Read lunyore 2 ABARUCHI 12 Bible Online

2 ABARUCHI 12 - lunyore bible

2 ABARUCHI 12

¹Mumuhika okwa khane nakhataru okwa Yehu yali narukanga Isiraeli, Yoashi yachaaka okhuruka Yuda, ne yaruka emihika amakhumi kane mu Yerusalemu. Eliira lianyinawe liali Sibia okhurula mwitookho lia Berisheba.

²Yehoashi yakhola akali amalunji imbeli wo MWAMI amatukhuke kosi sichila omwesaalisi Yehoyada yamwibaal'la.

³Habula siyasambul'la habundu aha okhwekayakayila abanyasaye banasibala tawe; ma abandu nibatsiilil'la okhuhaana emisango nende okhusambila obwali khutsisambwa tsia banasibala yitsio.

⁴Yoashi yabool'la abesaalisi mbu, babiikhe bulahi amapesa kosi akahanwanga mu Hekalu singa nemisango emitsienukhu yako akahanwanga khulwemisango chia bulitukhu nende akomundu ahenganga khulwo khwehana, akalerwanga mu Hekalu.

⁵Buli omwesaalisi abukule amapesa okhurula khubandu ma karumikhilwe okhulombela aha nihabiiya khu Hekalu.

⁶Nebutswa mumuhika kwamakhumi kabili nachitaru okwomuruchi Yoashi, abesaalisi sibali nibalombelekhwo inyumba ahayononekha tawe.

⁷Kho omuruchi Yoashi yamala alange omwesaalisi Yehoyada, nende abesaalisi bandi, nabareeba, “Busina nimurakasia inyumba ahayononekha? Luno murabukulakhwo khandi amapesa mubandu khubabiikhi benywe tawe; nebutswa mukahaane khulwa okhukasia Ehekalu ahaba nibabiiyile.”

⁸Ma abesaalisi nibeyama mbu sibakhabukulakhwo ampesa mubandu khandi tawe, kata okhulombakhwo Ehekalu abene tawe.

⁹Kho Yehoyada omwesaalisi nabukula lisanduku, nafutula omuluhu musifunikho sialio, nalira ahembi nolusambwa, khumukhono omusaatsa habwinjil'lo bwe Hekalu yo MWAMI ne abesaalisi abali abalindanga hamuliango bara mwisanduku tsana amapesa kosi akali okhuleerwa mu Hekalu yo MWAMI.

¹⁰Ne buli lwosi olwa balolanga mbu amapesa ketsuye mwisanduku, omuhandichi womuruchi nende Omwesaalisi Omukhongo nibetsa okhubala amapesa tsana nibakabohela mumitata.

¹¹Ma nibamal'le okhumanya namapesa kanga, nibakahaana mumakhono akabasinjil'li babakholi bokhwombokha Ehekalu nabo nibarunga abaari betsimbao, nabombokhi abatiyanga khu Hekalu yo MWAMI,

¹²nende abombokhi ba amachina namatifwali, nende ababaatsi bamachina kata khandi okhukula tsimbao, namachina amabaatse khulwokhulomba Ehekalu yo MWAMI, khandi khulwa emirungo chindi chiosi chiokhulomba Ehekalu.

¹³Nebutswa sibarumikhilakhwo amapesa akalerwa mu Hekalu yako khulwokhurunga obulombi bwebikombe, netsipakuli netsimesa tsiokhubikhakhwo etsitaya, nohomba esindu siosi esialombwa khufetsa netsahabu tawe.

¹⁴Amapesa yako kosi karumikhilwa okhurunga abakholi nende okhukula ebindu biokhwombokhela Ehekalu yo MWAMI obuhia.

¹⁵Abandu abasinjil'la omulimo yikwo bali abasubilwa kho abesaalisi sibaruna okhubool'lwa obwa mapesa tsana karumikha tawe.

¹⁶Nebutswa amapesa akahanungwa singa omusango kwokhurunjia es'sialia nohomba okwetsimbi sikabikhwa mwisanduku yimwo tawe; yako kali akabesaalisi bene.

¹⁷Olwene yilwo Hasaeli omuruchi wa Siria yaseera litookho lia Gatsi ma nalileka. Ma nachooma okhutsia okhuseera Yerusalemu.

¹⁸Kho Yoashi, omuruchi wa Yuda yabukula ebihanwa ebitsienukhu ebia Yehoshafati nende Yehoramu na Ahasia abaruchi ba Yuda bali nibahaana khu MWAMI, nameetakhwo ebihanwabie omwene, neetsahabu yosi eyali mwibiikhilo lie Hekalu yo MWAMI nende eyali munyumba yomuruchi, nabirumania khumuruchi Hasaeli wa Siria; owamala nahinia abasikaribe Yerusalemu.

¹⁹Ne amang'ana kosi aka Yoashi yakhola, kahandiikwa musitapu esia ketsinyinga tsiabaruchi ba Yuda.

²⁰Abemeli ba Yoashi bamukhol'la tsimemba ma nibamwir'ra munyumba ya Milo khunjila eyokhukongoma netsia Sila.

²¹Yosakari omwana wa Simetsi nende Yehosabadi omwana wa Someri nibo abakhongo abali okhumwira. Yoashi yamala nayabilwa mwitookho lia Daudi, ne Amasia omwanawe nabukula oburuchi musilenjesie.