Read lunyore 2 ABARUCHI 2 Bible Online

2 ABARUCHI 2 - lunyore bible

2 ABARUCHI 2

¹Olwo MWAMI yali nali ahembi okhubukula Eliya amuhile mwikulu neimbumbuyeka, Eliya nende Elisha bali nibali khuluchendo nibarulanga Giligali.

²Ne nibali khunjila, Eliya yabool'la Elisha mbu, “Noyanza lin'nda hano, okhuba OMWAMI urumile okhutsia Betseli.” Nebutswa Elisha naboola mbu, “Ndesuhanga khu OMWAMI oli mwoyo nende khuibe mbu sindakhakhulekhakhwo tawe.” Kho bombi nibatsia Betseli.

³Omukanda kwabaroobi abali mbamenyanga Betseli batsia khu Elisha nibamureeba mbu, “Umanyilekhwo mbu OMWAMI alabukula omwamiwo okhurula khuibe olwaleelo?” Elisha nabakalusia mbu, “Yee, manyile nimbwo kali, nebutswa khural'lloma khuko tawe.”

⁴Eliya nabool'la elisha mbu, “Hulukhila hano, okhuba OMWAMI urumile okhutsia Yeriko.” Nebutswa Elisha naboola mbu, “Ndesuhanga khu OMWAMI oli mwoyo nende khuibe, mbu sindakhakhulekhakhwo tawe.” Kho bombi nibatsia Yeriko.

⁵Omukanda kwabaroobi abali mbamenya Yeriko batsia khu Elisha, nibamubool'la mbu, “Umanyilekhwo mbu OMWAMI alabukula omwamiwo okhurula khuibe olwaleelo?” Elisha nakalusia mbu, “Yee, manyile nimbwo kali, nebutswa khural'loma khuko tawe.”

⁶Ma Eliya nabool'la Elisha mbu, “Hulukhila hano, okhuba OMWAMI urumile okhutsia Yorodani.” Nebutswa Elisha yaboola mbu, “Nesuhanga khu OMWAMI oli mwoyo khandi khuibe mbu sindakhulekhakhwo tawe.” Kho bombi nibatsia Yorodani.

⁷Ne abandu amakhumi karano khumukanda kwabaroobi nibabalonda, ma nibasinjil'la ehale, ne Eliya nende Elisha nibasinjil'la haluchinga olwomuchela.

⁸Eliya yamala nabukula ingubo yiye, nachiborola, nakhupa amaatsi n'nayo, ma amaatsi nikeyanga nikekabula elubeka nelubeka, naye na Elisha nibambukha okhutsia oluchelekha lundi nibachendanga khwiloba eliomu.

⁹Olwa bali nibool'le oluchelekha lundi, Eliya yabool'la Elisha mbu, “Reeba liosi eliawenya khukhol'le nisili okhuhiinibwa khuibe.” Naye Elisha naboola mbu, “Khusayanga noyanza, umbe omukabwa okwetsingufutsio esiakhabili.”

¹⁰Eliya naboola mbu, “Urebele esindu esitinyu; nebutswa olasihebwa nikaba olandola olwamba nimbinibungwa khuibe, norandutsi siwakhanyola.”

¹¹Nibatsilil'la okhul'loma ne nibachenda; nonoho likaari liomul'lo netsisululi tsiomul'lo liababukhania, ma Eliya nahilwa mwikulu nali mumbumbuyeka.

¹²Ne Elisha yalola ma nalanjisia Eliya naboola mbu, “Papawee, Papawee! Omusooli wa Isiraeli omukufu! Utsiye!” Ma siyamulola khandi tawe. Kho Elisha yabukula inguboye omwene narandulamwo tsibili khulwesibeela.

¹³Khandi nabukula ingubo eyali neronyele okhurula khu Eliya, ma nakalukha nasinjila haluchinga lwa Yorodani.

¹⁴Nabukula ingubo eyalineronyele okhurula khu Eliya, ma nakhupa khumaatsi n'nako naboola mbu, “Ali hena OMWAMI Nyasaye wa Eliya?” Ne olwa yali nakhupile amaatsi, kali okhwekabula khumbeka y'yi; ma Elisha niyambukha eluchelekha lundi.

¹⁵Abaroobi amakhumi karano okhurula Yeriko bamulola, ma nibaboola mbu, “Obunyali bwa Eliya buli khu Elisha.” Nabo batsia okhumwakan'na nibamwinamila.

¹⁶Ma nibamubool'la, “Lola khuli abandu betsingufu amakhumi karano. Khurume khutsie okhukhaba omwamiwo. Haundi omwoyo wo MWAMI amuhil'le ehale ma namulekha khusikulu nalebe noho mwibanda nalebe.” Elisha yabakaya naboola mbu, “Muratsia tawe.”

¹⁷Nebutswa bahindilisia okhwola olwa yababool'la batsie. Abandu amakhumi karaano yabo bamala nibatsia okhukhaaba Eliya khubikulu nom'mabanda khulwamatukhu kataru, nebutswa sibamunyoola.

¹⁸Bamala nibakalukha khu Elisha, owali nalindil'langa Yeriko, owamala nababool'la mbu, “Sindamukayile muratsia tawe?”

¹⁹Abandu bandi okhurula Yeriko batsia khu Elisha nibaboola mbu, “Omwami, singa omanyile, esibala siefwe nesilahi nebutswa amaatsi namabi ma kachilanga abakhasi befwe nibarula abaana.”

²⁰Naye yalaka naboola mbu, “Biikhe echumbi mulutaabo olwibulo ma munder're.” Kho bamuler'ra

²¹naye yatsia hamuchela, nafuba echumbi m'maatsi, ma naboola mbu, “OMWAMI aboolanga mbu, ‘Namiye amaatsi yaka tsikhabi, ne sinakeere nohomba okhuhiiniakhwo abaana khandi tawe.’ ”

²²Ne okhurula olwene yilwo okhwola luno, amaatsi kakasibwa okhulondekhana khwing'ana elia Elisha yal'loma.

²³Elisha yarula Yeriko okhutsia Betseli ne olwa yali nali khunjila abasiani bandi abati nibarula mwitaala ma nibamutsekhel'la nibaboola mbu, “Rula otsie omundu wesiole ibe.”

²⁴Elisha yakhupa amasemo inyuma ne olwa yabalola, yabalaama muliira lio MWAMI. Ma amaaka kesikhasi kabili nikarula musitsiimi ma nikarandul'la abasiani amakhumi kane nababili mubitonye.

²⁵Elisha yatsilil'la noluchendo ma natsia khusikulu sia Karimeli, ma olunyuma nakalukha Samaria.