Read lunyore 2 ABARUCHI 14 Bible Online

2 ABARUCHI 14 - lunyore bible

2 ABARUCHI 14

¹Mumuhika kwakhabili muburuchi bwa Yehoashi omwana wa Yehoahasi, omuruchi wa Isiraeli, Amasia omwana wa Yoashi yachaaka okhuruka Yuda.

²Yali owemihika amakhumi kabili nachirano olwa yachaaka okhuruka; naruka emihika amakhumi kabili nachirano nachine mu Yerusalemu. Nyinawe yali Yehoadini okhurula Yerusalemu.

³Yakhola akali amalunji imbeli wo MWAMI, habula siyahelana nende Daudi kukanyene mubulayibwe tawe habula yakhola amang'ana kosi singa obwa papawe Yoashi yali nakhol'le.

⁴Siyasambul'la habundu hokhwekayakayila abanyasaye abanasibala tawe; ne abandu batsiliil'la okhuhaana emisango nibasambilaho obwali.

⁵Olwa Amasia yali niyakharalila muburuchibwe, yeera abakhongo abali nibeera papawe owalinji omuruchi.

⁶Habula siyayira abaana babwe tawe nebutswa yalonda amang'ana kahandiikwa musitapu siamalako ka Musa, aho MWAMI yalaka mbu, “Abebuli barakheerwa khulwa obubi bwabaana babwe tawe, kata abaana nabo barakheerwa khulwa obubi bwabebuli tawe; harali buli mundu alafwa khulwe tsimbitsie omwene.”

⁷Amasia yeer'ra Abaedomu etsielefu likhumi Mwibanda lie chumbi. Yafumil'la litookho lia Sela mubulwani, nalikulikha eliira mbu Yokitseli, ne lisilangwa mbwo okhwola leelo.

⁸Omuruchi Amasia yaruma abandu khu Yehoashi omwana wa Yehoahasi, omwitsukhulu wa Yehu omuruchi wa Isiraeli, naboola mbu, “Noba noli omusaatsa khulwane.”

⁹Naye Yehoashi omuruchi wa Isiraeli narumila Amasia omuruchi wa Yuda ling'ana naboola mbu, “Litukhu lindi esisisia siomubikulu bia Lebanoni siabool'la omusiita kwa Lebanoni mbu, ‘Bakhila omusiani wanje omukhaanawo’; nebutswa esolo yomubulimo bwa Lebanoni yabira ma nesen'na esisisia tsana hasi.

¹⁰Tooto ibe ulechele Edomu, nawe omwoyokwo kwitsuye neinjinia po. Kho wehotselesie khulwa oluyalilwo, niwikhala hango haho okhuba nisina esiakhachila weleer'ra amanyakhano ma okwe, ibe halala nende Yuda?”

¹¹Nebutswa Amasia siyayenya okhuhul'la tawe. Kho Yehoashi omuruchi wa Isiraeli narula natsiayo, ma ye halala nabandube nilwana nende Amasia mwihe Betsishemeshi, litookho lia Yuda.

¹²Isiraeli yaleka Yuda, ma abasikari bosi nibelukha nibatsia buli mundu ingowe.

¹³Yehoashi omuruchi wa Isiraeli nara Amasia omuruchi wa Yuda mubuhambe mwitookho lia Betseshemeshi, ma natsia Yerusalemu, nalikuul'la lisiisi lia Yerusalemu okhurula khusilibwa sia Efuraimu okhwola khusilibwa esiali khukoona, oburambi obuhela ahembi etsimiita tsimia tsibili.

¹⁴Yabukula etsahabu neifetsa yosi, nebirumikhilo biosi biomu Hekalu, nende amabiikhilo kosi komunyumba yomuruchi, khandi nende abandu abayafumila singa esiesingo, ma nakalukha Samaria.

¹⁵Amang'ana kandi kosi aka Yehoashi, yakhola, halala nende obululubwe singa obwa yaseerana nende Amasia omuruchi wa Yuda kahandiikwa musitapu esiamang'ana ketsinyinga tsiakabaruchi ba Isiraeli.

¹⁶Yehoashi yafwa nayabilwa mubilindwa biabaruchi mwitookho lia Samaria ne Yeroboamu ll omwanawe naruka musilenjesie.

¹⁷Amasia omwana wa Yehoashi, omuruchi wa Yuda yamala emihika likhumi nachirano inyuma wokhufwa khwa Yehoashi omwana wa Yehoahasi omuruchi wa Isiraeli.

¹⁸Amang'ana kandi kosi aka Amasia yakhola kahandiikwa musitapu esiamang'ana ketsinyanga tsiabaruchi ba Yuda.

¹⁹Yakhol'lwa obusiemani mu Yerusalemu obwokhumwira, kho yelukha natsia mwitookho lia Lakishi. Nebutswa abasukube bamulonda ebwene y'yio, ma nibamwiir'rayo.

²⁰Omubilikwe kwakalusibwa Yerusalemu nikukingiywe khusululi, ma nayabilwa mubilindwa biabaruchi mwitookho lia Daudi.

²¹Ma abandu ba Yuda nibabukula Usia, owemihika likhumi na chisasaba, nibamwemekha abe omuruchi musilenje sia Samwanawe Amasia.

²²Usia yaleka litookho lia Elatsi ma naliombokha obuhia, inyuma wokhufwa khwa Amasia.

²³Mumuhika kwelikhumi nakharano okwa Amasia omwana wa Yoashi omuruchi wa Yuda, Yeroboamu omwana wa Yehoashi yachaaka okhuruka Isiraeli, ne naruka emihika amakhumi kane namulala mu Samaria.

²⁴Naye yakhoola akali amabi imbeli wo MWAMI ne siyalekha okhulonda amang'ana amabi aka Yeroboamu omwana wa Nebati, owenjisia Isiraeli mutsimbi tawe.

²⁵Yakalusia liloba elialinji lia Isiraeli esinyolu okhurula khulung'anyi lwa Hamatsi okhutsia enandete khunyanza ya Arabba. Yako niko ako MWAMI Nyasaye wa Isiraeli ya niyasubisia okhubiir'ra mumurumikhiliwe omuroobi Yona omwana wa Amitai, okhurula Gatsi Heferi.

²⁶OMWAMI yalola amanyakhano amakali aka Abaisiraeli bosi banyoola, ne siyaliho owakhabakhonyeleye tawe.

²⁷Ne silialikhwo lichoomo lio MWAMI okhumulula Isiraeli kupu khulwe inziayo tawe. Kho yabahonia okhubiir'ra mumuruchi Yeroboamu ll omwana wa Yehoashi.

²⁸Amang'ana kandi kosi aka Yeroboamu ll yakhola, halala nende obululubwe mukhulwana amahe, khandi singa obwa yachelesia Damasiko nende Hamatsi akalinji mu Isiraeli kahandiikwa musitapu siamang'ana ketsinyinga tsiabaruchi ba Isiraeli.

²⁹Yeroboamu yafwa ma nayabilwa mubilindwa bia abaruchi ba Isiraeli. Sakaria omwanawe naruka musilenjesie.