Read lunyore 1 ABARUCHI 19 Bible Online

1 ABARUCHI 19 - lunyore bible

1 ABARUCHI 19

¹Omuruchi Ahabu yabool'la omukhasiwe Yesebeli kosi aka Eliya yali nakhol'le nende singa obwa yali niyeer're abaroobi ba Baali bosi.

²Ma Yesebeli naruma oburume buno khu Eliya: “Abanyasaye banzire nikakhaba mbu mukamba esaa singa ino sinambe nikhukholeye akawakholeye abaroobi.”

³Eliya yaria ma niyelukha khulwokhuhonia obulamubwe. Yabukula omurumikhiliwe ma nibatsia Berisheba elili mu Yuda, nalekhayo omurumikhiliwe. Eliya yalekha omurumikhiliwe ebwene iyo

⁴ma natsilil'la noluchendo litukhu liosi musitsiimi. Yatsia niyekhala hasi musiinikha siomusaala ma niyekomba okhufwa. Yaboola mbu, “Kano kanyombele OMWAMI. Bukula obulamu bwanje, nobukhala ise okhufwa, okhuba sinyombele abakuka banje tawe.”

⁵Yakona hasi hamusaala ma tsindoolo nitsimuhila. Nonoho om'malaika namutiilakhwo, naboola mbu, “Buukha olie.”

⁶Nahenga ne nalola omukaati nende esimuka siamaatsi nibili ahembi nende omurwekwe. Yamala nalia ma nanywa, ma nakona hasi khandi.

⁷Om'malaika wo MWAMI yakalukha namubusia khandi olwakhabili namubool'la, “Buukha olie, okhuba oluchendo nolurambi, lwakhakhuyombel'la.”

⁸Eliya nabuukha, nalia ma nanywa ne ebiakhulia yibio biamuhelesia tsingufu etsiokhuchenda mu esikulu sia Sinai Nyasaye amatukhu amakhumi kane.

⁹Yoola mulwangaywa nakonamwo obutukhu nibwol'le. Ne nonoho OMWAMI nal'loma khuye namubool'la mbu, “Eliya, okholanga sina hano?”

¹⁰Naye nakalusia mbu, “OMWAMI Nyasaye Wokhunyala Biosi, buli lwosi ndakhurumikhila ibe wenyene. Nebutswa abandu ba Isiraeli bafunaka Indakano yabwe n'nawe, basambula tsisambwa tsitsio, ma bayira abaroobi baabo bosi. Nise owasikala sienyene, ne luno benyanga okhunzira.”

¹¹OMWAMI namubool'la mbu, “Tsia osinjile khusikulu imbeli wanje.” Ma OMWAMI nabir'raho, naruma imbuutsa ingali niyaraka ebikulu, netonyania amachina, nebutswa OMWAMI siyaali mumbuutsa yiyo tawe. Imbuutsa yamala nelekha okhuhungutsa, ne okhutechela khwesibala nikhubaho, nebutswa OMWAMI siyaali mukhutechela khwesibala yikhwo tawe.

¹²Inyuma wokhutechela khwesibala, omul'lo kwarul'lamwo, nebutswa OMWAMI siyaali m'mul'lo yikwo tawe. Inyuma womul'lo, omwoyo kwakalaha okwokhumonya kwahul'likha.

¹³Olwa Eliya yakuhul'la, yafuunikha obwenibwe nende ingubo yiye ma natsia nasinjila mubwinjil'lo bwolwangaywa. Omwoyo nikumwitsila nikumubool'la mbu, “Eliya okholanga sina hano?”

¹⁴Naye nakalusia naboola mbu, “OMWAMI, Nyasaye Wokhunyala Biosi, buli lwosi ndakhurumikhila ibe wenyene. Nebutswa abandu ba Isiraeli bafunaka Indakano yabwe n'nawe, basambula tsisambwa tsitsio, ma bayira abaroobi baabo bosi. Nise owasikala sienyene, ne luno benyanga okhunzira.”

¹⁵OMWAMI namubool'la, “Kalukha musitsiimi sia Damasiko, ma winjile mwitookho obakhe amafura khu Hasaeli abe omuruchi wa Siria.

¹⁶Obakhe Yehu omwana wa Nimishi amafura abe omuruchi wa Isiraeli ma khandi obakhe amafura khu Elisha omwana wa Shafati okhurula Abelimehola abe omuroobi musilenje sisio.

¹⁷Omundu wosi owakhahona okhwirwa nende Hasaeli aleerwa nende Yehu, ne wosi owakhabula okhwirwa nende Yehu ne aleerwa nende Elisha.

¹⁸Nebutswa ndi nabandu etsielefu tsine natsitaru mu Isiraeli, yabo abali abasubilwa khu ise khandi abasili okhwekayakayakhwo Baali nohomba okhutsunzuuna esiniini sisie tawe.”

¹⁹Eliya yarulaho ma natsia ne nanyoola Elisha omusiani wa Shafati nalimilanga tsing'ombe etsiabohwa khumakokolo likhumi nende kabili. Ye omwene yali inyuma khwikokolo lielikhumi nakhabili. Eliya yahinia ingubo yiye namubikha Elisha.

²⁰Elisha yalekha etsihilitsie niyelukha natsia khu Eliya ma namubool'la, “Yanza ohuchil'le nzie okhuseebula papa nende mama, ma nzitse khutsie n'nawe.” Eliya nakalusia, “Nobulahi, kalukha. Sikhukayanga tawe.”

²¹Elisha yakalukha khutsihili tsie etsiayali nalimilanga natsisinza ma nateekha inyama narumikilanga likokolo singa tsikhwi. Yahelesia abandu inyama nibalia. Ma natsia nalonda Eliya naba omukhonyaniwe.