Read lunyore 1 ABARUCHI 7 Bible Online

1 ABARUCHI 7 - lunyore bible

1 ABARUCHI 7

¹Khandi Solomoni yombokha inyumbaye eyamubukula emihika likhumi nende chitaru.

²Yombokha Inyumba Yomutsuru kwa Lebanoni yali noburambi bwetsimita amakhumi kane nende tsine, obuchiikha bwetsimita amakhumi kabili natsibili ne oburambi bweikulu bwali etsimiita likhumi natsitaru nenusu. Yombokhwa khatsimbaso tsine tsietsisiilo tsiomusiita, ne emikul'lo tsiemisiita tsiali ikulu wetsisiilo.

³Yasimbilwa tsimbao tsiemisiita etsiekhala khutsisiilo likhumi nende tsirano mubuli lubaso, ma tsiosi nitsiba amakhumi kane nende tsirano.

⁴Tsimbaso tsitaru tsiamatilisa tsiali khwisisi liolubeka l'lala khandi tsimbaso tsitaru nitsiba khwisisi liolubeka lundi. Buli lidirisha nilihengan'ne nelindi.

⁵Emiliango nende amatilisa biosi biakholwa okhuba ebihelanu, ne tsimbaaso tsitaru etsiamadirisha tsiahengana nende etsiali khulubeka lundi.

⁶Obwelu bwetsisiilo bwali noburambi bwetsimita amakhumi kabili natsibili, ne obuchiikha bwali etsimiita likhumi natsitaru nenusu. Bwali nende esikoti imbeli wabwo esialetwa nende etsisiilo.

⁷Esikoti esieindebe yoburuchi, esialangungwa obwelu bwobukhalachi, omwa Solomoni yakhalachilanga emise siali nisiombokhwa netsimbao tsiemisiita okhurula hasi okhwola khwikama.

⁸Inyumba ya Solomoni mwene yamenyangamwo eyali mumukitsi kundi inyuma wobwelu bwobukhalachi, yalombwa butswa singa etsindi. Khandi yombokhela omukhasiwe owali omukhaana womuruchi we Misiri inyumba efwanambwo.

⁹Emiombokho yitsi tsiosi tsialombwa nende amachina akabaatswa bulahi okhurula hasi okhwola khwikama. Amachina yako kabatsilungwa m'mutsuru ma kali nikahelana bulahi, nikakhalakwa mukari nende esioba bulahi nomusimeno.

¹⁰Omuse kwalombwa nende amachina amakali akalombelwa m'mutsuru, malala khuko kali noburambi bwetsimita tsitaru nenusu ne akandi etsimiita tsine.

¹¹Amachina kandi karebwa khwikulu khwako, akali nikabatswa obulahi mubuhelanu, ma nende tsimbao tsiemisiita.

¹²Omukitsi kwehango homuruchi, omukitsi kwemukari mwe Hekalu nende esikoti siomubwinjil'lo bwe Hekalu biali nende amasisi nende olubaaso l'lala olwe tsimbao tsiemisiita khubuli tsimbaaso tsitaru etsiamachina akakhalakwa obulahi.

¹³Omuruchi Solomoni yarumana omundu owalangwa Hiramu okhurula Turo alangwe.

¹⁴Samwana yali niyafwa, ne yarulanga Tiro ma naye khandi yali omusitsa wobubaatsi bwemikasa. Nyina yali omukhaana okhurula mulwibulo lwa Nafutali. Hiramu yali omusitsa omulwenyukhu khandi owamanya emilimo tsiobubaatsi. Yahuchil'la omulango kwomuruchi Solomoni okwokhuba omusinjil'li womulimo kwemikasa.

¹⁵Hiramu yalomba etsisiilo tsibili etsiomukasa, buli ndala yali noburambi buhela etsimiita munane ne obubambukhu obuhela etsimiita tsirano netsisentimita tsitaru ma natsira mubwinjil'lo bwehekalu.

¹⁶Khandi yalomba etsikofia tsibili etsiomukasa, buli ndala yali noburambi bweikulu obuhela etsimiita tsibili netsisentimita tsibili khureebwa ikulu wetsisiilo.

¹⁷Khubutsunzu khwabuli esiilo khwang'oonibwa nende eminyol'lo

¹⁸ma nalomba tsimbaaso tsibili tsiamakomamango.

¹⁹Etsikofia tsialombwa singa amatanya kokhumwalo, nitsiba noburambi bwe emita ndala nende etsisentimita munane,

²⁰ma nitsirebwa halombwa sieindika ikulu weminyol'lo. Kaliho amakomamango etsimia tsibili mutsimbaaso tsibili khubuli ekofia.

²¹Haramu yara etsisiilo tsiomukasa tsibili yitsi imbeli wobwinjil'lo bwehekalu; esiilo eyali elubeka lwenandete yalangwa Yakini[2], ne eyali esinyolu yalangwa Boasi[3].

²²Hekulu khutsisiilo, tsialikhwo etsikofia etsifwana amataanya komukasa. Ma nimbwo emilimo chiokhwombokha etsisiilo chiamalwa.

²³Hiramu yalomba litangi liamaatsi eliomukasa eliali singa ingara ne olutungu lwalio lwahela etsimiita tsibili nende etsisentimita tsibili, ne liali etsimiita tsine nende etsisentimita tsine okhurula khululika iyi okhwola khululika lundi. Okhulibotokhana liosi liali etsimiita likhumi natsitaru netsisentimita tsibili.

²⁴Ne okhulibotokhana liosi esioba khumunwa kwalio tsialikhwo netsinyali tsiebimuka biomukasa ebiali nibionganibwa halala nelitangi liosi.

²⁵Litangi liali niliekhala khumikongo tsietsichulukhi chiemikasa likhumi nachibili echiali nichiahenga olwe esioba, buli chitaru nichiahenga olubeka l'lala.

²⁶Tsimbafu tsielitangi tsana tsiali nobusiro obuhela etsimilimita amakhumi kane nakataru nende tsirano. Khundulo khwalio khwali singa khundulo khwesikombe ne liafwana singa esimuli sielitanga. Litangi yilio liali elinyala okhukinga amaatsi akahela etsiliita etsielefu amakhumi kane.

²⁷Khandi Hiramu yalomba amakaari likhumi komukasa, buli elala liali noburambi obuhela emiita ndala netsisentimita, munane ne obuchiikha obuhela emiita ndala netsisentimita munane nende oburambi bweikulu obuhela emiita ndala netsisentimita tsitaru.

²⁸Amakaari tsana kalombwa khutsimbao tsimbelani etsimbeka tsiosi etsiarebwa mutsifuremu,

²⁹ne kalikhwo ebifwanani bietsisimba, etsichulukhi nende abakerubi. Ne khutsifuremu tsana, ikulu nende hasi wetsisimba nende etsichulukhi khwalikhwo nebindu ebielela singa amahuwa.

³⁰Buli likari liali nende emikurudumu tsine etsiomukasa nende etsiakiseli tsiomukasa. Mutsikona tsialio tsine khwalimwo nebiletel'lo biomukasa bine khulwo okhurenjekhakhwo ebeseni. Ebiletel'lo yibio biali nibiang'oolwakhwo ebindu ebilahi, ebielela singa amahuwa.

³¹Efuremu yeingara yali ikulu welikari khulwokhurenjekhakhwo ebeseni. Yarulil'la ikulu welikari etsisentimita amakhumi kane natsirano ne yatsia hasi etsisentimita likhumi namunane.

³²Amakurutumu kalio kali noburambi bweikulu obuhela etsisentimita amakhumi kasasaba natsisasaba. Kali isi wetsimbao ne etsiakisoli tsiali esitonye silala nende buli likari.

³³Amakurutumu kalio kali singa akamakaari kobulwani, ne etsiakiseli tsia ko nende etsirimu nende etsiwaya biosi biali nibialombwa okhurula khumukasa.

³⁴Bialiho ebiletel'lo bindi bine mutsikona isi wabuli likari ne biali esitonye silala nende buli likari.

³⁵Omukoye kuhela etsisentimita amakhumi kabili natsibili kwabotokhana ikulu habuli likari. Ebiletel'lo bia buli likari nende tsimbao biali esitonye silala nende likari tsana.

³⁶Ebiletel'lo nende tsimbao biali nibiang'olwakhwo abakerubi, etsisimba, nende emisaala tsiamasindu ahobweyangu bwanyolekhanga.

³⁷Nimbwo amakaari kalombwa; kosi kafwanana butswa; khandi nikaba amahelanu khandi akamulomba mulala.

³⁸Khandi Hiramu yalomba etsibeseni likhumi, buli ndala khubuli likari. Buli ebeseni yali nobukali obuhela emita ndala nende etsisentimita munane okhurula khululika iyi okhwola khululika lundi; ne yali enyala okhukinga amaatsi kahela etsiliita tsimia munane.

³⁹Yara amakaari karano enandete wehekalu ne akandi karano nakara esinyolu; ne litangi yalira mukona eyebukwe wenandete.

⁴⁰Khandi Hiramu yalomba tsindabu, nemiikho nende tsindaabo. Yamalila okhulomba ebindu biosi ebia yakhol'la omuruchi Solomoni muhekalu yo MWAMI.

⁴¹Yalomba etsisiilo tsibili, etsikofia tsibili etsialombwa singa tsindaabo khwikulu khwetsisiilo.

⁴²Amang'oole keminyol'lo echiabaswa khukofia chia buli esiilo. Khandi yalomba amakomamanga komukasa tsimia tsine akaloosibwa mutsinyaali tsibili okhubotokhana etsikofia tsiokhutsisiilo.

⁴³Khandi yalomba amakaari likhumi nende etsibeseni tsiako likhumi,

⁴⁴nende litangi elala netsichulukhi likhumi natsibili etsialiletel'la.

⁴⁵Khandi yalomba tsindabu, nemiikho nende etsihuma. Ebindu yibi biosi ebia Hiramu yalombela omuruchi Solomoni khulwehekalu bialombwa khumukasa okwaruutwa.

⁴⁶Omuruchi yalaka mbu biosi bisal'lusibubwe ma bilongelwe hakari wa Sukotsi nende Saretsani, mwibanda lia Yorodani.

⁴⁷Solomoni siyachela ebindu biomukasa yibi tawe sichila biali ebinji okhusila, ma obusiro bwabio sibwamanyikha tawe.

⁴⁸Khandi Solomoni yalaka mbu ebindu biosi biomuhekalu bilombwe khutsahabu: Nabio biali olusambwa, emesa yemikaati echihanungwa khu Nyasaye,

⁴⁹ebihani bietsitaya likhumi ebialombwa khutsahabu isiyikhu ebiasinjilanga imbeli wa Habundu Hatsienukhu okhusila, mbu birano khulubeka lwenandete ne birano khulubeka lwesinyolu, amahuwa, etsitaya nende amamaki,

⁵⁰ebikombe, amahana kokhusimisiakhwo etsitaya, tsindaabo, etsisahani tsiokhusambilakhwo obwali nende ebifuria biokhuchingilwakhwo amanda komul'lo nikang'alaye nende etsipata tsiemiliango tsia Habundu Hatsienukhu Okhusila ma nende emiliango chiesioba we Hekalu. Ebindu yibi biosi bialombwa khutsahabu isiyikhu.

⁵¹Olwomuruchi Solomoni yalinamal'le emilimo chiosi khu Hekalu, yaramwo ebikoti biokhubikha ebindu biosi ebia Daudi papawe yali niyahaana khu MWAMI. Nabio biali efetsa, etsahabu nende ebindu bindi ebinji.