Read lunyore 1 ABARUCHI 20 Bible Online

1 ABARUCHI 20 - lunyore bible

1 ABARUCHI 20

¹Omuruchi Beni Hadadi wa Siria yabunjelesia abasikari baabe bosi, nakhonywa nende abaruchi bandi amakhumi kataru nende babili nibali nende etsisululi tsiabwe nende amakaari. Ma narula natsia okhufumbila Samaria, naliseera.

²Yaruma abarumwa mwitookho khumuruchi Ahabu wa Isiraeli okhuboola mbu, “Omuruchi Beni Hadadi aboolanga,

³mbu omulekhele efetsayo, etsahabu, abakhasi nende abaanabo abali netsingufu.”

⁴Ahabu naye nakalusia naboola mbu, “Tsie mubool'le omwami wanje omuruchi Beni Hadadi mbuchiliye, anyala okhumbukula ise nende ebindu bianje biosi.”

⁵Olunyumakhwo, abarumwa tsana bakalukha khu Ahabu nende oburume bundi okhurula khu Beni Hadadi mbu: “Ndali okhukhurumila ling'ana mbu umbelesie efetsayo yosi etsahabu ma nende abakhasi nende abaana.

⁶Ne luno, narume abasikari banje mukamba khusaa singa ino, okhwitsa okhurunilisia munyumbayo yoburuchi nende mutsinyumba tsiabakhongo baabo, ma nababukule ebindu biosi ebiabakhalola okhuba ebiobuha.”

⁷Omuruchi Ahabu yalanga abemeli bosi abomusibala yisio nababool'la mbu, “Lole, omundu uyu yenyanga okhukhumulula. Yayirumiye ling'ana mbu yenyanga abakhasi banje nende abaana, efetsa ma nende etsahabu, ma nimbuchil'la.”

⁸Abemeli nende abandu bosi nibaboola mbu, “Oralonda akakhubool'langa tawe, kata orahuchil'la tawe.”

⁹Ahabu yamala nakalusia abarumwa ba Beni Hadadi nababool'la mbu, “Boole omwami wanje, omuruchi mbu ndahuchiliye oburumebwe bwokhuranga, nebutswa sindakhahuchil'la obwakhabili yibu tawe.” Abarumwa yabo nibarula nibatsia ne khandi nibakalukha nende oburume bundi

¹⁰okhurula khu Beni Hadadi obwokhuboola mbu, “Abanyasaye bambelesie esinyasio esikali nimba niramulula litookho lia Samaria liosi. Sinakhubekhwo nolukukhi mufuusi khulwa basikari banje okhukalukha n'nalwo tawe.”

¹¹Omuruchi Ahabu nakalusia mbu, “Bool'le omuruchi Beni Hadadi mbu omusikari watooto yepakanga namal'le okhuleka lihe; siyepakanga lihe nilisili okhuchiaka tawe.”

¹²Beni Hadadi yanyoola likalusio lia Ahabu olwa yali nanywetsanga nende abaruchi basie mumaheema kabwe. Yalaka abandube berechekhe okhuseera litookho lia Samaria ma niberechekha.

¹³Omuroobi yatsia khumuruchi Ahabu namubool'la mbu, “OMWAMI aboolanga mbu, ‘Orakharia khulwomukanda omukali okwabasikari bokhulwana tawe. Nzia okhukhuhelesia obulechi khukwo litukhu lino, ma nomanye mbu ise nise OMWAMI.’ ”

¹⁴Ahabu nareeba mbu, “Niwina, owanowemel'le obuseeri?” Omuroobi namukalusia mbu, “OMWAMI aboolanga mbu abasikari basili ababuukha abali hasi wobwemeli bwabakafuna betsingongo nibo abanabaseere.” Omuruchi namureeba mbu, “Ne niwina owanowemel'le abasikari bosi?” Ne omuroobi namukalusia mbu, “Niwe.”

¹⁵Ma omuruchi nalanga abasikari abali nibasili ababuukha abalinji hasi wobwemeli bwabakafuna betsingongo, nanyoola bali etsimia tsibili nende amakhumi kataru nababili. Ma nalanga abasikari ba Isiraeli abahela etsielefu tsine natsitaru.

¹⁶Obuseeri bwachiaka mum'basu hakari olwa Beni hadadi yali nanywetsanga mumaheema halala nabaruchi amakhumi kataru nababili abali nibetsele okhumukhoonya ma nibakholwa.

¹⁷Abasikari ababuukha baranga okhwemela. Abarunilisi abomuruchi Beni Hadadi yali narumile okhuhenjelesia beetsa nibamubool'la mbu omukanda kwabasikari kwitsanga okhurula Samaria.

¹⁸Naye nababool'la mbu, “Mubafumile mwoyo kata babe nibetsanga khulwomulembe nohomba khulwobulwani.”

¹⁹Abasikari ababuukha baranjil'la okhuseera nibalondungwa nende abasikari ba Isiraeli,

²⁰ne buli mulala yeera owabali nibalwananga n'naye. Abasiria belukha ne Abaisiraeli nibabalondel'la, nebutswa omuruchi Beni Hadadi niyelukha nali khusululi, halala nende abayali n'nabo.

²¹Omuruchi Ahabu yarula narootsa etsisululi, niyononia amakaari nende okhwira Abasiria mubulechi obukali okhusila.

²²Omuroobi yamala natsia khumuruchi Ahabu naboola mbu, “Kalukha ingo ma oralisie amahe kaako, niwerechekhelanga akanokhole okhuba mumatukhu kesuubwe omuruchi wa Siria yakhaseere khandi.”

²³Abakhongo bomuruchi Beni hadadi bamubool'la mbu, “Abanyasaye ba Isiraeli nabomubikulu niko akachil'le nibakhuleka. Nebutswa khunyala okhubaleka nikhubaseer'ra mumabanda.

²⁴Luno ohinie abaruchi amakhumi kataru nende babili okhurula mubukono bwabwe ma oreemwo abakhongo babasikari bamahe.

²⁵Ma olange abasikari abenji singa abokhwilukha, khandi babe nende etsisululi etsihela nende etsia abokhwilukha bali n'natsio halala nende amakaari. Nakhulwan'ne Abaisiraeli mumabanda ne leelo nakhubaleche.” Omuruchi Beni Hadadi nahuchil'la okhulonda lichetsiyio yilio.

²⁶Musuubwe yalondakhwo yalanga abandu babe ma natsia n'nabo mwitaala lia Afeki okhuseera Abaisiraeli.

²⁷Abaisiraeli balangwa ma nibarechekhwa. Bakhupa ekambi mumikanda chibili nihengan'ne, na Basiria. Abaisiraeli bafwananga orutuuli rubili orwebimeme bietsimbusi imbeli wa Basiria, sichila Abasiria bali abenji okhusila ma nibetsula esibala tsana siosi.

²⁸Omuroobi yatsia khumuruchi Ahabu, ma naboola mbu, “Kano niko ako MWAMI aboolanga ‘Sichila Abasiria baboolanga ise ndi omunyasaye womubikulu, ne tawe owemumabanda, nakhuhelesie obulechi khumahe kabwe amenji yako ma ibe nende abandubo namumanye mbu ise nise OMWAMI.’ ”

²⁹Abasiria nende Abaisiraeli bali mutsikambi amatukhu kane nakataru etsikambi tsiabwe nitsihengan'ne. Khwitukhu liakhane nakhataru bachiaka okhulwana, ne Abaisiraeli nibeera Abasiria bahela etsielefu emia ndala.

³⁰Abali okhusikala belukha nibatsia mwitookho lia Afeki ne lisiisi lielitaala liakwiila abahela etsielefu amakhumi kabili nende tsine natsitaru. Khandi Beni Hadadi yelukhila mwitookho ne niyebisa musikota sieinyuma munyumba.

³¹Abakhongobe batsia khuye nibaboola mbu, “Khuhulilanga mbu abaruchi ba Isiraeli nabetsimbabasi. Khuhelesie obweyangu khutsie khumuruchi wa Isiraeli nikhwebohele tsingubo tsiamakunia mubisienje biefwe nende emikoye mumakosi kefwe, ne haundi sinakhurie tawe.”

³²Ma nibeboha tsingubo tsiamakunia mubisienje biabwe ne emikoye mumakosi kabwe, nibatsia khumuruchi Ahabu nibaboola mbu, “Omurumikhiliwo Beni Hadadi akhusayanga noyanze olekhe abe mwoyo.” Ahabu naboola mbu, “Khane asili mwoyo. Bulahi muno. Ye afwana singa omusiani wefwe.”

³³Abakhongo ba Beni Hadadi bali nibarunanga esimanyilo esilahi, ma olwa Ahabu yaboola no mwana wefwe, bakabukula bwangu nibaboola mbu, “Singa obwobooye, Beni hadadi no mwana wenywe.” Ahabu nababool'la mbu, “Tsie mumuleere hano.” Olwa Beni Hadadi yeetsa, Ahabu yamulanga okhwinjila mwikaari n'naye.

³⁴Beni Hadadi namubool'la mbu, “Nakhukaluchis'sie amataala ka papa wanje yanuula papawo, ma onyala okhulomba ebirobio mu Damasiko, singa obwapapa wanje yakhola Samaria.” Ahabu nakalusia mbu, “Nikhuhuchilisanisie mbwo, ndakhulakhuula.” Nibalomba indakano bombi babili ma namulakhuula.

³⁵Mulala khubaroobi yabool'la owasie amukhupe okhulondokhana nende ling'ana lio MWAMI. Nebutswa owabool'lwa naye nasuula.

³⁶Ma owasie uyo namubool'la, “Sichila usuye okhuhul'la lilako lio MWAMI esimba nekhwire olwa nobe niundekhele.” Ne olwa yarula butswa nesimba niyitsa nemwira.

³⁷Ma omuroobi muteelwa uyu natsia khumundu undi namubool'la, “Ndiabaka.” Ne omundu uyo namutiabaka obutinyu ma namusalisia.

³⁸Omuroobi uyo niyeboha obwenibwe nesitambaya niyekalukhania kho omundu wosi alekhe okhumumanya, ma natsia okhusinjila khunjila nalindiil'la omuruchi wa Isiraeli abire.

³⁹Olwomuruchi yali nabir'rangaho, omuroobi yamulanjisia naboola mbu, “Omuruchi, ndaali nikhupananga mwihe ne omusikari naleera omusuku watiil'le khuise naboola mbu, ‘Linda omundu uyu, niyelukha norunge nende obulamubwo, nikaralimbwo tawe wakharunje lisanza ebitonye bieifetsa ebihela etsielefu tsitaru.’

⁴⁰Nebutswa mal'le ningoyan'na khubindu bindi, ma omundu tsana niyelukha.” Omuruchi namubool'la mbu, “Omwene wekhalachiye esiina, khe okhwola ohesie singa kenyekhanga.”

⁴¹Omuroobi yamala narandula esitambaya siali mubwenibwe, ne bwangu omuruchi namumanyilisia singa mulala khubaroobi.

⁴²Omuroobi nabool'la omuruchi mbu, “Lino nilio ling'ana lio MWAMI: ‘Khulwambu wahuchiliye omundu wandabooye yerwe okhwilukha, norunge nende obulamubwo, ma amahe kaako nakononibwe khulwokhulekha abasuku babe belukhe.’ ”

⁴³Omuruchi yakalukha ingowe Ebusamaria, nahend'e omwoyo okhusila ma niyesikokele.