Read lunyore 2 ABARUCHI 11 Bible Online

2 ABARUCHI 11 - lunyore bible

2 ABARUCHI 11

¹Yaho olwa Atsalia nyina Ahasia yalola mbu omwanawe wir'rwe, yahaana amalako mbu abolwibulolwomuruchi bosi berwe.

²Nebutswa Yehosheba, omukhaana womuruchi Yoramu, mbotso Ahasia, yabukula Yoashi omwana wa Ahasia maambiswi okhurula mubaana bomuruchi abenyanga okhwiirwa. Yehosheba yatsia okhumubisa halala nomuleliwe musikoti esiokhukona mbu Atsalia alekhe okhumunyoola, ma kho siyayirwa tawe.

³Yehosheba yamenya n'naye namufwitanga, ne niyebisile mu Hekalu khulwemihika chisasaba, olwa Atsalia yaruka esibala.

⁴Ne mumuhika okwa khane nakhataru, omwesaalisi Yehoyada yarumana mbu abakhongo babasikari abasinjiliye abalindi bomwami nende abasinjiliye hango hoburuchi balangwa, ma nabenjisia owa yali mu Hekalu ma nalomba indakano n'nabo, nabalisia emuma khu aka yali naloosisie. Yabamanyia Yoashi omwana womuruchi Ahasia ma

⁵nabalaka mbu: “Olwa namwitsi khumilimo litukhu lie sabato, esitonye siakhataru khwinywe nababe khubulindi obweinyumba yomuruchi.

⁶Esitonye sindi esiakhataru nabalinde esilibwa sia Suri, nesitonye sindi nabalinde hasilibwa esili emukongo wabalindi bandi.

⁷Nabemikanda chienywe chibili echiba khumilimo khusabato, nabo nibalindi Ehekalu okhusoola omuruchi.

⁸Namulinde omuruchi Yoashi tsimbeka tsiosi, buli mundu nebikhupan'nobie m'mukhono; ne omundu wosi owitsa ahembi n'nenywe yeerwe. Mube nomuruchi secheli mukhurulakhwe nomukhuchelelakhwe.”

⁹Kho abakhongo bakhola aka Yehoyada omwesaalisi yalaka, nibamuleer'ra abasikari babwe mbu yabo abali okhwinjila khumilimo khusabato halala nende yabo abali okhurulakhwo khusabato.

¹⁰Naye nahelesia abakhongo yabo amafumo netsingabo, ebialinji ebiomuruchi Daudi, ma ebiabikhwa mu Hekalu.

¹¹Ma abalindi nibasinjila, buli mundu nali nebikhupan'nobie m'mukhono, okhurula khulubeka lwomukhono musaatsa lweinyumba okhwola khulubeka lwomukhono mukhasi lweinyumba, halusambwa nende inyumba yomuruchi.

¹²Ma Yehoyada nahinia Yoashi omwana womuruchi esioba, namurakhwo olusimbi namuha ebarwa yamalako kokhulinda obwami ma nibamwemekha abe omuruchi, nibamutsukhil'lakhwo amafura. Abandu bakhupa amakhono nibahanzukha mbu, “Omuruchi ahindile inziayo.”

¹³Ne olwa Atsalia yahul'la liyoka liabalindi nende eliabandu, yatsia mu Hekalu ahabandu tsana bali;

¹⁴ne olwa yahenga, yalola omuruchi nasinjiye hatsisiilo, etsili habwinjil'lo bwe Hekalu singa obwe emiima tsiali. Omuruchi tsana yali nabotokhan'nwe nabakhongo bamahe, nende abakhupi betsinzika, ne abandu bosi bali nibakhupanga liyoka liobusangali ne nibakhupa tsinjika. Atsalia yarandula tsingubotsie muburima nahanzuukha mbu, “Obusiemani, obusiemani!”

¹⁵Kho omwesaalisi Yehoyada nalaka abakhongo bamahe mbu, “Mumuhinie hakari wetsinyaali tsiabalindi, ne omundu wosi oteema okhumusoola m'mwire nolukanga.” Omwesaalisi yaboola mbu “Arakher'rwa mu Hekalu tawe.”

¹⁶Nibamutiila, ma nibamubisisia mubwinjil'lo bwetsisululi enanzu yomuruchi; niyeer'rwa ebwene y'yio.

¹⁷Ma omwesaalisi Yehoyada yakhola omuruchi Yoashi nende abandu okhulomba indakano mbu balaba abandu bo MWAMI; khandi yalomba omuruchi okhulomba indakano nabandu.

¹⁸Ma abandu bosi nibatsia muhekalu ya Baali, nibachisambula; nibatubula tsisambwatsie nebifwananibie, nibeer'ra Matani omwesaalisi wa Baali imbeli wetsisambwa. Yehoyada nara abasinjil'li khu Hekalu yo MWAMI.

¹⁹Nabukula abakhongo bamahe, nende abalindi bomwami, nende abokhulinda Ehekalu halala, nabandu bosi ma nibahelekha omuruchi okhurula mu Hekalu okhutsia munzu yomuruchi. Yoashi yalonda khunjila yesilibwa Siabalindi okhwola munzu ma niyekhala khundebe yoburuchi.

²⁰Kho abandu bosi basangaala okhusila, ne litookho nalio nilisiling'ana olwa Atsalia yali niyeer'rwe nolokanga enanyumba yomuruchi.

²¹Yoashi yali nemihika chine nachitaru olwa yachaaka okhuruka Yuda.