Read lunyore 1 ABARUCHI 2 Bible Online

1 ABARUCHI 2 - lunyore bible

1 ABARUCHI 2

¹Amatukhu kokhufwa khwa Daudi kali ahembi ma nalanga omusianiwe Solomoni namuhelesia amalako kokhumalilisia naboola mbu,

²“Amatukhu kanje kokhufwa kali ahembi okhwola Wome ikholo ma okhole ebindu es'saatsa.

³Okhole yako ako MWAMI Nyasayewo akhulaka okhukhola. Ohulile amalakoke kosi ma ochende mutsinjila tsitsie nende mubukhalachibwe singa obwakahandikwa mumalako ka Musa, khe obe onyala okhukaasa hosi ahotsia nende mukosi akokhola.

⁴Niwakhamuhulila ne OMWAMI ahesia lisubisio liayalomba olwa yambool'la mbu abolwibulo lwanje bakharuche Isiraeli nibaba nibachenda habwene ne nibahul'la amalako kache nobusubili nemioyo chiabwe chiosi.

⁵“Khandi witsul'le aka Yoabu yakhoola olwa yeera abemeli babili abelihe lia Isiraeli, Abineri omwana wa Neri nende Amasa omwana wa Yetseri. Witsul'langa yali okhubeera mumatukhu komulembe khulwo okhurunga es'sialia khulwamatsahi kabaraatsia mumatukhu kelihe. Yeera abandu abaraali nende esikha ma luno yetuukhanga omusiko kukwe omwene nanyoola esibi khulwako.

⁶Kho ibe okhole akobuchesibwo, orakhalekha afwe olufu butswa tawe.

⁷“Nebutswa okhol'le abaana ba Barisilai Omugileadi akesirenda ma abalinde, sichila bakhol'la akesirenda olwa ndali ninzilukhanga omwana wenywe Abisalomu.

⁸“Khandi witsul'le Shimei omwana wa Gera, okhurula mwitaala lia Bahurimu, ouli Omubenjameni tawe. Yali okhunaama esilaamo esibi litukhu liandatsia Mahanaimu, nebutswa, olwa yanzakaan'na hamuchela kwa Yorodani, ndali okhumwesuhila muliira lio MWAMI mbu sindakhamwire tawe.

⁹Nebutswa orakhamulekha atsie butswa mbwo sila esinyasio tawe. Umanyile akokwan'ne okhukhola, ne olole mbu wir'rwe.”

¹⁰Daudi yafwa ma nayabilwa mwitookho lia Yerusalemu elia Daudi mwene yombokha.

¹¹Yali niyaruka Isiraeli emihika amakhumi kane; yaruka emihika chine nachitaru mu Heburoni, ne emihika amakhumi kataru nachitaru mu Yerusalemu.

¹²Solomoni yekhala khundebe yoburuchi ya Daudi samwana ma oburuchibwe niburalisibwa okhusila.

¹³Ma Adoniya owanyina yalangwa Hagitsi yatsia khu Batsisheba owali nyina Solomoni. Batsisheba namureeba mbu, “Witsile khukomulembe noho?” Ne Adoniya namukalusia mbu, “Yee nzitsile mumulembe.”

¹⁴Ma nameeta mbu, “Ndi neling'ana elianyenyele okhukhureeba.” Ne Batsisheba namureeba mbu, “Nikhuwa sina.”

¹⁵Adoniya nakalusia mbu, “Umanyile mbu nise owakhabeye omuruchi, ma kata Abaisiraeli bosi banaayanga mbu nise owakharuchile. Nebutswa oburuchi bwakalukhana nibuba obwomwana wefwe sichila bwali obulalilo bwo MWAMI.

¹⁶Ne luno ndi nende ling'ana elala eliandakhakhureeba; noyanza orakhalisuula tawe.” Batsisheba namureeba mbu, “Neling'ana sina?”

¹⁷Naye nakalusia mbu, “Oyanze oreebe omuruchi Solomoni, okhuba manyile sanyala okhukhusuul'la tawe, alekhe ngalusie Abisaki omukhaana Mushunami, abe omukhasi wanje.”

¹⁸Batsisheba namubool'la mbu, “Nobulahi, nakhureebele omuruchi.”

¹⁹Ma Batsisheba natsia khumuruchi Solomoni okhumubool'la aka Adoniya yali nareebele. Omuruchi yasinjila khulwokhusiesia nyina, namwinamila. Ma niyekhala khundebeye eyoburuchi ne nalaka mbu indebe yindi eyoburuchi eleer'rwe nyina ma niyekhala khumukhonokwe omusaatsa.

²⁰Batsisheba naboola mbu, “Ndi nende akhang'ana khalala akhatititi akhanyenya okhukhureeba. Orakhasuul'la tawe.” Omuruchi namureeba mbu, “Nikhang'ana sina mama? Sinyala okhukhusuul'la ibe tawe.”

²¹Batsisheba namubool'la mbu, “Olekhe Adoniya omwana wenywe akalusie Abisaki, abe omukhasiwe.”

²²Omuruchi namureeba mbu, “Esichilanga noreeba mbaane Abisaki khuye nisina? Kho busina oramurebela abe omuruchi khandi! Kata mbwo ye niye omwana wefwe omukhulundu ma Abiatsari omwesaalisi nende Yoabu bamukabukhilanga.”

²³Ma omuruchi Solomoni niyetsuba muliira lio MWAMI mbu, “Nyasaye yanzire nimba nireera Adoniya khulwokhureeba ling'ana yili tawe.

²⁴OMWAMI wamala okhuusimikha khundebe yoburuchi bwa Papa Daudi; wahesia lisubisio ma waimbelesia ise oburuchi nende abolwibulo lwanje. Ndesuhanga muliira lio MWAMI oli mwoyo mbu Adoniya okhwola yerwe litukhu lino.”

²⁵Ma omuruchi Solomoni nahaana lilako khu Benaya, owamala natsia niyeera Adoniya.

²⁶Ma omuruchi Solomoni nabool'la Abiatsari omwesaalisi mbu, “Tsia musibala sienywe sia Anatsotsi. Okwan'ne okhwirwa nebutswa sikhwiira n'nondi tawe, okhuba niwe owalindanga lisanduku lio MWAMI Nyasaye olwa walinji nende papa Daudi ma wasanganga mukhunyakhana khwa papa khwosi.”

²⁷Ma Solomoni nahiinia Abiatsari arabba omwesaalisi wo MWAMI tawe, ne nahesia ling'ana elio MWAMI yabool'la Shilo khukomwesaalisi Eli nende abolwibulo lulwe.

²⁸Amakhuwa yako kool'la Yoabu. Okhuba Yoabu yali nali khulubeka lwa Adoniya, ne siyaali khulubeka lwa Abisalomu tawe. Kho yelukha natsia mwiheema lio MWAMI ma natiila tsinzika tsiolusambwa.

²⁹Olwa omuruchi Solomoni yabool'lwa mbu Yoabu wilukhile utsiye mwiheema ma ali halusambwa, yaruma Benaya okhutsia okhumukwakhwo amwire.

³⁰Benaya yatsia mwiheema lio MWAMI nabool'la Yoabu mbu, “Omuruchi ulachile mbu orule.” Naye nakalusia mbu, “Tawe. Ise fwila hano.” Benaya natsia okhubool'la omuruchi aka Yoabu yali nabooye.

³¹Omuruchi namukalusia mbu, “Khola obwa Yoabu abooye. Tsia omwire ma omuyabile, ma ohinie khu ise nende khulwibulo lwa papa Daudi esikha siamatsahi ka Yoabu yaraatsia olwa yeera abandu abaraali nesikha.

³²OMWAMI yakhahelesie Yoabu esinyasio khulwamatsahi kayaraatsia papa wanje Daudi naramanyile. Yoabu yeera abandu babili abaraali nesikha, abali abalahi okhumuyomba: Abineri owali omwemeli welihe lia Isiraeli nende Amasa owali omwemeli welihe lia Yuda.

³³Amatsahi kabwe kakhakalukhe khu Yoabu nende khubolwibulolwe inziayo. Nebutswa OMWAMI yakhahaane obulechi khubolwibulo lwa Daudi nende khundebe yoburuchibwe khasotso.”

³⁴Ma Benaya natsia mwiheema lio MWAMI niyeera Yoabu, ma nayabilwa hangowe musitsiimi.

³⁵Omuruchi nakhola Benaya okhuba omwemeli welihe musilenje sia Yoabu, ne nara Sadoku omwesaalisi musilenje sia Abiatsari.

³⁶Ma omuruchi narumana Shimei alangwe ma namubool'la mbu, “Weyombokhele inyumba mu Yerusalemu ma omenyemwo, ne orakharulakhwo mwitookho tawe.

³⁷Niwakharulakhwo mwitookho niwambukha omuchela kwa Kidironi ne wiirwa, ne amabi kakhaba akaako omwene.”

³⁸Shimei nakalusia omuruchi naboola mbu, “Kabe singa obwomwami wanje omuruchi abooye.” Ma namenya Yerusalemu amatukhu amenji.

³⁹Olunyuma lwemihika chitaru abasumba ba Shimei babili belukha nibatsia owa Akishi omwana wa Maaka, owali omuruchi wa Gatsi. Olwa Shimei yahul'la mbu bali Gatsi,

⁴⁰yamala niyaala khupundaye esiokhwikhalakhwo, natsia Gatsi khumuruchi Akishi okhuruna abasumbabe. Yabanyoola ma nabakalusia ingo.

⁴¹Olwa omuruchi Solomoni yahul'la aka Shimei yali nakhol'le,

⁴²yarumana mbu alangwe ma naboola mbu, “Ndakhubool'la niwetsuba muliira lio MWAMI mbu siwakharulekhwo Yerusalemu tawe. Ma nikhusomela mbu niwakharulakhwo wakheerwa. Siwahuchil'la ma noboola mbu wakhambulile?

⁴³Busina noralinda esietsubosio ma nofunaka lilako lianje?

⁴⁴Ibe umanyile obubi bwawakhol'la papa wanje Daudi. OMWAMI alakalusia obubibwo khumurwekwo.

⁴⁵Ne nayanamile ikhabi ma nalombe oburuchi bwa Daudi okhuba oburalilu khasotso.”

⁴⁶Omuruchi yamala nalaka Benaya, narula natsia ma niyeera Shimei. Oburuchi bwa Solomoni bwamala niburalisibwa.