba ebikhumba biomukasa ma nabira hasi habulindi bwabasikari abalindanga omuliango kweinyumba yomuruchi.

²⁸Buli lwosi olwomuruchi yatsitsanga mu Hekalu, abalindi yabo bachinganga ebikhumba, ma khandi babikalusia musikoti siobulindi.

²⁹Amang'ana kandi kosi akomuruchi Rehoboamu yakhola kahandiikwa musitapu siamang'ana ketsinyinga tsiabaruchi ba Yuda.

³⁰Mumatukhu yaka kosi obulwani bwalinjiho hakari wa Rehoboamu nende Yeroboamu.

³¹Rehoboamu yafwa ma nayabilwa mubilindwa bioburuchi mwitookho lia Daudi, ne omwanawe Abiya nabukula oburuchi musilenjesie.