Read lunyore 1 ABARUCHI 18 Bible Online

1 ABARUCHI 18 - lunyore bible

1 ABARUCHI 18

¹Olunyuma lwamatukhu amenji, mumuhika kwakhataru kwesimi, OMWAMI yabool'la Eliya, “Tsia wakaane nomuruchi Ahabu, nase nangwisie ifula khusibala.”

²Ma Eliya natsia okhwakaana nende Ahabu. Inzala yali ingali okhusila mu Samaria,

³kho Ahabu yalanga Obadia owali omusinjil'li weinyumba yomuruchi. (Obadia yali omundu owahetsanga OMWAMI oluyali olukali,

⁴ne olwa Yesebeli yeeranga abaroobi bo MWAMI, Obadia yabukula abaroobi emia ndala ma nababisa mutsimangaywa mumikanda chibili, buli mukanda balinjimwo amakhumi karaano, ne nabahelesia ebiakhulia nende amaatsi.)

⁵Ahabu nabool'la Obadia mbu, “Chende khutsie okhulambuula khubitaho biosi nende mumichela chiosi musibala siosi khulole nikali khwakhanyoola obunyasi khulwokhuhonia etsisululi tsiefwe nende tsinyumbu, khe khulekhe okhufwilwa nende emiruko chiefwe chiosi.”

⁶Ma nibahuchilisania esitonye siesibala esiabuli mulala natsie okhulambuula. Ahabu yatsia olubekalwe yenyene, ne Obadia natsia olubeka lundi.

⁷Olwa Obadia yali nali khunjila, yakaana nende Eliya. Yamumanyilisia ma niyenama imbeliwe, namureeba mbu, “Niwe, omwami wanje?”

⁸Eliya naye namukalusia mbu, “Yee nise Eliya. Tsia obool'le omwamiwo mbu ndi hano.”

⁹Obadia nakalusia mbu, “Khol'le sina esibi esichilanga niwenya okhuura mumanyakhano kokhwirwa nende omuruchi Ahabu?

¹⁰Muliira lio MWAMI Nyasayewo olimwoyo, khwesuhilanga mbu omuruchi wakhurun'ne musibala siosi. Buli lwosi olwomuruchi wesibala nalebe yaboolanga mbu soli musibalasie tawe, Ahabu yareebanga omuruchi uyo okhwesuha mbu sionyala okhunyoolekha tawe.

¹¹Ne luno wenyanga nzie okhumubool'la oli hano?

¹²Nikhurala ma omwoyo wo MWAMI akhuhile habundu heise ramanyile, ma olwa nambool'le Ahabu mbu oli hano, ma abule okhukhunyoola, nayanzire. Witsul'le mbu ise mbananga oluyali khu MWAMI okhurula mububuukha bwanje.

¹³Osili okhuhul'lakhwo mbu olwa Yesebeli yeeranga abaroobi bo MWAMI ise ndabisa abaroobi emia ndala mulwangaywa mumikanda chibili chiabandu amakhumi karano buli mulala, ma ndabahetsanga ebiakhulia nende amaatsi?

¹⁴Khe wakhandaka mbwena nzie okhubool'la omuruchi mbu oli hano. Anyala okhunzira.”

¹⁵Eliya namukalusia mbu, “Muliira lio MWAMI oweise rumikhilanga, khusubisinjia mbu nzia siahene okhwakaana nomuruchi olwaleelo.”

¹⁶Ma Obadia natsia khumuruchi Ahabu namubool'la, ne Ahabu narula atsie okhwakaan'na Eliya.

¹⁷Olwa Ahabu yalola Eliya, yamubool'la mbu, “Niwe uyu, onyasinjia Isiraeli?”

¹⁸Eliya nakalusia mbu, “Sindi nise onyasinjia Isiraeli tawe, habula niwe nende abeinyumba yapapawo. Inywe ninywe ababulanga okhuhulila amalako ko MWAMI nimwekayakaya ebiniini bia Baali.

¹⁹Luno olache abandu ba Isiraeli bosi bebunjikhe khusikulu sia Karimeli. Oleere abaroobi ba Baali etsimia tsine nende amakhumi karano nende abaroobi ba Ashera etsimia tsine abafwitwanga nende Yesebeli.”

²⁰Kho Ahabu yalanga Abaisiraeli bosi nende abaroobi ba Baali okhwakaan'na khusikulu sia Karimeli.

²¹Eliya yatsia khubandu ma naboola mbu, “Kalamubukula luhono sina okhwahula mumioyo chienywe? Nikali OMWAMI niye Nyasaye, mumwekayakaye, ne Baali nali niye Nyasaye, kho mumwekayakaye.” Nebutswa abandu sibakalusiakhwo ling'ana liosi tawe.

²²Ma Eliya nababool'la mbu, “Ise nise omuroobi wo MWAMI owasikala sienyene, nebutswa abaroobi ba Baali bali hano etsimia tsine nende amakhumi karano.

²³Leere etsichulukhi tsibili; abaroobi ba Baali beelekhwo ndala, ma bachiire batsikhalanie mubitonye ma bare khutsikhwi nebutswa balekhe okhuhambiamwo omul'lo. Nase nakhole mbwo khuchuluchi esikaye.

²⁴Ma abaroobi ba Baali basaaye khumunyasaye wabwe, ne nase nasaaye khu MWAMI, ne owanokalusie khulwokhuruma omul'lo niye Nyasaye.” Abandu bosi nibakalusia mbu, “Kosi akobooye namalahi.”

²⁵Ma Eliya nabool'la abaroobi ba Baali mbu, “Khulwambu inywe muli abenji, mweele echulukhi ma muchilombe mbelio. Musaaye khu munyasaye wenywe, nebutswa murahambia omul'lo khutsikhwi tawe.”

²⁶Babukula echulukhi yabaleer'rwa nibachilomba, ma nibasaaya khu Baali okhurula mukamba tsuli okhwola m'mubasu hakari. Bahanzukha nibaboola mbu, “Baali, khukalusie.” Nibasinasina okhubotokhana halusambwa olwa bali nibombokhele, nebutswa likalusio liosi siliayitsa tawe.

²⁷M'mubasu hakari Eliya yachaaka okhutsekhel'la nababool'la mbu, “Saaye butinyu. Okhuba nomunyasaye. Haundi alooranga nohomba utsiye okhwekhonya, nohomba haundi utsiye khuluchendo. Nohomba haundi akonananga, ne okhwola mum'buusie.”

²⁸Abaroobi yabo basaaya butinyu nesikhu, nibekhalaka nem'bano nende tsimbanga okhulondokhana nende omwima kwabwe singa kwali, okhwola amatsahi nikaraatsa.

²⁹Batsilil'la okhulakalakana okhwola ahembi khumukolooba; nebutswa likalusio siliayitsakhwo tawe, kata esindu sisiahulilikhakhwo tawe.

³⁰Ma Eliya nabool'la abandu bosi mbu, “Esute ahembi n'nase” ne bosi nibebunjikha ahembi n'naye. Niyombokha obuhia olusambwa lwo MWAMI olwali nilusambuywe.

³¹Yabukula amachina likhumi nakabili; buli lichina liakobokhelanga buli olusibulo khutsinzibulo likhumi natsibili tsiaabaana ba Yakobo owa Nyasaye yali niyakulikha Isiraeli.

³²Yombokha olusambwa nende amachina yako khulwokhwekayakaya OMWAMI. Yalima omutalo okhubotokhana olusambwa okunyala okhutsukhwamwo amaatsi akahela etsiliita likhumi natsine.

³³Ma nara tsikhwi khulusambwa, nakhalania echulukhi mubitonye, nabira khutsikhwi. Nababool'la mbu, “Yitsusie tsisongo tsine nende amaatsi ma musundule khusihaanwa siomusango nende khutsikhwi.” Nibakholambwo.

³⁴Ma naboola mbu, “Khole mbwo khandi”, ne nibakalukhilamwo. Nababool'la “Khandi khole mbwo.” Khandi nibakalukhilamwo olwakhataru.

³⁵Amaatsi kabira khulusambwa tulu ma niketsula m'mutalo.

³⁶Khunyinga yokhuhaana esihanwa siamukolooba, Eliya yesunda ahembi nende olusambwa ma nasaaya mbu, “E OMWAMI, Nyasaye wa Aburahamu, Isaka nende Yakobo, manyia luno mbu niwe Nyasaye wa Isiraeli ne ise ndi omurumikhiliwo ma ukhol'le kano okhulondokhana nende lilako lilio.

³⁷Ngalusia, OMWAMI ngalusia, kho abandu yaba bamanye mbu ibe OMWAMI niwe Nyasaye, ma khandi obakalusinjia khuibe mwene.”

³⁸OMWAMI yaruma omul'lo okhurula mwikulu, ma nikusamba esihanwa siomusango halala nende tsikhwi nende amachina, ma nende olukuukhi, ma nikukhamia amaatsi kali m'mutalo kosi.

³⁹Olwabandu balola akene yaka nikekhola, basikama hasi nibaboola mbu, “OMWAMI niye Nyasaye; OMWAMI yenyene niye Nyasaye.”

⁴⁰Eliya naboola mbu, “Fumile abaroobi ba Baali, muralekhe kata mul'la yelukhe tawe.” Abandu nibafumila abaroobi ba Baali bosi, ma Eliya nabahila mumuchela kwa Kishoni, ma nabeer'raho.

⁴¹Ma Eliya nabool'la omuruchi Ahabu mbu, “Luno tsia olie esiakhulia nende amaatsi. Mbul'langa okhuhuma khweifula nikhwitsa.”

⁴²Olwa Ahabu yatsia okhulia nende okhunywa amaatsi, Eliya yaniina khusikulu sia Karimeli ma niyenama hasi, omurwekwe nikuba hakari wamasikamo kaake.

⁴³Nabool'la omurumikhiliwe mbu, “Tsia ohenge elubeka weinyanza.” Omurumikhiliwe yatsia ma nakalukha naboola mbu, “Sindolanga esindu siosi tawe.” Eliya yamuruma mbwo esiakhane nakhataru.

⁴⁴Olwakhane nakhataru omurumikhili yakalukha naboola mbu, “Nduutsi akhalumbesi akharayomba omukhono kwomundu nikhetsanga okhurula munyanza.” Eliya nalaka omurumikhiliwe mbu, “Tsia khumuruchi Ahabu omubool'le, yenjile mwikaarilie akalukhe ingo ifula nesili okhumwikal'la.”

⁴⁵Inyuma weinyinga indititi amalumbesi kamwamia likulu liosi, imbutsa nechiaka okhuhungutsa, ma ifula inyinji nechiaka okhukwa. Ahabu yenjila mwikaari lilie nachaaka okhukalukha Yesereli.

⁴⁶Obunyali bwo MWAMI bwetsa khu Eliya; naboha tsingubotsie butinyu mus'sienjesie ma niyelukha imbeli wa Ahabu okhwola Yesereli.