Read lunyore 1 ABARUCHI 4 Bible Online

1 ABARUCHI 4 - lunyore bible

1 ABARUCHI 4

¹Solomoni yali omuruchi wa Isiraeli yosi,

²ne bano nibo abali abemelibe: Asaria omwana wa Sadoku niye owali omwesaalisi.

³Abahandichi bali Elihorefu nende Ahija abaana ba Shisa. Omuhandichi wamang'ana kelihanga yali Yehoshafati omwana Ahiludi.

⁴Omukhongo wabasikari yali Benaya omusiani wa Yehoyada. Abesaalisi bali Sadoku nende Abiatsari;

⁵Omukhongo wabakafuna betsisoma yali Asaria, omusiani wa Natsani. Omuchetsiyi weinyumba yomuruchi yali Omwesaalisi Sabudi omusiani wa Natsani;

⁶Omusinjil'li wabatiyi behango homuruchi yali Ahishari. Omusinjil'li wemilimo chiokhuhachibwa yali Adoniramu omusiani wa Abuda.

⁷Solomoni yeela abasaatsa likhumi nende babili okhuba abakafuna betsisoma mu Isiraeli mwosi. Nibo abahininjia ebiakhulia mutsisoma tsiabwe, khulwomuruchi nende abeinyumbaye. Buli mulala yahininjia ebiakhulia bihela omwesi mulala khumuyika.

⁸Kano niko amera kabwe nende tsisoma tsiabasinjil'langa: Beniihuri: Olusoma lwebikulu bia Efuraimu.

⁹Benidekeri: Amataala ka Makasi, Shalibimu, Betsishemeshi, Eloni nende Betsihanani.

¹⁰Benihesedi: Amataala ka Arabotsi nende Soko ma nende olusoma lwa Heferi lwosi.

¹¹Beni Abinadabu owatesia omukhaana wa Solomoni olangwa Tafatsi: Olusoma lwa Dori lwosi.

¹²Baana omwana wa Ahiludi: Amatookho ka Taanaki, Mekito, nende olusoma lwosi oluli ahembi nende litookho lia Saretsani emwalo welitaala lia Yesereli ma okhwola khwitaala lia Abelimehola, nende litaala lia Yokimeamu.

¹³Benigeberi: Litookho lia Ramotsi Gileadi nende amataala ka Gileadi akolwibulo lwa Yairi wanga Manase, nende olusoma lwa Arigobu mu Bashani, kasasaba akabotokhanwa namasisi khandi akali nebilibwa biomukasa.

¹⁴Ahinadabu omwana wa Ido: Olusoma lwa Mahanaimu.

¹⁵Ahimasi, owateesia omukhaana wa Solomoni owalangwa Basematsi: Olusoma lwa Nafutali.

¹⁶Baana omwana wa Hushai: Olusoma lwa Asheri nende litaala lia Bealoti.

¹⁷Yehoshafati omwana wa Parua: olusoma lwa Isakari.

¹⁸Shimei omwana wa Ela: olusoma lwa Benjameni.

¹⁹Goberi omwana wa Uri: Olusoma lwa Gileadi olwarukungwa nende Omuruchi Sihoni wa Amori nende omuruchi Ogu wa Bashani. Okhumeeta khuyaba likhumi nababili, yaliho omukafuna mulala owarukanga esibala sia Isiraeli siosi.

²⁰Abandu ba Yuda nende Abaisiraeli bali abenji singa omuyekhe khuluchinga lweinyanza; balitsanga nibanywa ma nibasangaala.

²¹Oburuchi bwa Solomoni bwalimwo tsisoma tsiosi okhurula khumuchela kwa Efurate okhwola Filisiti nende khulwakho lwe Misiri. Bamurunganga obusuru ma nibaba hasi hoburuchibwe mubulamu bubwe bwosi.

²²Ebiakhulia bia Solomoni yenyanga buli litukhu biali etsiliita etsielefu tsirano etsiobusie obunyukhe nende etsiliita etsielefu likhumi etsiobusie obuhandala;

²³tsing'ombe tsinolu likhumi nende tsing'ombe amakhumi kabili etsiayilwa musiayo, ma nende amakondi emia ndala nende ebitsusu, etsikongoni, tsimbongo nende tsingokho.

²⁴Solomoni yali omuruchi khubibala biosi ebiali emasaba womuchela kwa Efurate, okhurula Tifisa okhwola khwitookho Gasa. Abaruchi bosi abali emasaba womuchela yikwo bali hasi hoburuchibwe yali nomulembe khutsimbia tsiosi etsiali ahembi.

²⁵Oluhono lwayali mwoyo abandu bosi mu Yuda nende Isiraeli bali nomulembe, buli inyumba yali nende omukunda kwayo kwemisabibu nende okwamakhuyu.

²⁶Solomoni yali netsisululi tsiomubitioli etsielefu amakhumi kane khulwamakaarike nende etsisululi etsielefu likhumi natsibili tsiobulwani.

²⁷Abakafuna likhumi nababili bahiinichisinjia omuruchi Solomoni ebiakhulia nende bosi abetsanga khumusaaya. Buli mulala yalinji nende omwesikwe okwokhulera ebiakhulia ne sibalekhakhwo esindu siosi sileeme tawe.

²⁸Buli omukafuna khandi yaleeranga esitonyesie sieshayiri nende obulimo bwetsisululi tsiamakaari nende etsietsimbili olwa bienyekhanga.

²⁹Nyasaye yahelesia Solomoni obuchesi nende obumanyilisi obwinji okhusila ma nende obumanyilisi oburakhachelwakhwo tawe.

³⁰Solomoni yali omuchesi okhuyomba abachesi bosi abebukwe nende abe Misiri.

³¹Yali omuchesi okhuyomba abandu bosi. Yayomba Etsani okhurula Eserahi, nende Hemani, Kalikoli na Darida abasiani ba Maholi. Oluyalilwe lwalanda mubibala biosi ebiali ahembi.

³²Yaboola tsingano etsielefu tsitaru khandi nakulukunza tsinyembo okhuyomba elefu ndala.

³³Yaboolanga akemisala nende akemimela, okhurula khumisiita chia Lebanoni okhwola khumabinu akamela khumasisi. Yaboola aketsisolo, amanyonyi, ebikooko bimoolanga hasi nende tsisutse.

³⁴Abaruchi bomusibala siosi bahul'la akobuchesibwe ma barumanga abandu okhumuhul'la.