Read lunyore 2 ABARUCHI 20 Bible Online

2 ABARUCHI 20 - lunyore bible

2 ABARUCHI 20

¹Mumatukhu kene yako, Hesekia yalwala ma naba ahembi okhufwa. Ne omuroobi Isaya omwana wa Amosi yatsia okhumulola ma namubool'la, “OMWAMI aboolanga kano, ‘Kaasia inyumbayo, okhuba noofwe, ne sinohone mubulwaye yibu tawe.’ ”

²Ma Hesekia nasukhana nahenga khwisisi, ma nasaaya khu MWAMI, naboola,

³“Witsul'le Ibe OMWAMI, mbu Ise ndakhurumikhila musibilwa nende obuhulili, ma khandi ndateema okhukhola akawenyanga khole.” Ma nachaaka okhulakaya bululu.

⁴Isaya narula nalekha omuruchi, ne nasili khukhalania omukitsi hakari kwehango homuruchi, OMWAMI yambool'la

⁵akalukhe khu Hesekia, omuruchi wabandu bo MWAMI ambool'le “Ise OMWAMI, Nyasaye wa kuka uwo Daudi, mal'le okhuhul'la okhulakaya khukhwo, khandi ndutsi amasikako. Nzia okhukhuhonia, ne inyuma wamatukhu kataru olatsia Muhekalu.

⁶Nase ndakhumeeta emihika likhumi nachirano khubulamubwo. Ndakhuhonia halala litookho yili okhurula mumukhono kwomuruchi wa Asiria, ne ndasoola litookho yili khuluyali lwanje omwene nokhulwa oluyali lwomurumikhili wanje Daudi.”

⁷Kho Isaya nabool'la abakhalabani bomuruchi, “Leere ekeki yamakhuyu, muchibukule mure khwibure mbu ahone.”

⁸Kho Hesekia nareeba Isaya mbu, “Nisina esiakhabe esimanyilo mbu OMWAMI alambonia, khandi mbu ndakhanyala okhutsia Muhekalu inyuma wamatukhu kataru?”

⁹Naye Isaya namukalusia mbu, “OMWAMI alakhuhelesia esimanyilo mbu alahesia. Luno wakhenya esiniini sili khubinino siesunde imbeli ebilenje likhumi, nohomba okhukalukha inyuma ebilenje likhumi?”

¹⁰Hesekia naye namukalusia mbu, “Nobutoro okhukhola eliniini okhutsia imbeli ebilenje likhumi! Kho luno khola eliniini likalukhe inyuma ebilenje likhumi.”

¹¹Kho Isaya nasaaya khu MWAMI; ne OMWAMI nakhola eliniini okhukalukha inyume khubinino biali nibirechekhelwe nomuruchi Ahasi.

¹²Olwene yilwo Merodaki Baladani omwana wa Baladani, omuruchi wa Babulonia yahul'la mbu Hesekia yali niyabeye omulwaye, khulwe yako yamurumile ebarwa nende esihanwa.

¹³Hesekia yabenjisia, nabamanyia emianduchie chiosi, nachio chiali efetsaye, etsahabuye, nende ebihunyanga bulahi, amafura kobukusi, nebilasaan'nobie. Sibulaho esia yabula okhubamanyia mumabiikhiloke nohomba habundu hosi mu bwami bubwe.

¹⁴Nilwo olwomuroobi Isaya yeetsa khumuruchi Hesekia namureeba mbu, “Abandu yaba barul'le musibala sina ne betsele okhukhubool'la sina?” Hesekia nakalusia mbu, “Baruul'le musibala siehale, esia Babulonia.”

¹⁵Isaya nareeba mbu, “Baluutsi sina munyumba yabaruchi?” Hesekia namukalusia mbu, “Baluutsi ebindu biosi ebili munyumba yanje; ne sisilikhwoho esili mumabiikhilo kanje esiambule okhubamanyia tawe.”

¹⁶Kho Isaya nabool'la Hesekia mbu, “OMWAMI Wokhunyala Biosi aboolanga mbu,

¹⁷amatukhu keetsanga olwa ebindu biosi ebili munyumbayo yoburuchi, biosi ebia abakukabo bakhubiikhila okhwola litukhu lino biakhachingwe nibiyilwa Babulonia. Sibulaho esindu siosi esiakhasikale tawe.

¹⁸Ne bakhabukule balala khubaanabo abasiani aba wakhebule, abolwibulo lulwo; bakhalatwe khulwokhurumikha munyumba yomuruchi wa Babulonia.”

¹⁹Hesekia nabool'la Isaya mbu, “Amang'ana kaundereye okhurula khu MWAMI namalahi. Okhuba yabukula amang'ana ka Isaya okhuboola mbu omulembe nende obulindwi obulahi bwakhabeho mumatukhu kobulamu bubwe.”

²⁰Amang'ana kandi kosi aka Hesekia yakhola, nolutswoni lulwe, khandi obwa yombokha litangi ma nayaba omutalo kwokhuleera amaatsi mwitookho, kahandiikwa musitapu esiamang'ana ketsinyinga tsiabaruchi ba Yuda.

²¹Hesekia nafwa, Manase omwanawe naruka musilenjesie.