Read lunyore 1 ABARUCHI 21 Bible Online

1 ABARUCHI 21 - lunyore bible

1 ABARUCHI 21

¹Nabotsi wa Yesereli yali nomukunda kwemisabibu ahembi nende inyumba eyomuruchi Ahabu.

²Litukhu elala Ahabu yabool'la Nabotsi mbu, “Umbelesie omukundakwo okwemisabibu yiku rakenjemwo tsifwa sichila kuli ahembi neinyumba yanje. Nekhuhelesie omukunda kundi okwemisabibu omulahi, nohomba niwenya nekhurunga khubukusi obulahi.”

³Nabotsi naye namukalusia mbu, “Ndalaamilwa omukunda kuno nende abakuka banje, OMWAMI yakhonye rakhuhelesia tawe.”

⁴Ahabu yatsia munyumba nasinyikhile ma nakhunyiisie habweni khuka Nabotsi yali namubooleye. Yakona khusitandasie nasukhan'ne khwisisi, ne siyaliakhwo esiakhulia tawe.

⁵Yesebeli, omukhasiwe namureeba mbu, “Busina obeleeye? Busina oraliakhwo esiakhulia?”

⁶Ahabu, namukalusia mbu, “Sichila n'nomele nende Nabotsi nimubool'la yangusie omukundakwe kwemisabibu, nohomba muhelesie omukunda kundi kwemisabibu musilenje siokwene yiku, nebutswa naye niyambool'la sanyala okhumbelesia tawe.”

⁷Yesebeli namubool'la mbu, “Soli niwe omuruchi wa Isiraeli? Buukha olie ebiakhulia omwoyokwo kusangale. Ise omwene nakhunyool'le omukunda kwa Nabotsi okwemisabibu.”

⁸Ma nahandika etsibarwa muliira lia Ahabu, natsiikala ma narakhwo esimanyilo khulwa Ahabu ma natsiruma khubemeli ba Yesereli.

⁹Mutsibarwa tsana yahandikamwo mbu: “Mulandie litukhu liokhuhonga okhulia, mulange abandu bosi abakhongo ba Yesereli, ne muhelesie Nabotsi indebe yoluyali.

¹⁰Mure abandu babili abamayaanu ahembi n'naye bamuyaale mbu anyekanga Nyasaye nende omuruchi. Ma mumuhile esioba welitaala mumulase namachina, afwe.”

¹¹Abakhulundu nende abemeli ba Yesereli bakhola aka Yesebeli yali nalachile.

¹²Balandia litukhu liokhuhonga okhulia, nibalanga abandu bosi halala ma nibahelesia Nabotsi indebe yoluyali.

¹³Abandu babili abamayaanu bamubool'la imbeli wabandu mbu anyekanga Nyasaye nende omuruchi. Ma nabotsi nahiinibwa esioba welitaala, nalaswa namachina ma nafwa.

¹⁴Oburume bwahilwa khu Yesebeli mbu, “Nabotsi ulasilwe namachina, ma ufwiye.”

¹⁵Olwa Yesebeli yanyoola butswa oburume yibwo, ne nabool'la Ahabu mbu, “Nabotsi ulasilwe namachina ma ufwiye. Luno tsia obukule omukunda kwemisabibu okwa nabotsi yasuula okhukhukusia.”

¹⁶Olwa Ahabu yahul'la mbu Nabotsi ufwiye, yarula bwangu natsia okhubukula omukunda tsana.

¹⁷Ma OMWAMI naboola Eliya Omuroobi okhurula Tishibe mbu,

¹⁸“Tsia khumuruchi Ahabu wa Samaria. Nomunyoole mumukunda kwemisabibu kwa Nabotsi, nali ahembi okhukubukula.

¹⁹Omubool'le mbu ise, OMWAMI, mubool'langa mbu, ‘Olwomal'le okhwira omundu uyo, obukulanga emiandu chichie khandi?’ Omubool'le mbu kano niko akamboolanga, ‘Habundu hetsimbwa tsikhombeye amatsahi ka Nabotsi, natsikhombeleho amatsahi kaako nawe.’ ”

²⁰Olwa Ahabu yalola Eliya, namubool'la mbu, “Khane unyooleleye, ibe omusuku wanje?” Eliya nakalusia namubool'la mbu, “Yee, khunyooye. Wayehaana okhukhola akali amabi mumoni tsio MWAMI khasotso.

²¹Kho OMWAMI akhubolelanga mbu, ‘Nakhukhupie esibi. Nakhumulule ibe nende abasaatsa bosi abomunyumbayo, abati nende abakhulundu.

²²Inyumbayo nebe singa eyomuruchi Yeroboamu omwana wa Nebati khandi singa eya Baasha omwana wa Ahija sichila ibe usenuye lileko lianje khulwo khwinjisia Isiraeli mutsimbi.’

²³Khandi khu Yesebeli OMWAMI aboolanga mbu, tsimbwa natsilie om'bilikwe mwitaala lia Yesereli.

²⁴Abeekho benywe bosi abafwila mwitookho nabaliibwe nende tsimbwa ne bosi abafwila esioba welitookho nabaliibwe nende etsisori.” (

²⁵Abulaho omundu owehinia okhukhola obubi m'moni mwo MWAMI singa Ahabu, yakhola yako kosi khulwokhutsuubwa nende omukhasiwe Yesebeli.

²⁶Yakhola akes'sinyo okhusila khulwokhwekayakaya ebiniini singa Abaamori bakholanga, abo MWAMI yali okhuhiinia musibala siabwe olwa Baisiraeli bali nibenjilangamwo.)

²⁷Olwa Ahabu yahul'la amang'ana yako yarandula tsingubotsie, natsihiinia ma niyebiikha ingubo yelikunia. Yasuula okhulia ebiakhulia, ma yakonanga butswa khumakunia ma nachendanga butswa niyabelela.

²⁸OMWAMI nabool'la omuroobi Eliya mbu,

²⁹“Uluutsi singa Ahabu yetutuyisie imbeli wanje? Okhuba ukhol'le akene yaka, sinandeere olubi khuye nasili omulamu tawe; kakhekhole mumatukhu kobulamu bwomwanawe, nilwo Olwa ndakhaleere olubi khunyumba ya Ahabu.”