Read lunyore 2 ABARUCHI 19 Bible Online

2 ABARUCHI 19 - lunyore bible

2 ABARUCHI 19

¹Olwomuruchi Hesekia yakahul'la, yarandula tsingubotsie musibeela niyebiikha tsingubo tsiamakunia, natsia mu Hekalu yo MWAMI.

²Ne yaruma Eliakimu, owasinjil'langa inyumba yomuruchi, nende Shebina omuhandichi wesiina, nabesaalisi abakhulundu mbu batsie khumuroobi Isaya omwana wa Amosi. Nabo khandi bali nibebiikhile etsingubo tsiamakunia.

³Kano niko aka Hesekia yababool'la bamubool'le: “Litukhu lino neliokhukhupa esibi; khuli mukhuhebwa esinyasio ma khuli mus'simba murwe esikali. Khuli singa omukhasi oli neinumwa nebutswa orali netsingufu tsiokhwibula.

⁴Haundi OMWAMI Nyasayewo ahuliyekhwo amang'ana ka Rabushaka abooye kosi, uyo owomwamiwe omuruchi wa Asiria arumile okhuchekheel'la Nyasaye oli mwoyo. Naye alakondekhela yabo ababooye amang'ana tsana khuye ouli OMWAMI Nyasaye khulwe yabo abasikaye musibala.”

⁵Olwa abakhongo bomuruchi Hesekia boola khu Isaya,

⁶Isaya yababool'la mbu, babool'le Hesekia omwami wabwe mbu, “MWAMI aboolanga mbu Oraria khulwa amang'ana komal'le okhuhul'la, akabakhongo bomuruchi wa Asiria babooye khulwokhunyeka OMWAMI tawe.

⁷OMWAMI alara omwoyo kwoburi muye, kho alahul'la amayoosi kokhubehelesia ne alakalukha musibalasie; khandi OMWAMI alamukhola yer'rwe musibalasie siene.”

⁸Rabushaka yahul'la mbu omuruchi wa Asiria warula Lakishi ma watsia okhuseera litookho lia Libina elili ahembi Asiria; kho yatsia Libina okhureeba omuruchi obwibaali.

⁹Olwomuruchi yahul'la mbu Tirihaka omuruchi wa Etsiopia yetsanga okhumuseera, yarumila Hesekia ebarwa

¹⁰okhumubool'la mbu, “Oralekha Nyasayewo owosubilanga akhukaate khulwokhukhusubisia mbu Yerusalemu selahanwa m'makhono kanje tawe.

¹¹Ibe wahul'la akabaruchi ba Asiria bakhol'la eb'bala biosi ebia bamulula. Nawe n'no opaalanga mbu wakhahonokokha noho?

¹²Abakuka banje abarukanga Asiria bakhuya amatookho ka Gosani, Harani, Resefu, nabandu ba Betsiedeni abamanyanga Telasari ne abanyasaye babwe sibabasoola tawe.

¹³Abaruchi ba Hamatsi, Aripadi, Sefawaimu Hena, Iwa bali hena?”

¹⁴Kho Hesekia nanyoola ebarwa okhurula khubarumwa tsana ma nachisoma. Ma natsia mu Hekalu nachibambula imbeli wo MWAMI,

¹⁵ma nasaaya naboola mbu, “OMWAMI Nyasaye wa Isiraeli, owekhala khuluruba ikulu wamakerubi, niwe Nyasaye wenyene, owamihanga khubwami bwosi obwesibala. Ibe walomba likulu nesibala.

¹⁶Ne luno OMWAMI henga khukekholekhanga khu ifwe. Hulila amang'ana ka Senakeribu al'lomanga khuibe nakhunyeka ibe Nyasaye oli mwoyo.

¹⁷OMWAMI khumanyile obwa abaruchi ba Asiria bamulula amahanga amenji nibakhola eb'bala biabwe ebilangalangwe,

¹⁸khandi basamba abanyasaye babwe; sichila sibali abanyasaye tawe habula biali ebiniini ebiabaatswa khumisaala nokhumachina ebiabandu balomba.

¹⁹Ne luno OMWAMI, khusoole okhurula khu Baasiria, kho tsinzibulo tsiosi etsiomusibala natsimanye mbu ibe, OMWAMI niwe Nyasaye wenyene.”

²⁰Kho Isaya omwana wa Amosi nakhupila Hesekia omunwa, naboola mbu, OMWAMI, Nyasaye wa Isiraeli umal'le okhuhul'la okhusaaya khukhwe khumang'ana ka Senakeribu omuruchi wa Asiria.

²¹Ne kano niko ako MWAMI aboolanga khuye: “Litookho lia Yerusalemu likhutsekhel'langa ibe Senakeribu nilikhuchiaya.

²²Opaalanga mbu niwina owotsekheleye nonyeka? Siwaimbelesisie oluyali ise Nyasaye Omutsienukhu wa Isiraeli tawe.

²³Orumile abarumikhilibo okhunzekhel'la ise, OMWAMI, niundepaakila mbu, khulwa makaari kaako amenji wafumila ebikulu bia Lebanoni ebirambi. Wepaaka mbu wali okhuremachila hasi emisiita tsia Lebanoni emirambi, nemitarakwa emikool'lokhu, khandi wali okhwola mukari mwene mwemisaala eminji.

²⁴Wepaaka mbu wali okhulima ebitaho nonywa amaatsi kebucheni khandi mbu bilenje biabasikari baabo biali okhukhamia amaatsi komuchela kwa Naili.

²⁵“Ibe siwahulilakhwo mbu nise owaloosia yako okhwekhola okhurula khale tawe? Ne luno ise mal'le okhukakhola kahesikhe. Ndakhuhelesia obunyali okhutubula amatookho akasiira okhukwa olukuukhi butswa.

²⁶Nisio esiachila abandu abamenyanga ebwene iyo nibatitiha mutsingufu nibachenya ma nibang'ang'ala. Bali singa obunyasi bwomubulimo, khandi singa obulimo obumelenga khunyumba ikulu, obwomanga nibusili okhukhula.

²⁷“Nebutswa ndamanya amang'ana kosi khuibe: akokholanga nende ahotsitsanga. Khandi ndamanya obwa okaniil'la obubi khuise.

²⁸Mal'le okhuhulila amang'ana kokhukaniil'la abubi khu ise nende injinia yiyo. Kho luno nzia okhura ingaka yanje mumoolu kaako nende esitiil'lo sianje mumunwa kukwo ma khukalusia khunjila eyawitsiyekhwo.”

²⁹Ma Isaya nabool'la Hesekia mbu: “Yisi nisio esiakhabe esimanyilo khuibe mbu: Mumuhika kuno olalia esiemesianga esiene, ne mumuhika kwakhabili olalia esisebukhanga khu esiatsana; ma mumuhika kwakhataru, noraake amatumako omwene ma nochese, khandi noraake emisabibu, ma nolie ebiamo biachio.

³⁰Ne yabo abahonokokha mbasikala khubeinyumba ya Yuda balahindila singa emisaala echihilanga emisi hasi nichiama ebiamo.

³¹Khwakhabeho nabandu mu Yerusalemu nende khusikulu sia Sayuni abahonokokhele. Sichila OMWAMI achoomanga okhukakhola kabe mbwo.

³²“Khulwe yako OMWAMI aboolanga yaka khumuruchi wa Asiria, ‘Salenjila mwitookho yili, kata okhulasamwo olusele lwobuyingo tawe. Omusikari wosi oli nesikhumba salesunda khulio tawe. Kata ebifuumi biokhulikal'la nokhulisiira sibilombokhwa okhulifumbila tawe.

³³Khu injila yayetselakhwo khandi nikhwo okhwa alakalukhila, nasili okhwinjila mwitookho. Ise OMWAMI mal'le okhuboola.

³⁴Nasoole litookho yili nindilinda butinyu khulwoluyali lwanje, khandi khulweindakano eyandasubisia Daudi omurumikhili wanje.’ ”

³⁵Obutukhu yibwo, om'malaika wo MWAMI yatsia mukambi ya Baasiria, ma niyeera abasikari etsielefu emia ndala namakhumi munane natsirano. Olwa babuukha mukamba tsuli, yabo bosi bali nibakon'ne hasi nibafwiye.

³⁶Kho Senakeribu omuruchi wa Asiria narulayo, nakalukha ingowe, ma namenya mwitookho lia Nineve.

³⁷Ne olwa yali niyekayakayilanga munyumba ya Nisitaroki nyasayewe, Adurameleki na Sharesa, abasianibe, bamwira netsinganga tsiabwe ma nibelukhila musibala sia Ararati. Esarihadoni, omusianiwe undi naruka musilenjesie.