Read lunyore 2 ABARUCHI 24 Bible Online

2 ABARUCHI 24 - lunyore bible

2 ABARUCHI 24

¹Mumatukhu koburuchi bwa Yehoyakimu, Nebukadinesa omuruchi wa Babulonia yeetsa okhuseera Yuda, ma khulwemihika chitaru, Yehoyakimu yahachibwa okhuba hasi hoburuchi bwe ma olunyuma namukhol'la induli.

²OMWAMI namurumila emikanda tsiobuseeri chia Bababulonia Abasiria Abamoabu nende Abaamoni khulwokhulwana Yehoyakimu nokhumuma esibala sia Yuda singa obwo MWAMI yali niyal'lomela mubarumikhilibe, abaroobi mbu yakhakhole.

³Siahene yaka kekhola khu Yuda singa OMWAMI yalaka, kho abe onyala okhubahiinia mumonitsie khulwe tsimbitsio omuruchi Manase yakhola

⁴ne okhusila muno khulwabandu abaraali nesikha abayera. OMWAMI siyakhamubeleye Manase khulwe akene yako tawe.

⁵Amang'ana kandi aka Yehoyakimu, yakhola kahandiikwa musitapu siamang'ana ketsinyinga tsiabaruchi ba Yuda.

⁶Kho Yehoyakimu yafwa nayabilwa mubilindwa biabaruchi, ma Yehoyakini omwanawe naruka musilenjesie.

⁷Ma omuruchi we Misiri halala nabasikaribe sibarulakhwo musibalasie okhutsia okhulwana khandi tawe sichila omuruchi wa Babulonia yali niyamihanga eb'bala biosi ebialinji ebiomuruchi we Misiri okhurula khumuchela kwe Misiri okhwola khumuchela kwa Efurate.

⁸Yehoyakini yali owemihika likhumi namunane olwa yakholwa Omuruchi wa Yuda, naruka emiesi chitaru mu Yerusalemu. Eliira lia nyina liali Nehusita omukhaana wa Elinatsani wa Yerusalemu.

⁹Yakhola akali amabi imbeli wo MWAMI singa obwa samwana yali okhukhola.

¹⁰Mumatukhu koburuchibwe, abakhongo belihe lia Nebukadinesa omuruchi wa Babulonia beetsa okhuseera Yerusalemu, ma nibalifumbila.

¹¹Ma Nebukadinesa niyetsa Yerusalemu, olwa abasikaribe bali nibafumbiye nokhulitiila.

¹²Omuruchi Yehoyakini wa Yuda halala na mamawe, abasianibe, abakhongo belihelie nende abalindi behango nibehana mumakhono ka Bababulonia. Mumuhika kwamunane kwoburuchi bwa Nebukadinesa. Nebukadinesa yara Yehoyakini mubuhambe

¹³ma nahila Babulonia amabiikhilo kosi ake Hekalu nende amabiikhilo akomunyumba yomuruchi. Nebukadinesa yaremania mubitonye ebilonje bietsahabu mu Hekalu, ebia Solomoni omuruchi wa Isiraeli yali okhulomba singa OMWAMI yekholel'la okhuboola.

¹⁴Omuruchi Nebukadinesa yahila mubuhambe abandu ba Yerusalemu bosi, nabaana babaruchi bosi, nende abemeli bosi ne, bosi halala bali abandu etsielefu likhumi. Khandi yara mubuhambe abasitsa bosi nibalimwo abeeranyi, abulaho owasikalakhwo nibarali abamanani bomusibala bonyene.

¹⁵Khandi yahila Omuruchi Yehoyakini Babulonia; halala nanyina, nabakhasi bomuruchi, nabakhongobe, nende abemeli ba Yuda. Bosi yabahila mubuhambe okhurula Yerusalemu nabahila Babeli.

¹⁶Ma Nebukadinesa nahila mubuhambe Babulonia abandu bosi abakhongo etsielefu tsine natsitaru, nabasitsa nabeeranyi abahela elefu ndala, bosi bali abandu abakufu khandi abanyala okhulwana mwihe.

¹⁷Nebukadinesa niyemekha Matania samwana Yehoyakini undi okhuba Omuruchi musilenjesie, nakalukhania eliiralie okhuba Sedekia.

¹⁸Sedekia yali owemihika amakhumi kabili namulala olwa yakholwa Omuruchi wa Yuda naruka emihika likhumi namul'la mu Yerusalemu. Eliira lianyina liali Hamutali omukhaana wa Yeremia okhurula mwitookho lia Libina.

¹⁹Sedekia yakhola akali amabi imbeli wo MWAMI singa obwa Yehoyakimu yali okhukhola.

²⁰OMWAMI yamala nahambila abandu ba Yerusalemu nende Yuda lileko ma yamala nabakhunga okhurula mutsimonitsie.