Read lunyore 2 ABARUCHI 17 Bible Online

2 ABARUCHI 17 - lunyore bible

2 ABARUCHI 17

¹Mumuhika kwelikhumi nakhabili kwa Ahasi omuruchi wa Yuda, Hoshea omwana wa Ela yaruka Isiraeli mu Samaria khulwemihika chirano nachine.

²Yakhola akali amabi imbeli wo MWAMI nebutswa siyakhola obubi singa abaruchi bandi abaruka Isiraeli imbeliwe tawe.

³Omuruchi Shalimanesa wa Asiria yamuseera; Hoshea niyehaana m'makhonoke ma namurunga obusuru buli muhika.

⁴Inyuma wemihika nalebe Hoshea yaruma abarume khumuruchi we Emisiri namureebanga obukhonyi ma nalekha okhurunga obusuru bwa buli muhika khumuruchi wa Asiria. Olwa Shalimanesa omuruchi wa Asiria yakamanya Hoshea yafumilwa ma nareebwa mubuhambe.

⁵Ma omuruchi wa Asiria naseera Isiraeli ma nafumbila litookho lia Samaria khulwemihika chitaru.

⁶Ma khumuhika kwakhataru, okwali omuhika kwakharano nakhane muburuchi bwa Hoshea, omuruchi wa Asiria yafumila Samaria, nahila Abaisiraeli mubuhambe Asiria nara abalala khubo mwitookho lia Hala, ne abandi ahembi nomuchela kwa Habori okuli mulusoma lwa Gosani, ne abandi nabara mumatookho ka Media.

⁷Samaria yalekwa sichila Abaisiraeli bakhola tsimbi imbeli wo MWAMI Nyasaye wabwe owali niyabasoola okhurula mumukhono kwomuruchi we Misiri ma niyabahinia musibala sie Emisiri. Bekayakaya abanyasaye bandi,

⁸nibalonda emiima chiabandu abo MWAMI yakhunga musibala olwa Abaisiraeli bali nibenjilangamwo. Khandi balonda tsifwo tsimbibibi etsiabaruchi ba Isiraeli bachiakia.

⁹Khandi Abaisiraeli bakhola amang'ana ako MWAMI Nyasaye wabwe arahuchil'la. Bombokha tsisambwa tsiokhwekayakayilakhwo abanyasaye abanasibala m'mataala kosi okhurula khumataala amati okhwola khwitookho likali.

¹⁰Belombela echisiilo chiamachina nebiniini bia Ashera khu buli esikulu nomubiinikha biemisaala

¹¹mbasambila obwali khutsisambwa tsiabanyasaye abanasibala, nibalondanga emiima chiabandu aba Nyasaye yakhunga musibala yimwo. Khandi bachema oburima bwo MWAMI khulwa obubi bwabwe bwosi

¹²nibekayakaya ebiniini ebio MWAMI yaboola mbu “Murabiekayakaya tawe.”

¹³Ne OMWAMI yachetsiyia Isiraeli na Yuda okhubiir'ra mubarumwabwe nende mubaroobibe okhuboola mbu: “Mulekhe tsinjila tsienywe tsiobubi, ma mulonde amalako kanje namebaalo kanje, akahandikwa mumalako kosi akandahelesia abakuka benywe, khandi akandahaana khu inywe okhubir'ra mubarumikhili banje, abaroobi.”

¹⁴Nebutswa sibayenya okhuhul'la tawe; bali nesiikala marwi singa abakuka babwe balinji, yabo abarasubila mu MWAMI Nyasaye wabwe.

¹⁵Bachiaya amebaaloke nibabula okhulonda indakano yayalomba nabakuka babwe, ma nibasuula okhulonda amachetsiyio aka yali okhubahelesia. Nibekayakaya ebiniini biabutswa, ma nabo nibubula obukhala, ma nibalonda emiima echiebibala ebiali nibiababotokhana ebia Nyasaye yalaka mbu barakholakhwo singa nabio bikholanga tawe.

¹⁶Khandi bafunaka amalako ko MWAMI Nyasaye wabwe kosi, nibelombela ebiniini biebimosi bibili khusibia khulwo khubiekayakaya. Khandi balomba esiniini siomunyasaye mukhasi Ashera, tsinyininyini tsiokhwikulu ma nibekayakaya Baali.

¹⁷Bahaana abasiani babwe nabakhaana babwe singa emisango emisambe khubanyasaye abanasibala. Batsia okhurunilisia amang'ana khubafila nende khubalakuli ma nibehaana khulwokhukhola obubi imbeli wo MWAMI, ma nibachema lirimalie.

¹⁸Khulwe yako OMWAMI yasinyikhila Isiraeli, nabakhunga bosi imbeliwe nibarali abandu belihanga lia Yuda.

¹⁹Kata khandi abandu ba Yuda nabo sibalonda amalako ko MWAMI Nyasaye wabwe tawe, nebutswa balonda emiima echia Baisiraeli bachiakia.

²⁰Ne OMWAMI yasuula olwibulo lwa Isiraeli lwosi, nabaha esinyasio, ma nabahaana mubunyali bwabasuku abalulu okhwola olwa yali nabakhungile bosi okhurula imbeliwe.

²¹Olwa OMWAMI yali niyakhabukhania Isiraeli okhurula Yuda, Abaisiraeli beemekha Yeroboamu omwana wa Nebati okhuba omuruchi wabwe. Yeroboamu yabakhola okhubula okhulonda OMWAMI nikachila nibakhola tsimbi tsingali.

²²Abaisiraeli balonda Yeroboamu ma nibatsilil'la okhukhola tsimbi tsiosi etsia yakhola,

²³nikachila OMWAMI nakhunga Isiraeli okhurula imbeliwe, singa obwa yali nalakile okhubir'ra mubarumikhilibe, abaroobi. Kho abandu ba Isiraeli nibahilwa mubuhambe Asiria owabamenyenaga okhwola leelo.

²⁴Kho omuruchi wa Asiria yabukula abandu okhurula mumatookho ka Babulonia, mbu Khutsi, Aba Hamaatsi, Sefawaimu nabara okhumenya mumatookho ka Samaria musilenje sia Abaisiraeli abali nibahil'lwe mubuhambe. Benjila mumatookho yako ma nibamenyamwo.

²⁵Kali olwa bali nibasichiaka okhumenyayo, sibayekayakaya OMWAMI tawe. Khulwe yako OMWAMI yabarumila etsisimba etsiali okhwira balala khubo.

²⁶Omuruchi wa Asiria yabool'lwa mbu, “Abandu abawahila nobara mumataala ka Samaria, sibamanyile amalako kanyasaye wesibala tsana tawe; khulwe yako waruma etsisimba mubo, ne tsibeeranga, sichila sibamanyile amalako kanyasaye wesibala tsana tawe.”

²⁷Omuruchi wa Asiria nalaka mbu, “Kalusie mulala khubesaalisi abakhwahila mubuhambe; m'mulekhe atsie okhumenyayo, abe onyala okhwekesia abandu amalako kanyasaye wesibala yisio.”

²⁸Kho mulala khubesaalisi tsana aba bali nibahila mubuhambe okhurula Samaria yachelela namenya Betseli, niyebaal'la abandu tsana obwa banyala okhwekayakaya OMWAMI.

²⁹Nebutswa abandu tsana abamenya mwitookho lia Samaria belombela abanyasaye babwe abene, nibabara munyumba tsiokhwekayakayilamwo etsia Baisiraeli bali nibalomba. Buli omukanda kwelombela esiniini mwitaala lia kwamenyamwo.

³⁰Abababulonia nibalomba ebiniini biomunyasaye Sukotsi Benotsi, ne Abakutsi nibalomba ebiniini bia Nerigali. Abahamatsi nibalomba ebiniini bia Ashima.

³¹Ne Abahiwa nibelombela ebiniini bia Nibasi Totaki, nabo Abasefariwaimu nibahana abaana babwe singa omusango kwokhusambwa khu Adurameleki nende khu Anameleki abanyasaye babwe.

³²Khandi abandu yabo bekekayakaya OMWAMI nibahula okhurula m'mikanda chiabwe, abandu betsimbila tsiosi okhurumikha tsiosi singa abesaalisi khulwokhuhana emisango habundu hokhwekayakayila abanyasaye abanasibala.

³³Kho bekayakaya OMWAMI nebutswa khandi bekayakaya abanyasaye babwe abene, singa obwe emiima tsiamahanga akabahinibwamwo chiali.

³⁴Basilondanga emiima tsana okhwola leelo. Sibamwekayakayanga OMWAMI tawe, khandi sibalondanga amebaaloke, nokhukhola amalako ko MWAMI yalaka abolwibulo lwa Yakobo, owayakulikha mbu Isiraeli.

³⁵OMWAMI yali niyalomba indakano n'nabo nabalaka mbu, “Murekayakayakhwo abanyasaye bandi tawe, kata okhubenamila, nokhubarumikhila, nokhuhaana khubo omusango tawe.

³⁶Okhwola mumbulile ise, OMWAMI, owamuhinia musibala sie Misiri nobunyali obukhongo nende tsingufu tsingali; okhwola munjinamile nende okhuhaana emisango khu ise.

³⁷Okhwola mulondenje amalako nende amebaalo akandali okhumuhandichila. Murahulilekhwo abanyasaye bandi tawe;

³⁸khandi murebil'le indakano eya ndalomba n'nenywe tawe. Murekayakayakhwo abanyasaye babwe.

³⁹Okhwola mumbulile ise OMWAMI Nyasaye wenywe, nase namusoola okhurula mubunyali bwabasuku benywe.”

⁴⁰Kata mbwo sibayenya okhuhul'la, nebutswa batsilil'la okhukhola emiima chiabwe emikhulu.

⁴¹Kho abandu bekayakaya OMWAMI ne khandi nibekayakaya ebiniini ebibaatse; abaana babwe nabo nibakhola mbwo, kata abetsukhulu babwe — obwa abakuka babwe bakhola, nimbwo basikholanga naleelo.