Read lunyore 1 ABARUCHI 6 Bible Online

1 ABARUCHI 6 - lunyore bible

1 ABARUCHI 6

¹Inyuma wemihika etsimia tsine nende amakhumi munane okhurula Abaisiraeli nibarula Emisiri, mumuhika kwakhane okwoburuchi bwa Solomoni mu Isiraeli, mumwesi kwakhabili, okuli omwesi kwa Sivi, Solomoni yachaaka okhwombokha Ehekalu.

²Mukari mwayo mwali noburambi bwetsimita amakhumi kabili nende chine nachitaru nobubambukhu buhela etsimiita tsirano nachine ma nende oburambi bwokhutsia ikulu obuhela etsimiita likhumi natsitaru nende enusu.

³Esikoti siomubwinjil'lo siali noburambi obuhela etsimiita tsine nende enusu, ne obubambukhu etsimiita tsirano natsine, ma siali nobuchiikha obwahelana nende Ehekalu yene.

⁴Amasisi kehekalu kali nende amatilisa akali amanyel'le esioba ne amabambukhu mukari.

⁵Khumasisi kesioba, khulubeka lwemukongo wehekalu bombokhayo inyumba yetsikorofa tsitaru, buli korofa yali noburambi bweikulu obuhela etsimiita tsibili nende etsisentimita tsibili.

⁶Buli sikoti mukorofa yahansi siali nobubambukhu obuhela etsimiita tsibili nende etsisentimita tsibili, ekorofa yahakari yali nebikoti biobubambukhu buhela etsimiita tsibili nende etsisentimita tsine natsitaru. Ebikoti biekorofa yakhataru biali nobubambukhu buhela etsimiita tsitaru nende esentimita ndala. Lisisi liehekalu khubuli korofa liali linyel'le okhuyomba eliekorofa yahasi khuyo kho ebikoti bialetungwa bibe ebinyala okhusinjila khumasisi kehasi sila etsisiilo okhwombokhwa okhwinjisibwa mwisisi liehekalu.

⁷Amachina akombokhelwa Ehekalu kosi kabatsilwa hakayabungwa, ma liyoka lietsinyundo nende elietsimbatso nohomba esitiyilo sindi siosi esiesibia siliahulilikhakwho olwehekalu ymbokhwanga tawe.

⁸Omuliango kwobwelu bwehasi kwali elubeka lwenandete lwehekalu, nende ingasi yalikhwo eyokhutsia khukorofa yakhabili ne eyakhataru.

⁹Ma omuruchi Solomoni yamala okhwombokha Ehekalu. Yaramwo tsimbao tsiokhutiila esilama mukari okhurula khumusaala kwemisita.

¹⁰Inyumba yetsikorofa tsitaru eyabuli korofa yali noburambi bweikulu obwetsimita tsibili nende etsisentimita tsibili yombokhwa niyetila khumasisi kehekalu akesioba, ma yahambanibwa khuko nende tsimbabo tsiemisiita.

¹¹Omwami nabool'la Solomoni mbu,

¹²“Niwakhahul'le amalako kanje kosi, ne nakhukhol'le akandalaka papawo Daudi.

¹³Ndakhamenye halala nabandu banje Isiraeli muhekalu yawombokhanga yino, ne sindakhabalekhekhwo tawe.”

¹⁴Ma kho Solomoni namala okhwombokha Ehekalu.

¹⁵Amasisi komukari kombokhelwa tsimbao tsiemisaala tsiemisiita okhurula hasi okhwola khwikama, ne ebwelu bwalombelwa tsimbao tsiemitarakwa.

¹⁶Esikoti siomukari esialangwa Habundu Hatsienukhu Okhusila, siombokhwa inyuma mukari mwehekalu. Esikoti yisio siali nende oburambi bwetsimita tsirano natsine ma siafunikhwa nende tsimbao tsiemisiita okhurula hasi okwola khwikama.

¹⁷Esikoti esiali imbeli wa Habundu Hatsienukhu Okhusila siali nende oburambi bwetsimita likhumi nende munane.

¹⁸Tsimbao tsiemisiita yitsio tsiabaatswa omufwano kwebimuka nende obwamu, mukari mwosi mwalombelwa omusiita ma amachina kelisisi sikaali akanyala okhulolekha tawe.

¹⁹Inyuma mukari mwehekalu, esikoti siomukari siali nisiombokhwa ahe Lisanduku lie Indakano yo MWAMI liarebwa.

²⁰Esikoti siomukari sino siali noburambi obwetsimita tsirano natsine obubambukhu bwetsimita tsirano natsine, tsiosi nitsiafunikhwa nende etsahabu isiyikhu. Halusambwa hali nihalombwa nende tsimbao tsiemisiita.

²¹Mukari mwehekalu mwali nimwafuumwa nende etsahabu ne eminyol'lo chietsahabu chiabir'ra mubwinjil'lo bwesikoti siemukari esiali nasio nisiafuumwa nende etsahabu.

²²Mukari mwehekalu mwosi mwali nimwafuumwa nende etsahabu, halala nende olusambwa oluli Habundu Hatsienukhu Okhusila.

²³Yabatsa abakerubi babili khumusala kwomuseituni ma nabara Habundu Hatsienukhu Okhusila, buli mulala yali noburambi bwetsimita tsine netsisentimita tsine.

²⁴Buli olubaha lwali noburambi obuhela etsimiita tsibili netsisentimita tsine.

²⁵Khandi Omukerubi wakhabili yali nende obukali buhelambwo. Abakerubi yabo bosi bali nesichelo silala nende okhufwanana khulala.

²⁶Oburambi bwomukerubi mulala bwahelana nomukerubi undi.

²⁷Abakerubi yabo bareebwa Habundu hatsienukhu Okhusila, mu Hekalu nibabambuye tsimbaho tsiabwe. Olubaha lwomukerubi mulala lwatiila khwisisi elala ne olubaha lwomukerubi undi nilutiila khwisisi lindi ne tsimbaha tsindi nitsitiilana hakari wesikoti.

²⁸Abakerubi yabo bali nibafunikhwa netsahabu.

²⁹Amasisi kesikoti esikali nende akesikoti siomukari, kabatswakhwo ebifwanani biabakerubi, ebiemisaala chiamasindu nende ebiamauwa.

³⁰Kata obwelu bwali nibwafuunikhwa nende etsahabu.

³¹Omuliango omukali okwali nikwalombwa khutsimbao tsiemiseituni kwali nikwarebwa mubwinjil'lo mwa Habundu Hatsienukhu Okhusila. Khwikulu khwakwo khwali nikhwafumbwakhwo etsikona tsirano.

³²Emiliango chiali nichiabaatswakhwo ebifwanani biabakerubi emisaala chiamasindu nende amahuwa. Emiliango, halala nebifwanani biabakerubi, emisaala chiamasindu nende amahuwa. Emiliango, halala nebifwanani bia bakerubi nende emisaala chiamasindu chiali nichiafunikhwakhwo netsahabu.

³³Mubwinjil'lo bwomuliango omukali yaramwo tsimbaho tsiemiseituni tsimbeka tsine.

³⁴Chialiho emiliango chibili echiokhufumbwa

³⁵echiali nichiang'oolwakhwo ebifwanani biabakerubi, emisaala chiamasindu nende amahuwa, ebiali nibiafuunikhwakhwo etsahabu.

³⁶Omukitsi kwomukari kwombokhwa imbeli wehekalu ne kwali nende tsimbaaso tsiamachina amabaatse nende olubaaso l'lala lwetsimbao tsiemisiita.

³⁷Omuse kwe Hekalu kwalombwa mumuhika kwakhane muburuchi bwa Solomoni omwesi kwakhabili okuli omwesi kwa Sibu.

³⁸Mumuhika kwelikhumi nende l'lala omwesi kwa munane okwa Buli ehekalu yamala okhwombokhwa singa butswa yali niyaloosibwa. Yabukula Solomoni emihika chine nachitaru niyombokhungwa.