Read lunyore 2 ABARUCHI 10 Bible Online

2 ABARUCHI 10 - lunyore bible

2 ABARUCHI 10

¹Ahabu yali nabeinyumbaye amakhumi kane nakataru abamenyanga mwitookho lia Samaria. Kho Yehu yahandika etsibarwa natsiruma Samaria khubakhulundu belitookho, khu bakhongo baho khandi khubandu abakhusia abeinyumba ya Ahabu. Ebarwa tsana yaboola mbu,

²“Ninywe abasinjiliye abolwibulolwomuruchi khandi muli namakaari netsisululi nende amatookho akasiirwa. Kho olwa mwitsa okhuba nimwakhanyoola ebarwa yino,

³mweele mulala khubasiani bomuruchi ohel'le okhuba omuruchi ma, mumwemekhe okhuba omuruchi, ma mumulwan'ne khulwo khumusoola.”

⁴Nebutswa abemeli ba Samaria barimukhwa ikholo nibaboola mbu, “Lole, abaruchi babili baramwa okhusinjila imbeliwe; kho nefwe nakhunyale mbwena okhufukula nokhumulwana?”

⁵Kho omusinjil'li weinyumba yomuruchi, nomusinjil'li welitookho, halala nabakhongo nende yabo abakhusia abaana tsana nibakhupila Yehu omunwa nibaboola mbu, “Ifwe khuli abarumikhilibo, ne khulakhola kosi akokhulaka. Nebutswa sikhulemekha omundu wosi okhuba omuruchi tawe; okhole kosi akoluutsi namalahi.”

⁶Kho nabahandichila ebarwa eyakhabili, naboola mbu, “Nimuba nimuli khulubeka lwanje, khandi nimuba nimuhuchileye okhulonda amalako kanje, bukule emirwe chiabandu beinyumba ya Ahabu omuruchi wenywe, ma munder're Yesereli mukamba khusaa singa yino.” Ne abeinyumba yomuruchi amakhumi kane nakataru, bali mumakhono kabakhulundu ba Samaria, ababakhusia.

⁷Kho olwa banyoola ebarwa ya Yehu iyo, abakhulundu ba Samaria babukula abolwibulolwomuruchi nibeera abandu amakhumi kane nakataru, nibara emirwe chiabwe mubimwelo, nibahil'la Yehu nali Yesereli.

⁸Olwa Yehu yabool'lwa mbu, emirwe chiabandu bolwibulo lwa Ahabu chiler'rwe, yalaka mbu chibunjikhwe mubituma b'bili mubwinjil'lo bwelitookho okhwola mukamba tsuli okwalondakhwo.

⁹Kho mukamba tsuli, olwa yarula esioba, yasinjila habwinjil'lo nabool'la abandu bosi mbu, “Inywe mubula esikha. Tooto nise owasiemana omuruchi Yoramu ma nimwiira. Nebutswa niwina owir're bano bosi?

¹⁰Yaka kamanyianga mbu kosi ako MWAMI yaboola khubolwibulo lwa Ahabu kakhekhole. OMWAMI ukhol'le aka yali niyaboola okhubir'ra mumuroobiwe, Eliya.”

¹¹Nilwo olwa Yehu yeera abekho ba Ahabu bandi bosi abamenyanga mu Yesereli, halala nabakhongo ba Ahabu nende abalinabe, nabesaalisibe, bosi, ne siyasikalakhwo kata mulala tawe.

¹²Yehu yarula Yesereli natsia Samaria. Ne olwa yali nali khunjila habundu halangwa Betsi Ekedi[3] eya Baayi,

¹³yabukaana nabekho bomuchendi Ahasia, omuruchi wa Yuda ma, nabareeba mbu, “Inywe nibeena?” Nabo nibakalusia mbu, “Khuli abekho ba Ahasia; khutsitsanga Yesereli okhuseesia abaana bomukhaye Yesebeli nende abekho bandi bosi.”

¹⁴Yehu nalaka abandube mbu, “Batile nibasili mwoyo.” Nabo nibabatiila nibasili mwoyo, ma nibabeer'ra mwiko eliali Betsi Ekedi. Bosi halala bali abandu amakhumi kane nababili, ne siyalekhakhwo omundu khubo kata mulala tawe.

¹⁵Khandi Yehu yarula, ne olwa yali khunjila yabukana nende Yehonadabu omusiani wa Rekabu. Yehu namusiesia ma, namureeba, “Omwoyokwo kuli habwene khu ise, singa obwa omwoyo kwanje kuli khuibe?” Yehonadabu nakalusia “Nimbwo kuli.” Yehu naboola “Nikaba kuli mbwo, khambelesie omukhonokwo.” Namuha omukhonokwe, naye namuniinia mwikaarilie.

¹⁶Naboola, “Hamba khutsie n'nawe, olole okhwehaana khwanje khu OMWAMI.” Kho nibamuniinia mwikaarilie.

¹⁷Ne olwa boola Samaria, Yehu yeera bosi abali nibasikala khubekho ba Ahabu, siyalekhakhwo kata mulala tawe. Singa obwo MWAMI, yabool'la Eliya kakhekhole.

¹⁸Yehu yabunjelesia abandu ba Samaria bosi halala ma nababool'la mbu, “Omuruchi Ahabu yamufulukhakhan'na nyasaye olangwa Baali hatututu; nebutswa ise namufulukhan'ne okhusila muno.

¹⁹Kho luno lange abaroobi bosi aba Baali beetse hano, nende bosi abamwinamila, nabesaalisibe bosi. Omundu wosi arakhachweyakhwo tawe okhuba ndi nomusango omukali okhuhaana khu Baali; ne uyo owitsa okhubula okhwitsa yetsa okhwirwa.” Nebutswa Yehu yarumikhila obuchesi yibu khulwo khwira abekayakayi ba Baali bosi.

²⁰Ma Yehu nalaka naboola mbu, “Mwahul'le Baali litukhu liokhumwekayakaya.” Nibalandia amang'ana mbu omukhung'ano kukholwe.

²¹Yehu naruma amang'ana mu Isiraeli yosi, nabo abekayakayanga Baali bosi nibeetsa, ne siyaliho omundu kata mulala owabula okhwitsa tawe. Nibenjila muhekalu ya Baali bosi, ne nibetsulamwo okhurula y'yi okhwola y'yi.

²²Ma nabool'la uyo owali nasinjil'langa tsingubo tsinzienukhu mbu, “Hiinia tsingubo tsiabekayakayi ba Baali bosi.” Naye nabahinisia esioba tsingubo tsana.

²³Kho Yehu niyenjila, halala nende Yehonadabu omwana wa Rekabu muhekalu ya Baali nabool'la abekayakayi ba Baali mbu, “Khabilisie mulole mbu omundu wosi owekayakayanga OMWAMI sali mwifwe tawe, habula abekayakayi ba Baali bonyene.”

²⁴Ma niyenjila okhuhaana omusango halala nende emisango emisambe. Ne Yehu yali narechekhele abandu amakhumi munane esioba, nabalakile, “Okhwola mwire abandu bosi; omundu wosi owakhalekha mulala khu yabo abamuhelesia m'makhono mbu ahonokokhe, alakosia obulamubwe.”

²⁵Ne olwa Yehu yali niyakhamala okhuhaana omusango omusambe, yabool'la abalindi nende abakhongo mbu, “Mwinjile ma, mubeere bosi omundu wosi arakhahonokokha tawe.” Benjila mukari ma nibabera netsinganga; ma abalindi nende abakhongo nibabasukuna esioba. Ma nibenjila musikoti esiomukari mwehekalu ya Baali.

²⁶Nibahiniamwo esiilo inzienukhu eyali neelimwo ma, nibachisamba.

²⁷Khandi balikuul'la esiilo tsana, nibasambul'la inyumba ya Baali, nibachikhola echoo okhwola olwaleelo.

²⁸Kho nimbwo Yehu yahakamia obwekayakayi bwa Baali mu Isiraeli.

²⁹Nebutswa Yehu siyalekha okhulonda esifwanani sia Yeroboamu omwana wa Nebati owenjisia Isiraeli mutsimbi khulwa okhwinamila ebimoosi bietsahabu ebiali mu Betseli nende mu Dani tawe.

³⁰OMWAMI nabool'la Yehu mbu “Wakhola amalahi khulwa okhukhola akali habwene mutsimoni tsianje, ma nakhol'la abeinyumba ya Ahabu kosi aka ndanaaya mumwoyo kwanje. Khusifune yisi, khusubisianga mbu abaanabo, okhwola khulwibulo lwakhane, baleekhala khundebe yoburuchi bwa Isiraeli.”

³¹Nebutswa Yehu siyalonda amalako ko MWAMI Nyasaye wa Isiraeli nomwoyokwe kwosi tawe, musilenje yisio siyalekha okhulonda amang'ana mabi ka Yeroboamu oweinjisia Isiraeli mutsimbi tawe.

³²Olwene yilwo OMWAMI yachaaka okhutitiyiakhwo esibala sia Isiraeli. Hasaeli omuruchi wa Siria yabaleka mumbeka tsiosi etsia Isiraeli;

³³okhurula Yorodani khulubeka lwebukwe, okhutsia khutsisoma tsia Gileadi, Gadi, Rubeni, Manase, khandi yabukula okhurula Aroeri, khumuchela kwa Arinoni, okhwola Gileadi nende Bashani.

³⁴Ne amang'ana kandi kosi aka Yehu, yakhola nobulubil'libwe kahandiikwa musitapu siaketsinyinga tsiabaruchi ba Isiraeli.

³⁵Yehu yafwa ma, nayabilwa mwitookho lia Samaria. Yehoahasi omwanawe naruka musilenjesie.

³⁶Ne Yehu yali narukile mu Samaria singa omuruchi wa Isiraeli oluhono olwemihika amakhumi kabili namunane.