Read lunyore 2 ABARUCHI 16 Bible Online

2 ABARUCHI 16 - lunyore bible

2 ABARUCHI 16

¹Mumuhika kwelikhumi nakhane nakhataru kwa Peka omwana wa Remalia, omuruchi wa Isiraeli, Ahasi omwana wa Yotsamu yachaaka okhuruka Yuda.

²Yali owemihika amakhumi kabili olwa yachaaka okhuruka, ne yaruka emihika likhumi nachisasaba mu Yerusalemu. Siyakhol'la OMWAMI Nyasaye we obulahi, singa Daudi kukanyene yakhola tawe.

³Habula yalonda amang'ana amabi kabaruchi ba Isiraeli. Kata khandi yahaana omusianiwe singa omusango omusambe khubiniini, nalondanga emiima chies'sinyo, chiabandu abo MWAMI yakhunga musibala imwo olwa Abaisiraeli bali nibenjilangamwo.

⁴Yakhola emisango nasambila obwali habundu ahokhwekayakayila ebiniini, nokhubikulu nende emisaala chiebinikha.

⁵Resini omuruchi wa Siria nende Peka omwana wa Remalia, omuruchi wa Isiraeli beetsa okhuseera Yerusalemu, nende okhulifumbila nebutswa sibamuleka Ahasi tawe.

⁶Olwene yilwo omuruchi wa Edomu yaleka litookho lia Elatsi nalira mubunyali bwa Edomu ma nakhunga Abayuda okhurula mulio. Abaedomu beetsa okhumenya mu Elatsi tsana, ne okhwola leelo basimenyeleyo.

⁷Kho Ahasi yaruma abandu khu Tigilatsi Pilesa omuruchi wa Asiria, namang'ana kano. “Ise ndi omurumikhiliwo khandi omwanawo. Yitsa usoole okhurula m'mukhono kwomuruchi wa Siria nom'mukhono kwomuruchi wa Isiraeli, abaaseeranga.”

⁸Ahasi nabukula efetsa netsahabu eyali mu Hekalu yo MWAMI nomwibikhilo liomunyumba yomuruchi, narumila omuruchi wa Asiria singa esihanwa.

⁹Omuruchi Tigilatsi Pilesa yahuchil'la omulango kwomuruchi Ahasi ma natsia okhuseera litookho lia Damasiko, nalileka, niyeera omuruchi Resini ma nahila abandu balio Kiri mubuhambe.

¹⁰Olwa omuruchi Ahasi yatsia Damasiko okhwakaana nende Tigilatsi Pilesa omuruchi wa Asiria, yalola olusambwa olwaliho. Kho omuruchi Ahasi narumila omwesaalisi Uria okhufwana khwalwo, nokhulombwa khwalwo, mubikha bialwo biosi.

¹¹Kho omwesaalisi Uria niyombokha olusambwa tsana singa obwomuruchi Ahasi yali narumanisia okhurula Damasiko, namala okhulwombokha omuruchi Ahasi narachel'la tawe.

¹²Ne olwomuruchi Ahasi yachelela okhurula Damasiko, yalola olusambwa tsana. Ma niyesunda ahembi khulwo, naniina ikulu walwo

¹³ma nahaanakhwo omusango kwokhusambwa, nende omusango kwobuswache, natsukhakhwo omusango kwewaini nende amatsahi komusango kwobuhambani.

¹⁴Olusambwa lwomukasa olwali nilwahanwa khu MWAMI lwali hakari wolusambwa nende Ehekalu, kho Ahasi yaluhiinia ma nalura elubeka lwesinyolu wolusambwalwe.

¹⁵Omuruchi Ahasi nalaka omwesaalisi Uria mbu, “Orumikhile olusambwa lwanje olukali okhusambilakhwo omusango kwokhusambwa kwamukamba tsuli, nomusango kwobuswache kwamukolooba. Khandi nende omusango kwomuruchi kwokhusambwa nende okwobuswache halala nomusango kwabandu bosi okwasambwa, nende okwobuswache ma nende okwewaini. Osundulekhwo amatsahi kemiruko chiosi echihan'nwe singa emisango. Nebutswa undekhele olusambwa lwomukasa khulwokhukhol'lakhwo emisango.”

¹⁶Omwesaalisi Uria yakhola yaka kosi, singa omuruchi Ahasi yali namulakile.

¹⁷Omuruchi Ahasi yakhalaka tsimbao tsiokhundulo khwelikari liomukasa nahiniakhwo etsibeseni etsialikhwo. Khandi yahinia litangi liomukasa okhurula khutsing'ombe tsiomukasa likhumi nachibili etsiali hasi walio ma nara litangi tsana khumachina akaalwa hasi.

¹⁸Ne khulwo okhuyanzisia omuruchi wa Asiria, Ahasi yahinia mu Hekalu, omusinji kweindebe yomuruchi yarebwangakhwo ma niyekala omuliango kwamasilisi okwomuruchi yenjil'langamwo mu Hekalu.

¹⁹Amang'ana kandi kosi aka Ahasi yakhola, kahandiikwa musitapu siamang'ana ketsinyinga tsiabaruchi ba Yuda.

²⁰Ahasi yafwa ma nayabilwa mubilindwa, biabaruchi mwitookho lia Daudi. Hesekia omwanawe naruka musilenjesie.