Read lunyore 2 ABARUCHI 23 Bible Online

2 ABARUCHI 23 - lunyore bible

2 ABARUCHI 23

¹Omuruchi Yosia yalanga abemeli ba Yuda na Yerusalemu bosi,

²ma bosi halala nibenjila mu Hekalu halala nabesaalisi nende abaroobi, nende abandu bandi bosi, abat'ti nabakhongo. Yosia nabasomela bosi amang'ana Kesitapu sieindakano tsana esianyoolwa mu Hekalu.

³Omuruchi khandi yasinjila hasiilo, natsienula indakano imbeli wo MWAMI, mbu alalonda OMWAMI nokhulinda amalakoke namebaaloke nomwoyo kukwe kwosi namakani kaake kosi, nende okhukhola amang'ana kosi akeindakano akahandikwa musitapu yisi. Ne abandu bosi nibahuchil'la okhulinda indakano tsana.

⁴Ma Omuruchi Yosia nalaka Hilikia, Omwesaalisi Omukhongo, nende abesaalisi bandi abalondel'langa khuye, nende abalindi bom'muliango kwo Muhekalu mbu bahiinie Muhekalu yo MWAMI ebilonje ebiarumikhilwanga mukhwekayakaya Baali na Ashera, nende ebilonje bietsinyininyini. Omuruchi yasambila ebilonje yibi biosi esioba welitookho lia Yerusalemu ahembi mwibanda lia Kidironi, ma likokhe liabio nilihilwa Betseli.

⁵Yahinia khundebe abesaalisi babanyasaye bandi ababaruchi ba Yuda bali nibeemekha okhusambila obwali habundu hokhwekayakayila ebiniini mumatookho ka Yuda nomutsimbeka tsia Yerusalemu. Khandi yasinjisia yabo bosi abahaananga emisango khu Baali, nokhuliuba, nokhumwesi netsinyininyini nende ebilombe biosi ebiokhwikulu.

⁶Yahinia esiilo ya Ashera okhurula mu Hekalu yo MWAMI, nachira esioba wa Yerusalemu mwibanda lia Kidironi nachisambilamwo. Nachitubula nekwa olukhuukhi ma nasalania olukhuukhi tsana mubilindwa biabandu abarali Abaami.

⁷Nakoka hasi tsinyumba tsiabasambale etsialinji mu Hekalu yo MWAMI omwabakhasi banabilanga tsingubo etsiarumikhilwanga mubwekayakayi bwa Ashera.

⁸Nahinia abesaalisi tsana esioba wamataala ka Yuda nafwabia habundu hokhwekayakayila abanyasaye bandi aha abesaalisi basambila obwali, okhurula Geba okhwola Berisheba. Khandi yakoka hasi ebiniini biomubilibwa ebiali mubwinjil'lo bwomusilibwa sia Yoshwa omukafuna welitaala ebiali khumukhono mukhasi musilibwa sielitaala.

⁹Nebutswa abesaalisi bebiniini sibali nibaniinanga halusambwa lwo MWAMI mu Yerusalemu tawe, habula balitsanga omukaati namamela mubaana babwe.

¹⁰Khandi yafwabia Tofetsi habundu hokhwekayakayila abanyasaye abanasibala mwibandu lia Hinomu, kho mbu omundu wosi arakhahaana omwanawe nohomba omukhaanawe singa omusango kwokhusambwa khu Muleki.

¹¹Khandi yahiniaho etsisululi tsiabaruchi ba Yuda bali nibahaana khulwokhwekayakaya eliuba. Khandi yasamba amakaari akarumikhanga mubwekayakayi yibu. (Yibi biali nibiabikhwa mumukitsi kwe Hekalu ahembi nesilibwa ne sibiali ehale nesikoti sia Natsani Meleki omukhongo yamenyanga tawe.)

¹²Ne tsisambwa tsiali nitsiombokhwa khusilama sietsinyumba tsiabaruchi ba Yuda ikulu wesikoti siokhumenya siomuruchi Ahasi tsiasambulwa nomuruchi Yosia halala netsisambwa etsiombokhwa nomuruchi Manase mumikitsi tsibili tsie Hekalu. Yatonyania tsisambwa mubitonye ma nachifuuba mwibanda lia Kidironi.

¹³Khandi omuruchi Yosia yafwabia tsisambwa tsiomuruchi Solomoni yombokha ebukwe wa Yerusalemu nende enandete wesikulu sie Miseituni khulwokhwekayakayilakhwo Asitarete nyasaye omukhasi wa Basidoni, Kemoshi nyasaye wa Moabu nende Moleki nyasaye wa Amoni.

¹⁴Yosia khandi yafunaka etsisiilo tsiamachina, naremachila hasi esiniini siomunyasaye mukhasi Ashera niyetsusia habundu habanyasaye tsana bali nibasinjisibwa namakumba kabandu.

¹⁵Khandi Yosia yasambul'la olusambwa lwa Betseli ahokhwekayakayila ebiniini ahali nihombokhwa nende Yeroboamu omwana wa Nebati, owenjisia Isiraeli mu tsimbi. Yosia yeha olusambwa tsana nende ahokhwekayakayila yaho, niyasaka amachina kalwo mubipande, nakatubula nikakwa olukhuukhi, ma nasamba esiniini siomunyasaye mukhasi Ashera.

¹⁶Ne olwa Yosia yasukhana, yalola ebilindwa khusikulu, narumania mbu amakumba kahinibwemwo, ma nakasambila khulusambwa. Munjila iyo yononia olusambwa, ma nakhola singa ling'ana lio MWAMI eliomuroobi yali niyarooba khale olwa Yeroboamu yali nasinjiye halusambwa mwisabo. Omuruchi Yosia yasukhana ma nalola esilindwa siomuroobi tsana owali niyarooba amang'ana yaka.

¹⁷Ma nareeba mbu, “Nesilindwa siawina sila?” Abandu ba Betseli nibamukalusia mbu, “Nesilindwa siomuroobi owetsa okhurula Yuda ma narooba amang'ana yaka aka ibe okhol'le khulusambwa lwa Betseli yilu.”

¹⁸Naye naboola, “Mulekhe abe, omundu wosi arakhayabul'la amakumbake tawe.” Kho balekha amakumbake halala namakumba kabaroobi abetsa okhurula Samaria.

¹⁹Ne mubuli litookho lia Isiraeli omuruchi Yosia yasambul'la siahabundu hosi hokhwekayakayila abanyasaye abanasibala ahali nihombokhwa nabaruchi ba Isiraeli abali okhuchema lirima lia Nyasaye. Yalikul'la tsisambwa tsiosi singa obwa yali nakholeyekhwo olusambwa lwa Betseli.

²⁰Khandi niyeer'ra abesaalisi abanasibala bosi hatsisambwa tsiabwe ahabahan'nanga emisango ma nasambila amakumba kabandu khubuli olusambwa. Ma nakalukha Yerusalemu.

²¹Kho omuruchi Yosia nalaka abandu bosi, okhulia lisabo lie Pasaka khulwo khuhaana oluyali khu Nyasaye wabwe singa obwa kahandiikwa musitapu sieindakano.

²²Lisabo lie Pasaka singa yili liali nilisili okhukholwakhwo okhurula m'matukhu kabakhalachi barukanga Isiraeli. Kata siliali niliakholwakhwo mumatukhu kosi akabaruchi ba Isiraeli nohomba akabaruchi ba Yuda tawe.

²³Nebutswa, mumuhika kwelikhumi namunane okwoburuchi bwa Yosia, Lisabo lie Pasaka yili liakhol'lwa OMWAMI mu Yerusalemu.

²⁴Khulwokhutinyilisia amalako akahandikwa musitapu esia Hilikia Omwesaalisi Omukhongo yanyola Muhekalu, omuruchi Yosia yahinia abebitsohela nende abalosi, nende abemiterafi nebiniini nende ebies'sinyo biosi ebialolekha musibala sia Yuda nomu Yerusalemu.

²⁵Siyaliho Omuruchi singa ye khuyabo abamuranjil'la owarumikhila OMWAMI nomwoyokwe kwosi, namakanike kosi, netsingufutsie tsiosi nalonda amalako ka Musa, nohomba kata khuyabo abaruka inyumawe tawe.

²⁶Nebutswa OMWAMI siyalekha obululu bwoburimabwe obwasenula lileko lilie khu Yuda khulwa amang'ana kosi akomuruchi Manase yamukhol'la tawe.

²⁷Ma OMWAMI naboola mbu, “Khandi nakhunga Yuda okhurula mumoni tsianje singa obwa ndali okhukhunga Isiraeli, khandi nasuule Yerusalemu litookho elia ndahula nende Ehekalu eyandaboola mbu, niho habundu hangwana okhwekayakayilwa.”

²⁸Amang'ana kandi kosi aka Yosia yakhola kosi, kahandiikwa musitapu esia amang'ana ketsinyinga tsiabaruchi ba Yuda.

²⁹Mumatukhu koburuchibwe, Neko omuruchi we Misiri yemel'la abasikaribe okhutsia khumuchela kwa Efurate okhukhonyel'la omuruchi wa Asiria. Omuruchi Yosia yateema okhwikal'la abasikari ba Misiri, habundu halangwa Mekito ma niyer'rwa mwihe.

³⁰Abakhongobe bamala bare om'mbilikwe mwikaari okhurula Mekito, nibamuleera Yerusalemu ma nibamuyabila mubilindwa biabaruchi. Kho abandu ba Yuda bahula Yehoahasi omwana wa Yosia, nibamutsukhiil'lakhwo amafura, okhuba omuruchi musilenje sia Yosia samwana.

³¹Yehoahasi yali owemihika amakhumi kabili nachitaru olwa yakholwa omuruchi wa Yuda, naruka emiesi chitaru mu Yerusalemu. Eliira lia nyina liali Hamutali omukhaana wa Yeremia okhurula mwitookho lia Libina.

³²Naye yakhola akali amabi imbeli wo MWAMI singa amang'ana kosi akabakukabe bali okhukhola.

³³Yarula muburuchi olwa Neko omuruchi wa Misiri yamufumila namuhila mubuhambe Ribula mulusoma lwa Hamatsi mbu abule okhuruka mu Yerusalemu. Ma Neko nahakia Yuda okhurunga obusuru bwetsikilo etsielefu tsitaru netsimia tsine etsiefetsa nende etsikilo amakhumi kataru natsine etsietsahabu.

³⁴Ma Neko nakhola Eliakimu omwana wa Yosia okhuba omuruchi musilenje sia Yosia samwanawe; nakalukhania eliiralie okhuba Yehoyakimu nebutswa yahilwa Emisiri nende omuruchi Neko ma nafwilayo.

³⁵Omuruchi Yehoyakimu yasolola obusuru okhurula khubandu okhulondokhana nomuruchi we Misiri nemiandu chiabali n'natsio khe abe onyala okhunyoola amapesa akanyala okhuhela obusuru obwenywanga nende omuruchi we Misiri.

³⁶Yehoyakimu yali owemihika amakhumi kabili nachirano olwa yakholwa omuruchi wa Yuda. Ne yaruka emihika likhumi mu Yerusalemu. Eliira lia nyina liali Sebida omukhaana wa Pedaya okhurula mwitaala lia Ruma.

³⁷Yakhola akali amabi imbeli wo MWAMI singa obwa abakukabe bali okhukhola.