Read lunyore 2 ABARUCHI 13 Bible Online

2 ABARUCHI 13 - lunyore bible

2 ABARUCHI 13

¹Mumuhika okwamakhumi kabili nachitaru okwa Yehoahasi omusiani wa Ahasia yali narukanga Yuda, Yehoahasi omwana wa Yehu yachaaka okhuruka Isiraeli. Yaruka emihika likhumi nachine nachitaru mu Samaria.

²Yakhola tsimbi imbeli woMWAMI, ne siyalekha okhulonda esifwanani sia Yeroboamu omwana wa Nebati owenjisia Isiraeli mutsimbi tawe.

³OMWAMI yahambila Abaisiraeli lirima kho yalekha Hasaeli omuruchi wa Siria halala nomusianiwa Beni Hadadi okhuleka Isiraeli khase na khase.

⁴Nilwo olwa Yehoahasi yasaaya khu MWAMI, ma OMWAMI namuhul'la sichila yalola singa obwa omuruchi wa Siria yali nabasandinjia Isiraeli okhusila.

⁵Khulwe yako OMWAMI yahelesia Isiraeli omwemeli owabahonokosia okhurula khu Basiria, ma kho Abaisiraeli nibamenya mumulembe singa balinji khale.

⁶Nebutswa sibalekha okhukhola tsimbi etsia Yeroboamu, yali niyenjisia Isiraeli okhukhola tawe, nebutswa batsilil'la okhutsikhola; khandi esiniini siomunyasaye mukhasi Ashera siasikala mu Samaria.

⁷Yehoahasi siyalikhwo nabasikari bebilasan'nwe tawe habula yali butswa nabasikari bokhutsisululi amakhumi karano, namakaari likhumi, nabandu bokhubilenje etsielefu likhumi sichila omuruchi wa Siria yali niyamulula abandi bosi ma niyabasen'na hasi singa olukuukhi.

⁸Amang'ana kandi kosi aka Yehoahasi yakhola nende akebikholebie biolutswoni kahandiikwa musitapu siaketsinyinga tsiabaruchi ba Isiraeli.

⁹Ne Yehoahasi yafwa nayabilwa mu Samaria. Yehoashi omwanawe naruka musilenjesie.

¹⁰Mumuhika kwamakhumi kataru nachine nachitaru okwa Yoashi omuruchi wa Yuda, Yehoashi omwana wa Yehoahashi yachaaka okhuruka Isiraeli, ne yaruka emihika likhumi nachisasaba mu Samaria.

¹¹Naye khandi yakhola akali amabi imbeli wo OMWAMI. Siyalekha okhulonda esifwanani esibi sia Yeroboamu omwana wa Nebati owenjisia Isiraeli mutsimbi tawe.

¹²Amang'ana kandi kosi aka Yehoashi yakhola, nebikholebie ebiolutswoni mukhuseera Amasia omuruchi wa Yuda kahandiikwa musitapu siamang'ana ketsinyinga tsiabaruchi ba Isiraeli.

¹³Yehoashi nafwa, nayabilwa mubilindwa bwabaruchi mu Samaria, ne omusianiwe Yeroboamu ll naruka musilenjesie.

¹⁴Omuroobi Elisha yahambwa nobulwaye obwamala nibumwira. Yehoashi omuruchi wa Isiraeli yatsia okhumulola ma nalakaya naboola mbu, “Papa wanje, Papa wanje, Ibe obetsanga omusooli wa Isiraeli owobunyali!”

¹⁵Naye Elisha namubool'la mbu, “Bukula obuyingo netsisele.” Naye nabukula obuyingo netsisele.

¹⁶Elisha nabool'la omuruchi wa Isiraeli tsana mbu, “Werechekhe okhulasa tsisele.” Naye niyerechekha. Kho Elisha nara amakhonoke khumakhono komuruchi.

¹⁷Namubool'la “Ikula litilisa elikalukha enabukwe”; naye niyekula. Ma Elisha naboola, “Khalase olusele”; naye nalasa. Ma Elisha naboola mbu, “Ibe oli olusele lwo MWAMI olwa ye narumikhile okhuleka Siria. Noseer're Abasiria Afeki okhwola olwa nobaleke.”

¹⁸Khandi Elisha nabool'la omuruchi abukule tsisele tsindi ma atsikhupe hasi khwiloba: Omuruchi natsikhupa hali khataru, ma nalekha.

¹⁹Yaka kachila Elisha namusinyikhila okhusila ma naboola mbu, “Kakhakhukhoyele okhukhupa hasi hali kharano nahomba khasasaba; ma nilwo olwa wakhalekele Siria kupu; nebutswa luno olaleka Siria hali khataru khonyene.”

²⁰Ma Elisha nafwa, nibamuyabila. Ne buli muhika emikanda chabasikari ba Moabu chiaseeranga Isiraeli.

²¹Litukhu lindi, olwa abandu bali nibayabilanga omulambo, bahenga ne nibalola omukanda kwabasikari ba Moabu, kho nibafuuba omulambo tsana musilindwa sia Elisha. Ne olwa kwetiisia khumakumba ka Elisha, kwalamukha ne omundu uyo nasinjila.

²²Hasaeli omuruchi wa Siria yasandia Isiraeli amatukhu koburuchi bwa Yehoahasi kosi;

²³nebutswa OMWAMI yababeela esirenda ma naba netsimbabasi khubo. Siyabalekha bamululwe tawe nebutswa yabakhonya khulwe indakano eya yalakana nende Aburahamu, Isaka, na Yakobo. Kata na luno asili okhwibil'lakhwo abandu baabe tawe.

²⁴Olwa Hasaeli omuruchi wa Siria yafwa, Beni Hadadi omwanawe yaruka musilenjesie.

²⁵Kho Yehoashi omuruchi wa Isiraeli yaleka Beni Hadadi hali khataru ma nabukula amatookho aka Beni Hadadi yali niyabukula okhurula khu Yehoahasi samwana Yehoashi.