Read lunyore 1 ABARUCHI 8 Bible Online

1 ABARUCHI 8 - lunyore bible

1 ABARUCHI 8

¹Ma omuruchi Solomoni nalanga abemeli bosi abetsinzibulo tsia Isiraeli nende abebilibwa biabwe okhwitsa khuye mu Yerusalemu khulwokhubukula Lisanduku lie Indakano okhulihinia Sayuni litookho lia Daudi, ma balileera mu Hekalu.

²Bosi bebunjikha Mumatukhu ke Lisabo lia Mahindu, mumwesi kwakhane nakhataru, okuli omwesi kwa Etsanimu.

³Olwabemeli bosi bali nibebunjikhile, abesaalisi basikula Lisanduku lie Indakano,

⁴ma nibalichinga okhulihila mu Hekalu. Abalawi nende abesaalisi nabo khandi babukula liheema liokhubaho khwo MWAMI ma nibalihila mu Hekalu.

⁵Omuruchi Solomoni nende abandu ba Isiraeli bosi bebunjikha imbeli we Lisanduku lie Indakano ma nibalombelaho omusango kwamakondi amenji nende tsing'ombe etsiranyala okhubalikha.

⁶Ma abesaalisi nibachinga Lisanduku lie Indakano nibalihila muhekalu nibalira Habundu Hatsienukhu okhusila, isi wabakerubi babili.

⁷Tsimbaha tsiabakerubi tsana tsiabambukha ma nitsifuunikha Lisanduku nende emisaala echialichinganga.

⁸Tsindulo tsiemisaala tsana tsiali etsinyala okhulolwa nende omundu wosi owakhaba nasinjiye imbeli wa Habundu Hatsienukhu okhusila, ne tawe haundi hosi. Emisaala yitsio tsisilinjiho okhwola leelo.

⁹Esindu sindi sisialikhwo Mwisanduku yimwo tawe, nikarali amachina amabaatse kabili aka Musa yarelamwo khusikulu sia Sinai, olwo MWAMI yalomba Indakano nabandu ba Isiraeli olwa bali nibarulanga Emisiri.

¹⁰Olwabesaalisi bali nibarulanga muhekalu, lilumbesi lietsulamwo,

¹¹niliakhanga nobulafu obukali imbeli wo MWAMI, ma sibaali abanyala okhukalukhamwo okhuhesia emilimo chiabwe tawe.

¹²Ma Solomoni nasaaya mbu: “Ibe OMWAMI, waraho eliuba mwikulu, ne wahula okhumenya mumalumbesi nende musiilima.

¹³Luno khwombokheye Ehekalu yobunyali, habundu hanomenyenge khasotso.”

¹⁴Olwabandu bali nibasisinjiyeho, omuruchi Solomoni yasukhana okhubahenga, ma nabasabila tsikhabi okhurula khu Nyasaye.

¹⁵Yaboola mbu, “OMWAMI Nyasaye wa Isiraeli yetsoomibwe. Uhesisie lisubisio liayasubisia papa wanje Daudi, olwa yaboola mbu,

¹⁶‘Okhurula olwandahinia abandu banje Emisiri okhurula sili okhwelakhwo litookho liosi musibala siosi esia Isiraeli eliehekalu enyala okhwombokhwamwo ahandakhekayakayilwa. Nebutswa ndakhwela ibe Daudi okhuruka abandu banje.’ ”

¹⁷Ma Solomoni natsilil'la okhuboola mbu; “Papa wanje Daudi yachooma okhwombokha Ehekalu khulwo okhwekayakaya OMWAMI Nyasaye wa Isiraeli,

¹⁸nebutswa OMWAMI namubool'la mbu, ‘Wali habwene olwawenya okhunyombokhela Ehekalu.

¹⁹Nebutswa ibe siwakhanyombokhelakhwo tawe. Omusianiwo niye owanaunyombokhele Ehekalu.’

²⁰“Ne luno OMWAMI uhesisie ake lisubisio lilie. Ise ndi omuruchi wa Isiraeli musilenje sia papa wanje ma nyombokhele Ehekalu eyokhwekayakayila mwo OMWAMI Nyasaye wa Isiraeli.

²¹Khandi nombele habundu muhekalu ahokhura Lisanduku lie Indakano elilimwo amachina amabaatse ake Indakano eyo MWAMI yalomba nende abakuka befwe olwa yabahinia Emisiri.”

²²Kho imbeli wabandu bosi, Solomoni yatsia nasinjila imbeli wolusambwa, nachinga amakhonoke ikulu

²³ma nasaaya mbu, “OMWAMI Nyasaye wa Isiraeli, salikhwo ho omunyasaye undi singa ibe ikulu mwikulu nohomba hasi musibala tawe. Ohesianga indakanoyo nende abandubo ma obamanyia obuyanzibwo olwa bamenyanga mukhukhuhulila nomwoyo kwosi.

²⁴Uhesisie lisubisio elia wesuhila papa wanje Daudi. Olwaleelo amang'ana kosi kahesikhile.

²⁵Ne luno OMWAMI Nyasaye wa Isiraeli, sayanga mbu ohesie lisubisio lindi elia wesuhila papa wanje olwa wamubool'la mbu khasotso nabetsenjeho khubolwibulolwe owanobetsenge omuruchi wa Isiraeli, nikakhaba bakhalonda amalako kaako singa Daudi mwene yakalonda.

²⁶Kho luno, E Nyasaye wa Isiraeli, hesia kosi akawasubisia papa wanje Daudi omurmwawo.

²⁷“Nebutswa ibe Nyasaye, wakhamenya musibala sino tooto? Kata likulu liosi silili likali eliakhanyala okhukhuhela tawe, kho Ehekalu yanyombokhele yino yakhaba mbwena ingali khulwo okhukhuhela?

²⁸OMWAMI Nyasaye wanje, ise ndi omurumikhiliwo. Hulila okhusaaya khwanje ma ungalusie akakhureebanga luno.

²⁹Olindenge Ehekalu yino om'basu nobutukhu, sichila nahabundu ahawel'le okhwekayakayilwa. Umbulilenje olwa nasukhanenje nimenya khu Hekalu yino nisaaya.

³⁰Ohulilenge amasaayo kanje nende amasaayo kabandu baabo olwa bahenganga khu Hekalu yino nibasaaya. Okhuhul'le ma okhulekhele. Noli hango haho mwikulu.

³¹“Omundu naba naleerwa musiina khulwokhumukhol'la owasie obubi ma aleerwe khulusambwa lulwo oluli mu Hekalu muno khulwokhwesuuha mbu sali nesikha tawe,

³²E OMWAMI, ohulile noli mwikulu ma okhalachile abarumikhili baabo. Ohaane esinyasio khu uyo oli nesikha singa kamukhoyele, ne olekhele uyo orali nesikha.”

³³“Abandubo Abaisiraeli nibaba nibalekwa nabasuku babwe sichila bakhwoneye, ne olwa bakhukalukhila ma betse mu Hekalu ino nibasaya nende okhwetutuyia khu iwe khulwokhulekhelwa,

³⁴mwaha obahulilenje noli mwikulu. Obalekhele tsimbi tsiabwe ma obakalusie musibala esiawahelesia abakuka babwe.

³⁵“Noba niwakhekal'la ifula okhukwa sichila abandu baabo bakhwoneye, ne nibakheyama tsimbi tsiabwe ma bahenge khu Hekalu ino, nibakhusaaya mukhwetutuyia,

³⁶obahulilenge noli mwikulu. Olekhele tsimbi tsiomuruchi nende etsiabandu ba Isiraeli. Obebaal'le okhukhola akali amalunji. Ma orume ifula khusibala sisio sino esia wahelesia abandu baabo mbu sibe obulaame bwabwe inziayo.

³⁷“Inzala niyakhaba musibala nohomba olumbe nohomba ebiraakwa nibiakhononibwa nende obusindu bwokhubikhakhia, nohomba okhulibwa nemisinga tsietsisiche, nohomba kata abandu baabo nibakhaseerwa nabasuku babwe, nohomba kata obulwaye nende obusalilu nibiakhanyoolekha mubo,

³⁸ohulilenje okhusaaya khwabwe. Omundu wosi mubandubo ba Isiraeli niyakhaba nesibeela siomwoyo ma achinguule amakhono kaake nahengisie khuhekalu ino mukhusaaya,

³⁹ohulile okhusaaya khwabwe. Obahulilenge noli hango haho mwikulu, obabelenge ma obakhonyenje. Ibe wenyene niwe omanyile amakani akali mumioyo chiabandu. Okhol'le siomundu singa obwakhoyanga,

⁴⁰kho abandubo bakhuhulilenje amatukhu kosi olwa bamenyanga musibala esia wahelesia abakuka befwe.

⁴¹“Omucheni wosi orali omwibule wa Isiraeli olwaba narul'le musibala siehale khulweifuma yeliira lilio,

⁴²nahuliye obwoli omukhongo khandi owetsingufu khulwokhuhonia abandu baabo, ma yetse okhusaaya nahengele khu Hekalu yino,

⁴³mwatsa ohulile okhusaaya khukhwe noli ahomenyele Mwikulu. Omuhulile ma omukhol'le akakhureebele okhumukhol'la. Kho abandu bosi bokhusibala nabamanye mbu Ehekalu yino nyombokhele khulweibe ne niho aha nawekayakayilungwe.

⁴⁴“Olwa nolakenje abandubo okhutsia okhulwana nende abasuku babwe ma basaaye khuibe habundu hosi hababa nibali nibahengele khwitookho lino eliaweela ma nende khu Hekalu yino eyakhwombokheye,

⁴⁵ohulile okhusaaya khwabwe. Obahulilenje noli mwikulu ma obahelesinjie obulechi.

⁴⁶“Abandu baabo nibakhakhwonela — ne abulaho obulanga okhukhola obubi tawe — ma muburima mubwo olekha abasuku babwe babalekhe ma babahile musibala sindi singa ababohe, kata esibala yisio sibe nisili ehale

⁴⁷ohulile okhusaaya khwabandu baabo. Nibakhaba musibala yisio ma bakhusaaye nibeyamanga tsimbi tsiabwe ne nibetutuyia, ohulile okhusaaya khwabwe.

⁴⁸Nibaba nibakhukalukhila nomwoyo kwosi nibali musibala esiabasuku babwe yisio ma bahenge khusibala sino esia wahelesia abakuka babwe, nende khwitookho lino eliaweela nende khu Hekalu eyakhwombokheye yino,

⁴⁹ohulile okhusaaya khwabwe. Noli hango haho mwikulu obahulile ma obabeele esirenda.

⁵⁰Obalekhele tsimbi tsiabwe tsiosi nende obufukuli bwabwe khuibe, ma okhole abasuku babwe babakhol'le akesirenda.

⁵¹Bo nabandu baabo aba wahiinia Emisiri, ulumemo lwomul'lo.

⁵²“OMWAMI Nyasaye, obeelenje abandubo Isiraeli tsimbabasi nende omuruchi wabwe ma ohulilenje amasaayo kabwe buli lwosi olwa nabakhureebenje okhubakhonya.

⁵³Wabahula okhurula mubandu bandi bosi mbu babe abandu baabo, singa wababool'la okhubir'ra mumurumwawo Musa olwa waleera abakuka befwe okhurula Emisiri.”

⁵⁴Olwa Solomoni yali namal'le okhusaaya khu MWAMI, yasinjila imbeli wolusambwa hayali nasikamile ne nachingile amakhono mwikulu.

⁵⁵Yalaamila abandu bosi abali nibebunjikhileho nomwoyo omukali tsikhabi tsia Nyasaye naboola mbu,

⁵⁶“OMWAMI yetsoomibwe oheye abandu babe omulembe, singa yabasubisia yakhabahelesie. Uhesisie amasubisio kosi akobuhaani akayalomba okhubir'ra mumurumwawe Musa.

⁵⁷OMWAMI Nyasaye wefwe abe n'nefwe, singa obwa yali nende abakuka befwe, arakhakhulekhakhwo tawe nohomba okhukhwanzukhila tawe.

⁵⁸Akhukhole khube abahulili khuye, khe khube abanyala okhumenya singa obwa yenyanga khumenye khasotso, nikhulonda amalako kosi nende amasuhisio akayahelesia abakuka befwe.

⁵⁹OMWAMI Nyasaye wefwe yetsul'lenje buli khasotso lisaayo lianje lino nende obulakayi bwakhol'le khuye. Buli khasotso abelenge abandu ba Isiraeli tsimbabasi nende omuruchi wabwe, okhulondokhana nende obuha bwabwe bwabuli nyanga.

⁶⁰Kho abamahanga kosi bamanye mbu OMWAMI yenyene niye Nyasaye wefwe saliho oundi tawe.

⁶¹Kho inywe abandu babe, mubetsenge abasubilwa khasotso khu MWAMI Nyasaye wefwe, nimuhulila amalako kaake singa mukholanga olwaleelo.”

⁶²Ma omuruchi Solomoni halala nabandu bosi abaliho nibahaana emisango khu MWAMI.

⁶³Yahaana emisango chietsing'ombe etsielefu amakhumi kabili nende tsibili ma nende amakondi etsielefu emia ndala nende amakhumi kabili singa omusango kwobusanjilani. Ma kho omuruchi nende abandu bosi basayila Ehekalu okhuchihaana khu Nyasaye.

⁶⁴Litukhu liene yilio khandi yasiiya hakari homukitsi, ahali imbeli we Hekalu, ma nahaanaho emisango echiasambwa nichili emichima, emisango chiobuswache, nende esinya yetsinyama chiemisango chiobuhambani. Yakhola yaka sichila olusambwa lwomukasa lwali olutititi ne silwakhanyal'le okhuhan'nwakhwo emisango chiosi halala.

⁶⁵Solomoni halala na Baisiraeli bosi bakhola lisabo lia Mahindu imbeli we Hekalu khulwamatukhu kane nakataru. Omukanda omukali okwabandu kwaliho, balala barula ehale singa mulung'anyi lwa Hamatsi elubeka lwesinyolu nende khulwakho lwe Misiri khulubeka lwenandete.

⁶⁶Khwitukhu liamunane Solomoni yaseebula abandu bakalukhe ingo. Bosi bamwitsoomia ma nibatsia ingo nibasangaal'le khulwetsikhabi tsiosi etsio MWAMI yali naheye omurumwawe Daudi nende abandube Abaisiraeli.