Read lunyore 1 ABARUCHI 22 Bible Online

1 ABARUCHI 22 - lunyore bible

1 ABARUCHI 22

¹Khulwemihika chibili lihe silialikhwoho Isiraeli nende Siria tawe.

²Nebutswa mumuhika kwakhataru omuruchi Yehoshafati wa Yuda yatsia okhulola omuruchi Ahabu wa Isiraeli.

³Ahabu yareeba abakhongo baabe mbu, “Busina khusili okhukanakanakhwo okhukalusia litaala lia Ramotsi elili mu Gileadi okhurula khumuruchi wa Siria? Sila nesibala siefwe.”

⁴Ma Ahabu nareeba Yehoshafati mbu, “Namumbile okhutsia okhuseera Ramotsi?” Yehoshafati naye nakalusia mbu, “Nderechekhele okhutsia n'nawe, nende abasikari banje ma nende abokhulwan'na etsisululi tsianje.

⁵Nebutswa chenda khureebe OMWAMI mbelio.”

⁶Ma Ahabu nalanga abaroobi abahela etsimia tsine ma nabareeba mbu, “Mulolanga nzie okhuseera Ramotsi nohomba tawe?” Nabo nibakalusia mbu, “Tsia oseere, OMWAMI nakhuhelesie obulechi.”

⁷Nebutswa Yehoshafati nareeba mbu, “Salikhwoho omuroobi undi owakhunyala okhureebelamwo OMWAMI tawe?”

⁸Ahabu naboola mbu, “Aliho mulala, Mikaya omwana wa Imila. Nebutswa ndamusuula sichila saroobangakhwo ling'ana liosi lilahi khuise tawe, buli lwosi aroobanga amabi konyene khuise.” Yehoshafati namubool'la, “Oraboola mbwo tawe.”

⁹Ma Ahabu nalanga mulala khubakhongo bomunyumbaye namuruma atsie okhulanga Mikaya bwangu.

¹⁰Abaruchi babili yabo bali nibebiikhile tsingubo tsiabwe etsioburuchi, nibekhaye khutsindebe tsioburuchi hamuchitsi esioba wesilibwa sia Samaria ne abaroobi bali nibaroobelanga imbeli wabwe.

¹¹Mulala khubaroobi, Sedekia omwana wa Kenaana yalomba tsinzika tsiesibia ma nabool'la Ahabu mbu, “Kano niko ako MWAMI aboolanga ‘Noli netsino nolwane Abasiria ma nobaleke.’ ”

¹²Abaroobi bandi bosi barooba butswa akene yako mbu, “Tsia oseere Ramotsi ne noleke. OMWAMI nakhuhelesie obulechi.”

¹³Ne omurume owaowatsia okhulanga Mikaya yamubool'la mbu, “Abaroobi bandi bosi baroobele mbu omuruchi naleke, ne nawe kenyekhanga oroobe mbwo.”

¹⁴Nebutswa Mikaya naboola mbu, “Ndesuhanga muliira lia Nyasaye Oli mwoyo mbu namboole aka nayambool'le okhuboola.”

¹⁵Olwa yoola imbeli womuruchi Ahabu, omuruchi yamureeba mbu, “Mikaya, ololanga ise nende omuruchi Yehoshafati khutsie okhuseera Ramotsi nohomba tawe?” Mikaya nakalusia mbu, “Tsie museere. Tooto mwene namuleke OMWAMI namuhelesie obulechi.”

¹⁶Nebutswa Ahabu yamukalusia namubool'la mbu, “Olwol'lomanga n'nase muliira lio MWAMI, oboolenje obwatooto. Ndikhubool'la esiakhanga akene yako?”

¹⁷Mikaya nakalusia mbu, “Ndolanga amahe ka Baisiraeli nikasalan'ne mubikulu singa amakondi akabula omwayi. Ne OMWAMI aboolanga mbu, ‘Abandu yaba babula omwemeli, lekha bakalukhe ingo nomulembe.’ ”

¹⁸Ahabu nabool'la Yehoshafati mbu, “Sikhubooleye saroobangakhwo ling'ana lilahi khuise tawe? Buli khasotso aroobanga amabi konyene khuise.”

¹⁹Mikaya natsilil'la okhuboola mbu, “Hulile ako MWAMI aboolanga. Nduutsi OMWAMI niyekhaye khundebeye eyoburuchi mwikulu, ne abamalaika babe bosi nibasinjiye ahembi n'naye.

²⁰OMWAMI nareeba mbu, ‘Niwina owanokaate Ahabu ma naatsie okhwir'rwa Ramotsi?’ Balala khubamalaika baboola ling'ana elala ne abandi nibaboola elindi,

²¹okhwola omwoyo undi narul'lamwo, nasinjila imbeli wo MWAMI, naboola mbu, ‘Ise nise owanomukaate.’

²²OMWAMI namureeba mbu, ‘Nomukaate mbwena?’ Omwoyo uyo naye nakalusia mbu, ‘Nanzie okhubool'la abaroobi ba Ahabu bosi nababoole obubehi.’ OMWAMI naboola mbu, ‘Tsia omukaate. Noleke.’ ”

²³“Yako niko akekhol'le. OMWAMI ukhol'le abaroobi baabo yaba bosi bakhukaate. Nebutswa ye omwene ukhalachile mbu amabi nakakhukwile.”

²⁴Ma omuroobi Sedekia natsia khu Mikaya, namukhupa oluhi m'moni, namureeba mbu, “Niliina olwo omwoyo wo MWAMI yarula muise nal'loma n'nawe?”

²⁵Mikaya namukalusia mbu, “Nokalole olwa nobe niwinjiye musikoti siomukari okhwebisa.”

²⁶Ma omuruchi nalaka mulala khubakhongobe mbu, “Fumila Mikaya omuhile khu Amoni omulindi welitaala, ma khandi omuhile khu Yoashi omwana womuruchi.

²⁷Obabool'le bamure mubuhambe ma bamulisinjie omukaati nende amaatsi okhwola olwa ndikalukha nomulembe.”

²⁸Mikaya naboola, “Nolikalukha nomulembe OMWAMI sinabe nal'lomeye muise tawe.” Nameeta okhuboola, “Huliye abandu mwesi akambooye.”

²⁹Ma omuruchi Ahabu wa Isiraeli nende omuruchi Yehoshafati wa Yuda nibatsia okhuseera litaala lia Ramotsi elili mu Gileadi.

³⁰Ahabu nabool'la Yehoshafati mbu, “Olwa khutsitsanga mwihe, ise nandekalukhanie nafwane omundu undi, nebutswa ibe webiikhe tsingubotsio etsioburuchi.” Ma omuruchi wa Isiraeli natsia mwihe niyekalukhanisie.

³¹Omuruchi wa Siria yali nalakile abasikari bamakaari kaake amakhumi kataru nende kabili mbu barakhaseerakhwo omundu undi wosi narali omuruchi wa Isiraeli tawe.

³²Kho olwa balola omuruchi Yehoshafati, bosi bapaala mbu niye omuruchi wa Isiraeli, ma nibenya okhumuseera. Nebutswa olwa yakhupa ekhwisi,

³³nibamanya mbu sali omuruchi wa Isiraeli tawe, ma nibalekha okhumuseera.

³⁴Nebutswa mulala khubasikari ba Siria yetsukhan'na nalasile oluyingolwe ne nilukhupa omuruchi Ahabu khubwong'ano bwemumbafu buli. Ahabu nabool'la omwilusi welikari lilie mbu, “Sukhana bwangu orule mwihe, sichila fumir'rwe masaliye.”

³⁵Olwo obusoolo bwameetekha, omuruchi Ahabu yali butswa mwikarilie, nahenjele Abasiria. Amatsahi okhurula muburemachebwe karaatsa ma niketsula hasi welikari lilie, ne olwo obwiile bwoola, yamala afwe.

³⁶Eliuba nilili ahembi okhuyeela, lilako liarula mubalwani ba Isiraeli mbu, “Buli mundu akalukhe musibalasie khandi mwitookho liabwe.”

³⁷Kho omuruchi Ahabu yafwa ma om'bili kukwe nikuhilwa Samaria nikuyabilwa.

³⁸Likari lilie liasaabilwa mwiyabo lia Samaria ahetsimbwa tsiakhombela amatsahi kaake ne abatamba nibesinga singa obwo MWAMI yali okhuboola kakhekhole.

³⁹Amang'ana kandi kosi akomuruchi ahabu yakhola, nikalimwo akeinyumbaye eyang'oonibwa nende ameno keinzofu ma nende amatookho kosi akayombokha, kahandiikwa musitapu siamang'ana ketsinyinga tsiabaruchi ba Isiraeli.

⁴⁰Namal'le okhufwa, omwanawe Ahasia yabukula oburuchi musinjesie.

⁴¹Mumuhika kwakhane okwoburuchi bwa Ahabu wa Isiraeli, Yehoshafati omwana wa Asa yakholwa omuruchi wa Yuda.

⁴²Yali nende emihika amakhumi kataru nende chirano olwa yachaaka okhuruka ma naruka mu Yerusalemu khulwemihika amakhumi kabili nende chirano. Nyinawe yalangwanga Asuba, omukhaana wa Shilihi.

⁴³Yakhola amalunji imbeli wo MWAMI singa Asa samwanawe yakhola, nebutswa nabundu hokhwekayakayila ebiniini sihayononibwa tawe, ma abandu batsilil'la butswa okhuhaana emisango nende okhusambilaho obwali.

⁴⁴Yehoshafati yalomba omulembe nende omuruchi wa Isiraeli.

⁴⁵Amang'ana kandi kosi aka Yehoshafati yakhola, singa obwa obululubwe bwali khandi nende amahe kaake, kahandiikwa musitapu siamang'ana ketsinyinga tsiabaruchi ba Yuda.

⁴⁶Yamulula abatamba basaatsa bosi abarumikhanga khutsisambwa tsiabanasibala, abali nibalekhwa okhurula mumatukhu kasamwanawe, Asa.

⁴⁷Esibala sia Edomu, sisiali nende omuruchi tawe. Siarukungwa nende omulondi butswa oweelwa nende omuruchi wa Yuda.

⁴⁸Omuruchi Yehoshafati yalomba etsimeeli tsingali singa etsia Tarishishi khulwo khutsia Ofiri okhwenda etsahabu, ne sitsiayolayo tawe sichila tsiafunikhila khunjila musibala sia Eskonigeberi.

⁴⁹Ma omuruchi Ahasia wa Isiraeli niyehaana okhuhuchil'la abandu babe okhutsia nende aba Yehoshafati, nebutswa Yehoshafati yasuula.

⁵⁰Yehoshafati yafwa ma nayabilwa mubilindwa biabaruchi ebiali mwitookho lia Daudi, ne omwanawe Yehoramu nakholwa omuruchi musilenje sisie.

⁵¹Mumuhika kwakhane nakhataru okwoburuchi bwa Yehoshafati wa Yuda, Ahasia omwana wa Ahabu yakholwa okhuba omuruchi wa Isiraeli, ma naruka mu Samaria khulwemihika chibili.

⁵²Yakhol'la OMWAMI tsimbi, nalondanga esifwanani esibi esiasamwana Ahabu, nyina mwana Yesebeli, nende omuruchi Yeroboamu omusiani wa Nabali owali niyemel'la Isiraeli mutsimbi.

⁵³Yekayakayanga nende okhurumikhila Baali, khandi singana samwana yakholanga nasiliyo, yasenula lileko lio MWAMI, Nyasaye wa Isiraeli.