Read lunyore 1 ABARUCHI 17 Bible Online

1 ABARUCHI 17 - lunyore bible

1 ABARUCHI 17

¹Omuroobi owalangwa Eliya, okhurula Tishibe litaala lia Gileadi yabool'la omuruchi Ahabu mbu, “Mulira lio MWAMI, Nyasaye wa Isiraeli oli mwoyo, oweise rumikhilanga, khubol'langa mbu elime nohomba ifula sinabibekhwoho khulwemihika mitititi echili hambeli yitsi tawe okhwola olwa ndiboola kabe mbwo.”

²Ma OMWAMI nabool'la Eliya mbu,

³“Rula hano, otsie ebukwe webise hamuchela kwa Keritsi, okuli ebukwe wa Yorodani.

⁴Nonywetsenje amaatsi komuchela yikwo, ne ndachile amakhokho nakakhuler'renge ho ebiakhulia.”

⁵Eliya yalonda lilako lio MWAMI ma natsia okhumenya hamuchela kwa Kheritsi.

⁶Yanywetsanga amaatsi okhurula mumuchela yikwo ne amakhokho kamuler'ranga omukaati nende inyama buli khumukamba nende khumukolooba.

⁷Olunyumakhwo omuchela yikwo kwamala nikukhama sichila ifula siyaali nekwitsanga tawe.

⁸Ma OMWAMI nabool'la Eliya mbu,

⁹“Rula otsie mwitaala lia Sarefatsi elili ahembi nende Sidoni ma amenyeyo. Ndachile omukhasi omulekhwa omenyele ebwene yiyo akhulisinjie.”

¹⁰Ma Eliya yarula natsia Sarefatsi, ne olwa yoola musilibwa sielitaala, yalola omukhasi omulekhwa nareenyanga tsikhwi. Yamulanga namubool'la mbu, “Yanza under'rekhwo amaatsi kokhunywa.”

¹¹Ne olwomukhasi uyo yali natsitsanga okhumuleer'ra amaatsi yamulanga namubool'la, “Khandi oyanze under'rekhwo esiakhulia sitititi.”

¹²Omukhasi mulekhwa uyo yamukalusia naboola, “Ndesuhanga khu Nyasaye oli mwoyo mbu sindikhwo nende esindu siosi esiteekhe tawe. Ndibutswa nende obufu mufuusi nende orufuura ruti muchupa. Nzitsile okhurenya tsikhwi mbile ingo ma nombe siti siandi n'nasio khulwomwana wanje n'nase, khulie ma khufwe.”

¹³Eliya namubool'la mbu, “Orahenda omwoyo tawe, tsia okhole singa mbooye, ne orange okhulomba omukaati under're esioba yino, ma khe olunyuma olombe okukwo nende omwanawo.

¹⁴Okhuba kano niko ako MWAMI Nyasaye wa Isiraeli aboolanga: ‘Obusie sibwakhahwe mundabuyo nohomba amafura okhuhwa muchupa okhwola litukhu lieise OMWAMI ndakhakwisie ifula khusibala.’ ”

¹⁵Omukhasi mulekhwa uyo yatsia nakhola singa Eliya yali nam'boleye, ma bosi nibaba nende ebiakhulia bihela khulwamatukhu amenji.

¹⁶Obusie sibwahwa mundabu nohomba amafura okhuhwa muchupa tawe singa obwo MWAMI yali nalachile okhubir'ra mumunwa kwa Eliya.

¹⁷Inyuma wamang'ana yako omwana womukhasi mulekhwa uyo yalwala, obulwaye nibuba obwinji okhusila okhwola nafwa.

¹⁸Omukhasi mulekhwa uyo nabool'la Eliya, “Omundu wa Nyasaye, Esichil'le niukhol'la kano nisina? Waitsile hano okhwitsusia Nyasaye tsimbi tsianje ma ochile omwana wanje afwe noho?”

¹⁹Eliya namukalusia mbu, “Mbelesia omwana uyo.” Ma nabukula omwana okhurula mumakhono kanyina, namuchinga natsia n'naye mukorofa musikoti siayakonangamwo ma namukonia khusitanda.

²⁰Ma nasaaya butinyu naboolanga, “O, OMWAMI Nyasaye wanje, busina okhol'le ling'ana libibiibi lino khumukhasi mulekhwa uyu? Yainindile bulahi ne nawe wir're omwanawe.”

²¹Ma Eliya niyelambisia khumwana tsana esiakhataru ne nasaaya naboola, “O, OMWAMI Nyasaye wanje, kalusia obulamu bwomwana uno.”

²²OMWAMI yakalusia lisaayo lia Eliya, omwana nachaaka okhuheelana khandi ma naba omulamu.

²³Eliya yamala nakalusia omwana musikoti siahasi ahanyina yali nali ma namubool'la, “Lola omwanawo ali mwoyo.”

²⁴Omukhasi uyo nakalusia, “Luno manyile mbu oli omundu wa Nyasaye ne tooto mwene OMWAMI al'lomelanga muibe.”