Read lunyore 1 ABARUCHI 3 Bible Online

1 ABARUCHI 3 - lunyore bible

1 ABARUCHI 3

¹Solomoni yahamba omuruchi we Misiri obwikho olwa yateesia omukhaanawe. Yamuleera amenye mwitookho lia Daudi okhwola olwa yakhamale okhwombokha inyumba yiye omwene, Ehekalu yo MWAMI nende lisiisi liokhubotokhana Yerusalemu.

²Abandu bali nibasihan'na emisango khutsisambwa habundu hosi, sichila olwene yilwo Ehekalu yo MWAMI yali nesili okhwombokhwa.

³Solomoni yayanza OMWAMI ma nalonda amebaalo kasamwanawe Daudi, habula khandi yeeranga tsinyama ne natsihaana singa omusango khutsisambwa etsili hosi hosi.

⁴Litukhu elala omuruchi Solomoni yatsia Gibeoni okhuhaana emisango sichila niho aholusambwa olwamanyikha okhusila lwali. Yali niyanala okhuhaana emisango ehelefu ndala khulusambwa yilwo.

⁵Obutukhu yibwo OMWAMI yalolekhela Solomoni mwilooro nali Gibeoni, ma namureeba mbu, “Nisina esia wakhenya khuhelesie?”

⁶Solomoni nakalusia mbu, “Buli lwosi wamanyinjia obuyanzi obukali khupapa wanje Daudi owali omusumbawo, sichila yachendenga mubwatooto, nende obulunji ma nende obukol'lokhu bwomwoyo imbeliwo. Khandi watsilil'la okhumumanyia obuyanzi obwinji khulwa okhumuhelesia omwana orukanga esibala luno.

⁷Ne luno OMWAMI Nyasaye mwanje, waimbuchil'la ise omurumikhiliwo okhuba omuruchi musilenje sia papa wanje Daudi. Nebutswa ise ndi butswa omwana omuti ma simanyile obwokhuruka tawe.

⁸Nise uno hakari wabandu baabo abaweela okhuba ababo, abali abenji kata abarakhabalwa tawe.

⁹Kho umbelesie obuchesi obwokhuruka abandubo mubwatooto nende okhumanya obwabukhani hakari wamalahi nende amabi. Nikarali mbwo ise ndakharuka mbwena abandu baabo abakhongo yaba?”

¹⁰Amakhuwa ka Solomoni yareeba yako kayanzisia OMWAMI.

¹¹Kho yamubool'la mbu, “Sichila mbu urebele obuchesi bwokhuruka mubwatooto, musilenje siokhureeba okhumenya amatukhu amenji nohomba obuhinda, nohomba kata okhufwa khwabasukubo,

¹²nakhukhol'le okoreebele. Nakhuhelesie obuchesi obwinji nende okhumanyilisia okhuyomba obwomundu wosi yanyoolakhwo nohomba obwomundu wosi yakhanyoolekhwo.

¹³Khandi nakhuhelesie kosi akorareebele; mubulamubwo bwosi wakhabe nende obuhinda nende oluyali okhunyomba omuruchi undi wosi.

¹⁴Ne niwakhambul'la ma olinde amalako kanje nende tsinjila tsianje singa papawo Daudi yakholanga, ndakhakhukhole okhumenya emihika eminji.”

¹⁵Solomoni yabuukha ne namanya mbu Nyasaye ul'lomele n'naye mwilooro. Ma natsia Yerusalemu nasinjila imbeli we Lisanduku lie Indakano yo MWAMI, nahaana omusango omusambe nende okwobuhambani khu MWAMI. Ma nalombela abakhongobe bosi lisabo.

¹⁶Litukhu lindi abakhasi babili abali abatamba beetsa imbeli womuruchi Solomoni.

¹⁷Mulala khubo naboola mbu, “Omwami, ise nende omukhasi uyu khumenyele munyumba ndala. Ndebula omwana omusiani nalola.

¹⁸Inyuma wamatukhu kabili naye khandi niyebula omwana omusiani. Khwali munyumba yimwo babili fwenyene, omundu undi wosi siyalikhwomwo tawe.

¹⁹Obutukhu nalebe omukhasi uyu yali nasukhananga ne nakona khumwanawe nam'miina ma omwana nafwa.

²⁰Yamala nabuukha butukhu hakari ma nabukula omwana wanje halubafu wanje hayali nakon'ne nase nindi mundoolo, namuhila hayakonanga ne nabukula owali nafwiye namura handali nindi.

²¹Olwa mbukhile m'mabwebwe okhununia omwana wanje ninyoola ufwiye. Olwa muhengele bulahi ne nindola mbu sali owanje tawe.”

²²Nebutswa omukhasi wasie uyo naboola mbu, “Tawe. Omwana oli mwoyo nowanje, ne ofwiye niye owuwo!” Ma nibahingan'na imbeli womuruchi.

²³Ma omuruchi Solomoni naboola mbu, “Buli mulala khu inywe aboolanga omwana oli mwoyo nowuwe ne ofwiye nowowasie.”

²⁴Ma naboola mbu, “Nder'ra olukanga.” Ma olukanga niluleerwa.

²⁵Ma omuruchi naboola mbu, “Remanie omwana oli mwoyo uyo mubitonye b'bili ma muhelesie buli mukhasi esitonyesie.”

²⁶Omukhasi owali mwene omwana owali mwoyo nabool'la omuruchi, “Omwami, noyanza oreera omwana tawe. Mala omuhaane khuwasianje uyo.” Ne omukhasi undi uyo naboola mbu, “Orakhamuhaanakhwo khumulala khu ifwe tawe, muremanie mubitonye b'bili ma okhukabul'le.”

²⁷Ma Solomoni naboola mbu, “Mureera omwana uyo tawe. Mumuhaane khumukhasi wokhuranga. Niye nyina watooto.”

²⁸Olwabandu ba Isiraeli bahul'la obukhalachi bwa Solomoni, bamuhelesia oluyali olukali, sichila bamanya mbu yali nobuchesi bwa Nyasaye khulwokhuhaana obukhalachi bwatooto.