Read lunyore 2 ABARUCHI 22 Bible Online

2 ABARUCHI 22 - lunyore bible

2 ABARUCHI 22

¹Yosia yali owemihika munane olwa yakholwa omuruchi wa Yuda, naye yaruka mu Yerusalemu emihika amakhumi kataru namulala. Eliira lianyinawe liali Yedida omukhaana wa Adaya okhurula mwitaala lia Bosekatsi.

²Yosia yakhola akali amalahi imbeli wo MWAMI, nalonda amang'ana komuruchi Daudi kukanyene; nalonda amalako aka Nyasaye kosi nomwoyo kwosi.

³Mumuhika kwelikhumi namunane kwoburuchi bwa Yosia, omuruchi yaruma Shafani omwana wa Asalia, omwitsukhulu wa Meshulamu, owali omuhandichi wesiina, mbu atsie mu Hekalu namalako mbu:

⁴“Tsia khu Hilikia Omwesaalisi Omukhongo akhubool'le namapesa kanga akabesaalisi abalindanga omuliango kwokhwinjila mu Hekalu basoloye okhurula mubandu.

⁵Omubool'le ahaane amapesa yako khubandu khulwo okhulombwa khwe Hekalu. Nabo barunge

⁶abaari betsimbao, nende abombokhi bamachina, khandi bakule tsimbao nende amachina amabaatse khulwo okhulomba Ehekalu.

⁷Abandu abasinjiliye omulimo yikwo sinabareebwe okhumanyia oburumikhi bwamapesa tsana akahan'nwe m'makhono kabwe tawe, sichila nabasuubilwa mukhukhola khwabwe.”

⁸Hilikia Omwesaalisi Omukhongo naye nabool'la Shafani omuhandichi wesiina mbu, “Ndakhanyoola esitapu siamalako mu Hekalu.” Kho Hilikia nahaana esitapu tsana khu Shafani, naye nasomakhwo.

⁹Shafani omuhandichi nakalukha khumuruchi Yosia namwinoosia mbu, “Abarumikhilibo bahiinisie amapesa kosi akanyoolekha mu Hekalu, ma bakahaan'ne m'makhono kabakholi abasinjiliye okhwombokhwa khwe Hekalu.”

¹⁰Ma khandi nabool'la omuruchi mbu, “Hilikia, omwesaalisi yali okhumba esitapu.” Kho Shafani nasisoma imbeli womuruchi butinyu.

¹¹Olwa omuruchi yahul'la esitapu siamalako nisisomwanga, yerandul'la tsingubotsie musibeela.

¹²Ma omuruchi nalaka Hilikia omwesaalisi na Ahikamu omwana wa Safani, nende Akibori omwana wa Mikaya, nende Shafani omuhandichi wesiina nende Asaya omukhongo owalindanga omuruchi, naboola mbu:

¹³“Tsie mureebe OMWAMI khulwe ise khandi khulwa abandu ba Yuda khumang'ana akesitapu yisi siekesianga. OMWAMI ali noburima obukali khuifwe, sichila abakuka befwe sibakhola amang'ana kesitapu yisi siboolanga kakholwe tawe.”

¹⁴Kho Hilikia omwesaalisi, nende Ahikamu nende Akibori nende Shafani, na Asaya batsia okhureeba Hulida omuroobi wesikhasi owamenyanga mulusoma lwa Yerusalemu. (Yali omukhasi wa Shalumu omusiani wa Tikiwa, omwitsukhulu wa Harihasi omulindi wetsingubo tsiomu Hekalu.) Bamwinoosia akali nikekhol'le,

¹⁵naye nababool'la, bakalukhe khumuruchi ma bamubool'la

¹⁶amang'ana kano okhurula khu MWAMI: “Nambane esinyasio khu Yerusalemu nokhubandu bamenyeleho bosi, okhulondokhana namang'ana kosi akahandikwa musitapu esiomuruchi wa Yuda asomele.

¹⁷Baisuula ma bahaana emisango khubanyasaye bandi ma khulwako bachema lirima lianje khulwemilimo chiosi echia bakhola. Oburima bwanje bwechinjile khu Yerusalemu, ne sibulasimibwa tawe.

¹⁸Ne, khumuruchi wa Yuda uyo omurumile, kano niko ake ise OMWAMI, Nyasaye wa Isiraeli mboolanga: Ohuliye amang'ana akahandikwa musitapu,

¹⁹ma niweyama khandi niwetutuyia imbeli wanje, norandula tsingubotsio nende okhulakaya nokhwekhuula olwohuliye okhuriisia khwanje okhuhaana esinyasio khu Yerusalemu nokhubandu. Nandikhole habundu hokhurisia, aheliira liaho nalirumikhilwenje singa esilaamo. Nebutswa mbuliye okhusaaya khukhwo,

²⁰ne esinyasio esia nandeere khu Yerusalemu sinasiitsa tawe okhwola olwa nobe nofwiye. Ndandekhe nofwe mumulembe.” Ma abandu yabo nibakalukha khumuruchi Yosia neling'ana yilio.