Read lunyore 1 ABARUCHI 15 Bible Online

1 ABARUCHI 15 - lunyore bible

1 ABARUCHI 15

¹Mumuhika kwelikhumi namunane okwoburuchi bwa Yeroboamu wa Isiraeli, Abiya yakholwa okhuba omuruchi wa Yuda,

²ma naruchila mu Yerusalemu emihika chitaru. Eliira lia nyina liali Maaka omukhaana wa Abisalomu.

³Yakhola tsimbi etsifwana nende etsia Papawe Rehoboamu ma siyaali omusubilwa khu MWAMI Nyasayewe singa Daudi kukanyene yali tawe.

⁴Nebutswa khulwo luyali lwa Daudi, OMWAMI Nyasaye yahelesia Abiya omusiani owaruka musilenjesie mu Yerusalemu nende naralisia Yerusalemu.

⁵OMWAMI yakhola yaka sichila Daudi yali niyakhola okamuyanzisia ma siyafukulakhwo amalako kaake kosi tawe, nikarali amang'ana ka Uria Omuhiti konyene.

⁶Lihe eliali niliachikaka hakari wa Rehoboamu nende Yeroboamu liatsilil'la mumatukhu kobulamu bwa Abiya kosi.

⁷Ne amang'ana kandi kosi aka Abiya yakhola kahandiikwa musitapu siamang'ana ketsinyinga tsiabaruchi ba Yuda.

⁸Abiya yafwa ma nayabilwa mwitookho lia Daudi, ne omwanawe Asa nabukula oburuchi musilenjesie.

⁹Mumuhika kwamakhumi kabili okwoburuchi bwa Yeroboamu wa Isiraeli, Asa yakholwa omuruchi wa Yuda,

¹⁰ne naruka emihika amakhumi kane nende mulala mu Yerusalemu. Kukhunyene yali Maaka omukhaana wa Abisalomu.

¹¹Asa yakhola amang'ana akayanzisia OMWAMI, singa kukanyene Daudi yakhola.

¹²Yahiinia musibala yisio abasaatsa bosi abali abatamba abarumikhanga habundu hokhwekayakaya abanyasaye abanasibala, ma nahinia ebiniini biosi ebiabakuka baabe abaruchi ba Yuda bali nibalomba.

¹³Yahinia kukhunyene Maaka khubwemelibwe singa nyina omuruchi, sichila yali nalombele esiniini sies'sinyo sianyasaye mukhasi wolwibulo olangwa Ashera. Asa yaremania esiniini yisio ma nasisambila mwibanda lia Kidironi.

¹⁴Kata nikali mbu Asa siyayoninia habundu hokhwekayakayila hosi tawe, yali omusubilwa khu MWAMI amatukhu kobulamubwe kosi.

¹⁵Yara mu Hekalu ebindu biosi ebiasamwana yali niyahaana khu Nyasaye, halala nende etsahabu nende efetsa ebiaye omwene yali niyasiiya ma niyabihaana.

¹⁶Omuruchi Asa wa Yuda nende omuruchi Baasha wa Isiraeli balwananga amatukhu koburuchi bwabwe kosi.

¹⁷Baasha yaseera Yuda ma nachaaka okhwombokha amasisi okhubotokhana Rama khulwo okhwikal'la abandu balekhe okhurula nohomba okhwinjila mu Yuda.

¹⁸Ma omuruchi Asa nabukula etsahabu yosi nende efetsa eyali niyasikala mu Hekalu nende mutsinyumba tsioburuchi, nabihaana mumakhono kabalala khubakhongo babe bahile Damasiko khumuruchi Beni Hadadi wa Siria, omwana wa Tabirimoni, owali omwitsukhulu wa Hesironi, halala nende oburume yib:

¹⁹“Lekha khuhambane singa abapapa befwe balinji. Efetsa yino nende etsahabu ino nesihanwa sisio. Luno funaka obwikhobwo nende omuruchi Baasha wa Isiraeli, khe abe onyala okhuhiinia abasikaribe musibala sianje.”

²⁰Omuruchi Beni Hadadi yahuchil'la amang'ana ka Asa ma naruma abakhongobe abamahe nende abasikari babwe okhuseera amatookho ka Isiraeli. Bafumila Ijoni, Dani, Abeli Betsi Maaka, esibala siali ahembi nende inyanza ya Galilaya nende olusoma lwa Nafutali lwosi.

²¹Olwomuruchi Baasha yahul'la akali nikekhol'le, yalekha okhwombokha lisisi lia Rama ne natsia Tirisa.

²²Ma omuruchi Asa naruma lilako musibala sia Yuda siosi narunanga abandu bosi batsie okhukhonya okhuhiinia amachina nende tsimbao okhurula Rama ebia Baasha yarumikhilanga okhwombokha amasisi kalio. Asa yarumikhila ebindu yibio okhwombokha Misipa nende Geba, litookho eliali mulusoma lwa Benjameni.

²³Amang'ana kandi kosi akomuruchi Asa yakhola, ebikholebie ebiolutswoni biosi nende amataala akayombokhakhwo amasisi, biahandikwa musitapu siamang'ana ketsinyinga tsiabaruchi ba Yuda. Nebutswa mubusakhulubwe, yalema khulwobulwaye bwebilenje.

²⁴Asa yafwa ma nayabilwa mubilindwa bioburuchi mwitookho lia Daudi, ne omwanawe Yehoshafati yamala nabukula oburuchi musilenjesie.

²⁵Mumuhika kwakhabili okwoburuchi bwa Asa wa Yuda, omwana womuruchi Yeroboamu owalangwa Nadabu yakholwa omuruchi wa Isiraeli ma naruka khulwemihika chibili.

²⁶Yakhola akali amabi imbeli wo MWAMI singa samwana ma niyenjisia Isiraeli mutsimbi.

²⁷Baasha omwana wa Ahija, owolwibulo lwa Isakari, yaloosia masilisi okhwira Nadabu ma yamala namwira olwa Nadabu nende mbasikaribe bali nibaseeranga litookho lia Gibetsoni mu Filisiti.

²⁸Kano kekhola mumuhika kwakhataru okwoburuchi bwa Asa wa Yuda. Ma Baasha nabukula oburuchi bwa Isiraeli okhurula khu Nadabu.

²⁹Obwangu bwa yali niyakhabukula oburuchi, yachaaka okhwira abeinyumba ya okhwira abeinyumba ya Yeroboamu. Okhulondokhana nende ako MWAMI yali niyaboola okhubir'ra mumurumikhiliwe omuroobi Ahija okhurula Shilo, abeinyumba ya Yeroboamu bosi beerwa, kata mulala yenyene siyasikalakhwo tawe.

³⁰Kano kekhola sichila Yeroboamu yachema OMWAMI, Nyasaye wa Isiraeli lileko khulwe tsimbi etsiayakhola ma khandi niyenjisia Isiraeli mutsimbi.

³¹Amang'ana kandi kosi aka Nadabu yakhola kahandiikwa musitapu siamang'ana ketsinyinga tsiabaruchi ba Isiraeli.

³²Omuruchi Asa wa Yuda nende omuruchi Baasha wa Isiraeli balwananga lihe amatukhu koburuchi bwabwe kosi.

³³Mumuhika kwakhataru okwoburuchi bwa Asa wa Yuda, Baasha omwana wa Ahija yakholwa omuruchi wa Isiraeli yosi, ma naruka Tirisa khulwemihika amakhumi kabili nende chine.

³⁴Ne yakhola akali amabi imbeli wo OMWAMI singa omuruchi Yeroboamu ma niyenjisia Isiraeli yosi mutsimbi.