Read lunyore 1 ABARUCHI 5 Bible Online

1 ABARUCHI 5 - lunyore bible

1 ABARUCHI 5

¹Omuruchi Hiramu wa Tiro yalinji omulina wa Daudi ne olwa yahul'la mbu Solomoni yali nanyoye oburuchi bwa Samana yamurumila abarume.

²Solomoni naye yakalusia oburume buno khu Hiramu:

³“Ibe umanyile mbu khulwamahe amenji aka Papa wanje Daudi yalwananga nende abasukube abali nibamubotokhana, siyaali onyala okhwombokha Ehekalu yokhwekayakaya OMWAMI Nyasayewe tawe okhwola olwa yali nalekele abasukube bosi.

⁴Ne luno OMWAMI Nyasaye wanje waimbelesia omulembe khutsinzakho tsiosi. Sindikhwo nende abasuku tawe.

⁵OMWAMI yasubisia papa wanje Daudi mbu, ‘Omwanawo owandikhola okhuba omuruchi musilenjesio, yakhanyombokhele Ehekalu.’ Ne luno khalachile mbu nyombokhe Ehekalu yokhwekayakaya OMWAMI Nyasaye wanje.

⁶Kho orume abandubo Lebanoni baremele emisiita. Abandu banje nababeyo okhutiya halala nende ababo. Ne ndakharunge abandubo omurungo kwawakhaboole. Singa omanyile, abandu banje sibamanyile okhuremaka emisaala singa ababo tawe.”

⁷Olwa Hiramu yahul'la amang'ana ka Solomoni yasangala okhusila ma naboola mbu, “OMWAMI yetsoomibwe litukhu lino, khulwo okhuhelesia Daudi omwana omuchesi okhuruka esibala esikali sino.”

⁸Ma Hiramu narumila Solomoni oburume buno mbu, “Nyoye oburumebwo ne ndi omwerechekhu okhukhola akoreebele. Nambaane emisaala chiemisiita nende echiemitarakwa.

⁹Abandu banje nabaleere emisaala yichio okhurula Lebanoni okhwola khunyanza, ma bachibohe halala chiel'leme khumaatsi okhwola habundu haundaka. Yaho niho habandu banje nabachiboholol'le ma abandubo nabachibukule. Ne ndakhenya ibe nohaane ebiakhulia bionyene khubandu banje.”

¹⁰Ma Hiramu nahelesia Solomoni emisaala chiemisiita chiosi nende echiemitarakwa singa obwa yali nareebele.

¹¹Solomoni naye nahelesia Hiramu etsitani etsielefu tsibili etsieingano nende etsiliita etsielefu etsimia tsine etsiamafura kemiseituni buli muhika khulwokhulisia abandu baabe.

¹²OMWAMI yahelesia Solomoni obuchesi singa obwa yali niyalaka. Omulembe kwaliho hakari wa Hiramu nende Solomoni, ma nibalia emuuma yakhuhuchilisania.

¹³Omuruchi Solomoni yahandika abatiyi etsielefu amakhumi kataru okhurula mu Isiraeli mwosi abokhutiya khulwokhuhachibwa,

¹⁴ma nakhola Adoniramu okhuba omusinjil'li wabwe. Yabakabula mumikanda chitaru echiabandu etsielefu likhumi, ne buli mukanda kwamalanga omwesi mulala Lebanoni ne emiesi chibili ingo.

¹⁵Solomoni khandi yali nende abandu etsielefu amakhumi munane musibala siebikulu abokhuyaba amachina ne abandi etsielefu amakhumi kane nakataru abokhukachinga.

¹⁶Ma nara abandu etsielefu tsitaru nende etsimia tsitaru okhuba abasinjil'li babwe khulwokhuhenga emilimo chiabwe.

¹⁷Khulwe lilako liomuruchi Solomoni, bayaba amachina amakhongo khandi amasiro khulwomusinji kwehekalu.

¹⁸Abatiyi ba Solomoni nende aba Hiramu ma nende abandu okhurula mwitaala lia Gebali babaatsa amachina yako bulahi nibalomba emisaala khulwokhwombokha Ehekalu.