Read lunyore 2 ABARUCHI 15 Bible Online

2 ABARUCHI 15 - lunyore bible

2 ABARUCHI 15

¹Mumuhika kwamakhumi kabili nachine nachitaru, kwa Yeroboamu ll omuruchi wa Isiraeli, Usia[4] omwana wa Amasia yachaaka okhuruka Yuda.

²Yali owemihika likhumi nachisasaba olwa yachaaka okhuruka ne yaruka emihika amakhumi karano nachibili mu Yerusalemu. Eliira lianyina liali Yekolia okhurula Yerusalemu.

³Ne yakhola amalunji imbeli wo MWAMI, singa obwa Amasia samwana yali nakhol'le.

⁴Habula habundu hokhwekayakayila abanyasaye abanasibala sihalikul'lwa tawe; abandu batsiliil'la okhuhaana emisango nende okhusambilaho obwali.

⁵Ne OMWAMI yakhupa omuruchi nobuchele obwamuhamba okhwola okhufwakhwe. Yamenya munyumbaye omwene ehale okhurula khubandu narakholakhwo omulimo kwosi tawe. Yoramu omwana womuruchi nasinjiil'la inyumba, nakhalachila abandu musibala siosi.

⁶Amang'ana kandi kosi aka Usia yakhola, kahandiikwa musitapu esia Aketsinyinga tsiabaruchi ba Yuda.

⁷Usia yafwa nayabilwa mubilibwa biabaruchi mwitookho lia Daudi. Yotsamu omwanawe naruka musilenjesie.

⁸Mumuhika kwamakhumi kataru namunane kwa Usia omuruchi wa Yuda, Sakaria omwana wa Yeroboamu ll yaruka Isiraeli ne yaruka khulwa emiesi chisasaba mu Samaria.

⁹Yakhola akali amabi imbeli wo MWAMI singa obwa abakukabe bali nibakhola. Siyalekha okhulonda amang'ana amabi aka Yeroboamu omwana wa Nebati yakhola tawe, ma niyenjisia Isiraeli mutsimbi.

¹⁰Shalumu omwana wa Yabeshi yamusiemana ma namwir'ra mumoni tsiabandu, ma naruka musilenjesie.

¹¹Amang'ana kosi ka Sakaria yakhola, kahandiikwa musitapu esiamang'ana ketsinyinga tsiabaruchi ba Isiraeli.

¹²Ma nikekhola singa OMWAMI yali niyasubisia Yehu olwa yaboola mbu, “Abaana bolwibulo lwakhane baleekhala khundebe yoburuchi bwa Isiraeli.”

¹³Mumuhika kwamakhumi kataru nachirano nachine okwa Usia omuruchi wa Yuda Shalumu yaruka Yuda khulwo omwesi mulala mu Samaria.

¹⁴Menahemu omwana wa Gadi yarula Tirisa natsia Samaria, niyeera Shalumu omwana wa Yabeshi ma naruka musilenjesie.

¹⁵Ne amang'ana kandi kosi aka Shalumu yakhola, nende akobusiemanibwe, kahandiikwa musitapu siamang'ana ketsinyinga tsiabaruchi ba Isiraeli.

¹⁶Olwa Menahemu yali narulanga Tirisa yamulula litookho lia Tipisa,[5] nende bosi abamenyelemwo nende tsisoma etsili ahembi n'nalio sichila sibamwikuul'la injila mulio tawe. Kata khandi naarandul'la abakhasi bosi abali nibabelekha mwitaala tsana.

¹⁷Mumuhika kwamakhumi kataru nachirano nachine okwa Usia omuruchi wa Yuda, Menahemu omwana wa Gadi yachaaka okhuruka Isiraeli. Yaruka emihika likhumi mu Samaria.

¹⁸Yakhola akali amabi imbeli wo MWAMI. Amatukhuke kosi siyalekha okhulonda amang'ana amabi aka Yeroboamu omwana wa Nebati yakhola ma niyenjisia Isiraeli mutsimbi tawe.

¹⁹Tigilatsi Pelesa, omuruchi omukhongo wa Asiria yetsa okhuseera Isiraeli; ma Menahemu namuhelesia etsikilo etsielefu amakhumi kataru natsine etsiefetsa, mbu amumeteel'le tsingufu muburuchibwe.

²⁰Menahemu yahinia amapesa yako mubandu abahinda abali Isiraeli. Yahiinia ebitonye amakhumi karano biefetsa buli khumundu omuhinda mbu ahe omuruchi wa Asiria. Kho omuruchi wa Asiria nakalukha musibalasie.

²¹Amang'ana kandi kosi aka Menahemu yakhola, kahandiikwa musitapu siamang'ana ketsinyinga tsiabaruchi ba Isiraeli.

²²Menahemu yafwa nayabilwa, Pekahia omwanawe naruka musilenjesie.

²³Mumuhika kwamakhumi karano kwa Usia omuruchi wa Yuda, Pekahia omwana wa Menahemu yachaaka okhuruka Isiraeli ne yaruka emihika chibili mu Samaria.

²⁴Yakhola akali amabi imbeli wo MWAMI ne, siyalekha okhulonda amang'ana amabi aka Yeroboamu omwana wa Nebati yakhola ma niyenjisia Isiraeli mutsimbi tawe.

²⁵Naye Peka omwana wa Remalia omukhongo wabasikaribe yamusiemana nabandu ba Gileadi amakhumi karano, ma nibamwir'ra Samaria mumasisi keinyumba yomuruchi Peka yamala naruka musilenjesie.

²⁶Amang'ana kandi kosi aka Pekahia yakhola, kahandiikwa musitapu siamang'ana ketsinyinga tsiabaruchi ba Isiraeli.

²⁷Mumuhika kwamakhumi karano nachibili okwa Usia omuruchi wa Yuda, Peka omwana wa Remalia yachaaka okhuruka Isiraeli. Yaruka emihika amakhumi kabili mu Samaria.

²⁸Yakhola aka amabi imbeli wo MWAMI ne siyalekha okhulonda amang'ana amabi aka Yeroboamu omwana wa Nebati yakhola ma niyenjisia Isiraeli mutsimbi tawe.

²⁹Kali olwa Peka yali narukanga, Tigilatsi Pelesa omuruchi wa Asiria yetsa nafumila amatookho ka Iyoni, Abeli Betsi Maaka, Yanoa, Kedeshi, Hasori. Khandi yafumila tsisoma tsia Gileadi, na Galilaya, nesibala siosi sia Nafutali, ma nahila abandu Asiria singa ababohe.

³⁰Ne Hoshea omwana wa Ela yasiemana Peka ma, namwiira. Yamala naruka musilenjesie mumuhika kwamakhumi kabili kwa Yotsamu omwana wa Usia.

³¹Amang'ana kandi kosi aka Peka, yakhola, kahandiikwa musitapu siamang'ana ketsinyinga tsiabaruchi ba Isiraeli.

³²Mumuhika kwakhabili kwa Peka omwana wa Remalia, owali omuruchi wa Isiraeli, Yotsamu omwana wa Usia, yachaaka okhuruka Yuda.

³³Yali owemihika amakhumi kabili nachirano olwa yachaaka okhuruka, ne yaruka emihika likhumi nachisasaba mu Yerusalemu. Eliira lianyinawe liali Yerusa omukhaana wa Sadoku.

³⁴Yakhola akali amalunji imbeli wo MWAMI singa obwa Usia papawe yali okhukhola.

³⁵Habula habundu aho okhwekayakayila abanyasaye abanasibala sihalikul'lwa tawe. Abandu batsilil'la okhuhaana emisango nibasambila obwali habundu tsana. Yombokha esilibwa siesinyolu sie Hekalu yo MWAMI.

³⁶Amang'ana kandi kosi aka Yotsamu, yakhola, kahandiikwa musitapu esiamang'ana ketsinyinga tsiabaruchi ba Yuda.

³⁷Kali mumatukhu kene yako olwa yali narukanga, OMWAMI yachaaka okhuruma Resini omuruchi wa Siria nende Peka omuruchi wa Isiraeli okhuseera Yuda.

³⁸Yotsamu yafwa ma nayabilwa mubilindwa biabaruchi mwitookho lia Daudi. Ahasi omwanawe naruka musilenjesie.