Read lunyore 1 ABARUCHI 16 Bible Online

1 ABARUCHI 16 - lunyore bible

1 ABARUCHI 16

¹OMWAMI yal'loma khumuroobi Yehu omwana wa Hanani ma namuhelesia oburume buno ahil'le Baasha:

²“Ibe siwalikhwo esindu siosi tawe, nebutswa ndakhukhola omwemeli wabandu banje ba Isiraeli. Ne luno umal'le okhwona singa Yeroboamu ma winjisisie abandu banje mutsimbi. Tsimbi tsiabwe tsisenuye lileko lianje,

³khulweyako namulule ibe nende inyumbayo yosi, singa obwandakhol'la Yeroboamu.

⁴Abandu beinyumbayo bosi abakhafwile mwitookho bakhalibwe nende tsimbwa ne bosi abakhafwile esioba welitookho bakhalibwe nende etsisori.”

⁵Amang'ana kandi kosi aka Baasha yakhola, nende ebikholwabie biosi ebiolutswoni kahandiikwa musitapu siamang'ana ketsinyinga tsiabaruchi ba Isiraeli.

⁶Baasha yafwa ma nayabilwa mu Tirisa, ne omusianiwe owalangwa Ela nobukula oburuchi musilenje sie.

⁷Oburume bwo MWAMI obwetsela Baasha khulwokhumufukula nende abeinyumbaye bwahaanwa nende omuroobi Yehu omusiani wa Hanani khulwe tsimbi etsia Baasha yakhol'la OMWAMI. Siyachema butswa lileko lio MWAMI khulwobubi bwayokhola bwonyene singa omuruchi Yeroboamu yali niyakhola tawe, nebutswa sichila khandi yeera abeinyumba ya Yeroboamu bosi.

⁸Mumuhika kwamakhumi kabili nakhasasaba okwoburuchi bwa Asa wa Yuda, Ela omusiani wa Baasha yakholwa omuruchi wa Isiraeli, ma naruka mu Tirisa khulwemihika chibili.

⁹Ne mulala khubakhongo owalangwa Simiri owasinjil'langa enusu yamakaarike yamukhol'la induli. Litukhu elala olwa yali Tirisa nanywetsanga amalwa munyumba ya Arisa owasinjil'langa inyumba yomuruchi,

¹⁰Simiri yenjila munyumba yimwo ne niyeera Ela ma nabukula oburuchi. Kano kekhola muhika kwamakhumi kabili nende khane nakhataru okhwoburuchi bwa Asa wa Yuda.

¹¹Obwangu bwa Simiri yali niyakhaba omuruchi yeera abeinyumba ya Baasha bosi. Abekho bosi nende abalina abasaatsa beerwa.

¹²Ma okhulondokhana nende ako MWAMI yali niyaboola khu Baasha okhubir'ra mumunwa kwomuroobi Yehu, Simiri yeera abeinyumba ya Baasha bosi.

¹³Khulwo khwekayakaya ebiniini khwabwe, khandi sichila benjisia Isiraeli mutsimbi, Baasha, nende omwanawe Ela, bachema lileko lio MWAMI Nyasaye wa Isiraeli.

¹⁴Amang'ana kandi kosi aka Ela yakhola kahandiikwa musitapu siamang'ana ketsinyinga tsiabaruchi ba Isiraeli.

¹⁵Mumuhika kwamakhumi kabili nende chine nachitaru okwoburuchi bwa Asa wa Yuda, Simiri yaruka mu Tirisa Isiraeli khulwamatukhu kane nakataru. Abandu bamahe ka Isiraeli bali nibafumbiye litaala lia Gibetsoni eliali mu Filisiti.

¹⁶Olwa babool'lwa mbu Simiri yali niyekonekheye omuruchi ma namwir're, bamala bakhola omiri owali omwemeli wamahe okhuba omuruchi wa Isiraeli litukhu yilio.

¹⁷Omiri nende abasikari babe barula Gibetsoni nibatsia okhuseera Tirisa.

¹⁸Ne olwa Simiri yalola mbu litookho libukuywe, yenjila musikoti siomukari munyumba yoburuchi, ma nahambia inyumba yosi omul'lo ma nafwilamwo.

¹⁹Kano kekhola khulwe tsimbi tsitsie khu MWAMI. Yakhola singa Yeroboamu owali omuruchi imbeliwe, ma yamala nabula okhuyanzisia OMWAMI khulwe tsimbi tsitsie nende khulwo khwinjisia Isiraeli mutsimbi.

²⁰Amang'ana kandi kosi aka Simiri yakhola halala nende obusiemanibwe, kahandiikwa musitapu siamang'ana ketsinyinga tsiabaruchi ba Isiraeli.

²¹Abandu ba Isiraeli bakabukhana mumikanda chibili: omukanda mulala kwalonda Tibini omwana wa Ginatsi khulwokhumukhola omuruchi, ne okundi nikulonda Omiri.

²²Abalonda Omiri bamala banyoola obulechi, ma Tibini yamala nafwa ne Omiri nakholwa omuruchi.

²³Ma mumuyika kwamakhumi kataru nende l'lala okwoburuchi bwa Asa wa Yuda, Omiri yakholwa okhuba omuruchi wa Isiraeli, ma naruka khulwemihika likhumi nachibili. Emihika chiokhuranga chisasaba yaruchila mu Tirisa.

²⁴Ne yamala nakula esikulu sia Samaria okhurula khu Shemeri khulwebitonye biefetsa etsielefu tsisasaba. Omiri yombokha khusikulu yisio litaala ma nalikulikhe Samaria, khulira lia Shemeri owali mwene sikulu yisio.

²⁵Omiri yakhola tsimbi imbeli wo MWAMI okhuyomba bosi abamuranjil'la.

²⁶Okhuba yakhola kosi aka Yeroboamu wa Nebati yakhola ma nasenula lileko lio MWAMI, Nyasaye wa Isiraeli khulwe tsimbi tsitsie nende okhwemel'la Abaisiraeli khulwebiniini biabenamilanga.

²⁷Amang'ana kandi kosi aka Omiri yakhola, halala nende obululubwe kahandiikwa musitapu siamang'ana kabaruchi ba Isiraeli.

²⁸Omiri yafwa ma nayabilwa mu Samaria, ne omwanawe Ahabu yaruka musilenjesie.

²⁹Mumuhika kwamakhumi kataru nende munane okwoburuchi bwa Asa wa Yuda, Ahabu omwana wa Omiri yakholwa okhuba omuruchi wa Isiraeli ma naruchila mu Samaria khulwemiyika amakhumi kabili nende chibili.

³⁰Yakhol'la OMWAMI tsimbi okhuyomba bosi abamuranjil'la.

³¹Yakhola singa owalola mbu tsimbi tsia Yeroboamu sitsiahela tawe, na nabiriil'la mukhutesia Yesebeli omukhaana wa Etsibaali omuruchi wa Sidoni, ma nachaaka okhwekayakaya Baali.

³²Yombokhela Baali ehekalu mu Samaria, ma nalomba esitsu sia Baali ma nasira muhekalu.

³³Khandi yalomba esifwanani sia Ashera omunyasaye wesikhasi. Yameeta butswa okhusenula lileko lio MWAMI, Nyasaye wa Isiraeli, okhuyomba abaruchi bandi ba Isiraeli bosi abamuranjil'la.

³⁴Mumatukhu koburuchi bwe Hieli okhurula Betseli yombokha Yeriko obuhia. Singa OMWAMI yali niyaribula okhubir'ra mumunwa kwa Yoshwa omwana wa Nuni, Hieli yakosia omwanawe omukhulundu owalangwa Abiramu olwa yara omusinji kwa Yeriko, ma khandi nakosia omwanawe omukhokosi owalangwa Sekubu olwa yombokha ebilibwa.